ନୂଆଦିଲ୍ଲୀ,୧୨।୧୦: ଆଫଗାନିସ୍ତାନ ବୈଦେଶିକ ମନ୍ତ୍ରୀ ଆମିର ଖାନ ମୁତାକି ଭାରତରେ ତାଙ୍କ ସାମ୍ବାଦିକ ସମ୍ମିଳନୀରେ ମହିଳା ସାମ୍ବାଦିକଙ୍କ ଅନୁପସ୍ଥିତିକୁ ସମର୍ଥନ କରି ଏକ ବିବୃତ୍ତି ଜାରି କରିଛନ୍ତି। ମୁତାକି କହିଛନ୍ତି ଯେ ମହିଳା ସାମ୍ବାଦିଙ୍କୁ ବାଦ ଦେବା ଏକ ଜାଣିଶୁଣି କାର୍ଯ୍ୟ ନୁହେଁ ବରଂ କେବଳ ଲଜିଷ୍ଟିକ କାରଣ ଯୋଗୁ ହୋଇଥିଲା।
ସେ କହିଛନ୍ତି, ‘ଯେପର୍ଯ୍ୟନ୍ତ ସାମ୍ବାଦିକ ସମ୍ମିଳନୀ ସମ୍ପର୍କରେ କଥା, ଏହା ଏକ ସଂକ୍ଷିପ୍ତ ନୋଟିସରେ ଅନୁଷ୍ଠିତ ହୋଇଥିଲା, ଯେଉଁଥିରେ ସାମ୍ବାଦିକଙ୍କ ସଂକ୍ଷିପ୍ତ ତାଲିକା ଚୟନ କରାଯାଇଥିଲା। ତେଣୁ, ଏହା କେବଳ ଏକ ବୈଷୟିକ ବିଷୟ ଥିଲା। ଆମର ଅଂଶୀଦାରମାନେ କେବଳ କିଛି ବଛା ବଛା ସାମ୍ବାଦିକଙ୍କୁ ନିମନ୍ତ୍ରଣ କରିବାକୁ ନିଷ୍ପତ୍ତି ନେଇଥିଲେ, ଏବଂ ଆମର ଅନ୍ୟ କୌଣସି ଉଦ୍ଦେଶ୍ୟ ନଥିଲା।’
ଏହି ଘଟଣା ଉପରେ ଭାରତରେ ତୀବ୍ର ସମାଲୋଚନା ମଧ୍ୟରେ ଆଫଗାନିସ୍ତାନ ବୈଦେଶିକ ମନ୍ତ୍ରୀ ଆମିର ଖାନ ମୁତାକିଙ୍କ ବିବୃତ୍ତି ଆସିଛି। ଭାରତୀୟ ବିରୋଧୀ ଦଳ ଏହି ଘଟଣାକୁ ମହିଳାମାନଙ୍କ ପ୍ରତି ଅପମାନ ବୋଲି କହିଛନ୍ତି। କଂଗ୍ରେସ ଏମପି ରାହୁଲ ଗାନ୍ଧୀ ମଧ୍ୟ ଏହି ଘଟଣା ପାଇଁ ସରକାରଙ୍କୁ ଦାୟୀ କରିଛନ୍ତି।
ସେ କହିଛନ୍ତି, ‘ସରକାର ମହିଳା ଅଧିକାର ପାଇଁ ଠିଆ ହେବାରେ ଦୁର୍ବଳତା ଦେଖାଇଛନ୍ତି ଏବଂ ମହିଳା ସାମ୍ବାଦିକମାନଙ୍କୁ ଏକ ସାର୍ବଜନୀନ ମଞ୍ଚରୁ ବାଦ ଦେବାକୁ ଅନୁମତି ଦେଇଛନ୍ତି।’
ଏହି ସମୟରେ, ଆଫଗାନିସ୍ତାନ ବୈଦେଶିକ ମନ୍ତ୍ରୀ ଆମିର ଖାନ ମୁତାକି ଆଉ ଏକ ବିବାଦୀୟ ପ୍ରସଙ୍ଗରେ ମନ୍ତବ୍ୟ ଦେଇଛନ୍ତି। ସେ ସ୍ପଷ୍ଟ ଭାବରେ ଏହି ଦାବିକୁ ପ୍ରତ୍ୟାଖ୍ୟାନ କରିଛନ୍ତି ଯେ ତାଲିବାନ ସରକାର ବାଳିକା ଶିକ୍ଷାକୁ ନିଷିଦ୍ଧ କରିଛି।
ସେ କହିଥିଲେ, ‘ଏଥିରେ କୌଣସି ସନ୍ଦେହ ନାହିଁ ଯେ ଆଫଗାନିସ୍ତାନର ଉଲାମାମାନଙ୍କର ମଦ୍ରାସା ଏବଂ ଦେଓବନ୍ଦ ସହିତ ଗଭୀର ସମ୍ପର୍କ ରହିଛି। କିନ୍ତୁ ଯେତେବେଳେ ଶିକ୍ଷାର କଥା ଆସେ, ବର୍ତ୍ତମାନ ଆମର ସ୍କୁଲ ଏବଂ ଅନ୍ୟାନ୍ୟ ଶିକ୍ଷାନୁଷ୍ଠାନରେ ୧୦ ନିୟୁତ ଛାତ୍ର ଅଧ୍ୟୟନ କରୁଛନ୍ତି, ଯେଉଁଥିରେ ପ୍ରାୟ ୨.୮ନିୟୁତ ମହିଳା ଏବଂ ଝିଅ ସାମିଲ ଅଛନ୍ତି। ଧାର୍ମିକ ମଦ୍ରାସାଗୁଡ଼ିକ ସ୍ନାତକ ସ୍ତର ପର୍ଯ୍ୟନ୍ତ ଶିକ୍ଷାଗତ ସୁବିଧା ପ୍ରଦାନ କରନ୍ତି। ଯଦିଓ କିଛି ସୀମାବଦ୍ଧତା ଅଛି, ଏହାର ଅର୍ଥ ନୁହେଁ ଯେ ଆମେ ଶିକ୍ଷାକୁ ବିରୋଧ କରୁଛୁ। ଆମେ ଏହାକୁ ଧାର୍ମିକ ଭାବରେ ନିଷିଦ୍ଧ ଘୋଷଣା କରିନାହୁଁ। ବରଂ, ପରବର୍ତ୍ତୀ ସୂଚନା ପର୍ଯ୍ୟନ୍ତ ଏହାକୁ ସ୍ଥଗିତ ରଖାଯାଇଛି।’
Dharitri – Odisha’s No.1 Odia Daily
