ଦାରିଙ୍ଗବାଡି,୨୧।୭(ଅରୁଣ ସାହୁ): ମାଟିର ପୁଅ ଯେତେବେଳେ କିଛି ଭଲ କାର୍ଯ୍ୟ କରି ଲୋକଲୋଚନକୁ ଆସେ, ସେତେବେଳେ କେବଳ ସେ ମାଟିର ସୁନା ପୁଅ ପାଇଁ ତାଙ୍କ ପରିବାର ନୁହେଁ, ସମଗ୍ର ଅଞ୍ଚଳରେ ଖୁସି ଓ ଆନନ୍ଦର ଲହରୀ ଖେଳିଯାଏ। ଏଭଳି ପୁଅ ଭିଡିଓ ଏବେ ସାମାଜିକ ଗଣମାଧ୍ୟମରେ ମୋବାଇଲକୁ ମୋବାଇଲ ଘୁରିବୁଲୁଛି। କନ୍ଧମାଳ ଜିଲାର ଦାରିଙ୍ଗବାଡି ଅଞ୍ଚଳର ସୁନା ପୁଅକୁ ନେଇ ଜୋରଦାର ଚର୍ଚ୍ଚା ଲାଗିରହିଛି।
ପ୍ରକାଶ ଯେ, ଉକ୍ତ ବ୍ଲକ ବ୍ରାହ୍ମଣୀଗାଁ ଥାନା ତାଜୁଙ୍ଗିଆ ପଞ୍ଚାୟତର ସୁନା ପୁଅ ବିଭୁତି ଭୂଷଣ ନାୟକ। ସେ ଏବେ କନ୍ଧମାଳର ପଡୋଶୀ ବୌଦ୍ଧ ଜିଲାର ଜିଲାପାଳ ଭାବେ କାର୍ଯ୍ୟରତ। ସେ ଭାରତୀୟ ପ୍ରଶାସନିକ ସେବାରେ ସଫଳତାର ସହ କାର୍ଯ୍ୟ କରୁଥିବାବେଳେ ଦୁର୍ଗମ ଗ୍ରାମକୁ ପାଦରେ ଚାଲି ଚାଲି ଘାଟି ପାହାଡ଼କୁ ଖାତିର ନକରି ଲୋକଙ୍କ ନିକଟରେ ପହଞ୍ଚୁଛନ୍ତି। ଦୁର୍ଗମ ଅଞ୍ଚଳରେ ଲୋକଙ୍କ ସମସ୍ୟା ବୁଝୁଛନ୍ତି।
ଏବେ ସେ ବୌଦ୍ଧ ଜିଲାରେ ଏକ ଧାନ କ୍ଷେତରେ ମହିଳାଙ୍କ ଗହଣରେ ନିଜେ ଧାନ ତଳି ଧରି ରୋଉଥିବା ଦୃଶ୍ୟ ଏବେ ଭିଡିଓ ଭାଇରାଲ ହେଉଛି, ଯାହାକି ଦାରିଙ୍ଗବାଡି ଅଞ୍ଚଳରେ ଏହାକୁ ନେଇ ଚର୍ଚ୍ଚା ଜୋରଦାର ଚାଲିଛି। ସେ ଦାରିଙ୍ଗବାଡି ଲାଲ ବାହାଦୁର ଉଚ୍ଚ ବିଦ୍ୟାଳୟରେ ପଢ଼ୁଥିବା ବେଳେ ତାଙ୍କ ସାଙ୍ଗସାଥି ଏବେ ଦାରିଙ୍ଗବାଡିରେ ରହୁଛନ୍ତି। ସେମାନେ ଜିଲାପାଳ ବିଭୁତିଙ୍କ ଏଭଳି ଆଚରଣକୁ ପ୍ରଶଂସା କରିବା ସହ ସେ ଅଞ୍ଚଳର ଗର୍ବ ବୋଲି ଚର୍ଚ୍ଚା ହେଉଛି।
Dharitri – Odisha’s No.1 Odia Daily
