ଦାରିଙ୍ଗବାଡି, ୫।୧ (ଅରୁଣ ସାହୁ):କନ୍ଧମାଳ ଜିଲା ଦାରିଙ୍ଗବାଡି ଥାନା କିରିକୁଟି ପଞ୍ଚାୟତରେ ପୂର୍ବ ଶତ୍ରୁତାରୁ ଘରେ ନିଆଁ ଲଗାଇ ହତ୍ୟା ଉଦ୍ୟମ ଅଭିଯୋଗ ହୋଇଛି। ଏଥିରେ ପୋଲିସ ଜଣେ ଚୋରାମଦକାରବାର କରୁଥିବା ବ୍ୟବସାୟୀ ତଥା ମୁଖ୍ୟ ଅଭିଯୁକ୍ତ ହାଡ଼ିପା ପ୍ରଧାନ ଓରଫ ଟୁଡୁଙ୍କ ସମେତ ୨ ସହଯୋଗୀ ଗୋପବନ୍ଧୁ ପ୍ରଧାନ ଏବଂ ସିଦ୍ଧାନ୍ତ ବେହେରାଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେମାନଙ୍କ ଜାମିନ ନାମଞ୍ଜୁର ପରେ ବିଚାରବିଭାଗ ହାଜତକୁ ପଠାଇଦିଆଯାଇଥିବା ପୋଲିସ କହିଛି। ପ୍ରକାଶ ଯେ, କିରିକୁଟିରେ ଚୋରାମଦ କାରବାର ଅବାଧରେ ଚାଲିଥିବାରୁ ଗାଁର ମହିଳାମାନେ ଚୋରା ମଦ କାରବାରରେ ଲିପ୍ତ ରହିଥିବା ବ୍ୟବସାୟିଙ୍କୁ ଡାକି ତାଗିଦ କରିବା ସହ ମଦ ବିରୋଧି ଆନ୍ଦୋଳନ କରିଥିଲେ । ପରେ କିଛି ଦିନର ନିରବତା ପରେ ପୁଣି ମୁଖ୍ୟ ଅଭିଯୁକ୍ତ ହାଡ଼ିପା ପ୍ରଧାନ ଓରଫ ଟୁଡୁ ଚୋରା ମଦ କାରବାର ଆରମ୍ଭ କରିଥିଲେ। ଏହାକୁ ଉକ୍ତ ଗ୍ରାମର ମହିଳା ରୁନୁ ବେହେରଦଳାଇ ବିରୋଧ କରି ମଦ କାରବାରକୁ ବନ୍ଦ କରିବାକୁ ତାଗିଦ କରିଥିଲେ । ଏଥିରେ ହାଡ଼ିପା ଉତକ୍ଷିପ୍ତ ହୋଇ ରୁନୁଙ୍କ ଉପରେ ପ୍ରତିଶୋଧ ନେବାକୁ ଯୋଜନା ପ୍ରସ୍ତୁତ କରି ଶୁକ୍ରବାର ବିଳମ୍ବିତ ରାତି ପ୍ରାୟ ୧୦ଟା ବେଳେ ରୁନୁ ଓ ତାଙ୍କ ୨ ଶିଶୁ ଘରେ ଥିବା ବେଳେ ତାଙ୍କ ସ୍ବାମୀ ଚନ୍ଦ୍ରଶେଖର ଘରୁ ଅନ୍ୟ ସାହିକୁ ନିଆଁ ପୁଇଁବା ପାଇଁ ଯାଇଥିବାର ସୁଯୋଗ ନେଇ ରୁନୁଙ୍କ ଘରେ ନିଆଁ ଲଗାଇ ଦେଇଥିଲେ। ଏହା ପରେ କୌଶଳ କ୍ରମେ ରୁନୁ ବାଡ଼ି ପଟେ କବାଟ ଖୋଲି ବାହାରକୁ ଦୌଡ଼ି ସାହି ଲୋକଙ୍କୁ ପାଟି କରି ଡାକିଥିଲେ । ଏହି ସମୟରେ ଅଭିଯୁକ୍ତମାନେ ସେଠାରୁ ଦୌଡ଼ି ପଳାଇଥିଲେ । ଗ୍ରାମବାସୀ ପହଞ୍ଚି ରୁନୁଙ୍କ ଘର ନିଆଁ ଲିଭାଇବାକୁ ପ୍ରୟାସ କରିଥିଲେ ମଧ୍ୟ ତାଙ୍କ ଧାନ, ଚାଉଳ ଓ ଟଙ୍କା ପଇସା ପୋଡି ପାଉଁଶ ହୋଇଯାଇଥିଲା । ପରଦିନ ଏନେଇ ରୁନୁଙ୍କ ସ୍ବାମୀ ଚନ୍ଦ୍ରଶେଖର ପାତ୍ର ଥାନାରେ ଲିଖିତ ଅଭିଯୋଗ କରିଥିଲେ। ଏନେଇ ପୋଲିସ ମାମଲା (୨ /୨୬ )ରୁଜୁ କରି ୨ ଅଭିଯୁକ୍ତଙ୍କୁ ରବିବାର ଓ ମୁଖ୍ୟ ଅଭିଯୁକ୍ତଙ୍କୁ ସୋମବାର ଗିରଫ କରିବାରେ ସଫଳ ହୋଇଥିବା ତଦନ୍ତକାରୀ ଅଧିକାରୀ ବାସନ୍ତି ବେହେରା କହିଛନ୍ତି ।
