ଖଇରା, ୨୯।୫: ବାଲେଶ୍ୱର ଜିଲା ଖଇରା ତହସିଲ କୁପାରୀ ଓ ବର୍ତ୍ତନା ରାଜସ୍ବ କ୍ଷେତ୍ର ଅଧୀନ ଶାରୀଶୁଆ ପାହାଡରେ ଥିବା ପଥର ଖଣିଗୁଡିକ କାର୍ଯ୍ୟକ୍ଷମ ପାଇଁ ରାଜସ୍ବ ଏବଂ ଇସ୍ପାତ, ଖଣି ବିଭାଗ ତରଫରୁ ବିଧିବଦ୍ଧ ପ୍ରକ୍ରିୟା ଆରମ୍ଭ ନ ହେଉଣୁ ଲୁଟେରାମାନେ ଦିନରାତି ଏକ କରି ଟ୍ରିପ ଟ୍ରିପ ପଥର ବିଭିନ୍ନ କ୍ରଶର ତଥା ଜିଲା ବାହାରକୁ ଚାଲାଣ କରୁଥିବା ଅଭିଯୋଗ ହୋଇଛି। ଆଇନ ଅନୁସାରେ ଶ୍ରମିକ ନିଯୁକ୍ତି, ହାତୀ ଚଲାପଥ, ରାଜସ୍ବ ଆମଦାନୀ ଆଦିକୁ ଦୃଷ୍ଟି ଦେଇ ଖଣି ଚଲାଇବାକୁ ଅନୁମତି ଦେବାକୁ ଗୁଆପାଳ, କଦଳୀଗଡିଆ, ବଗେଇପୁର, ଗଗୁଆ ଓ ଭୁଦେଇଶୁଳ ଆଦି ଗ୍ରାମର ଅଧିବାସୀ ଦାବି କରିଛନ୍ତି।
ପାହାଡରେ ଥିବା ୧୦୭ ଖଣି ମଧ୍ୟରୁ ଜୈବ ସମ୍ବେଦନକ୍ଷେତ୍ର ମଧ୍ୟରେ ଆସୁଥିବା ୧୦ଟି ଖଣିକୁ ବାଦ୍ ଦିଆଯାଇ ୯୭ ଖଣିକୁ ୫ବର୍ଷିଆ ନିଲାମ ଦେବାକୁ ପ୍ରସ୍ତୁତି ଆରମ୍ଭ ହୋଇଥିଲା। ୫୧ଟି ଖଣି ନିଲାମ ପ୍ରକ୍ରିୟାରେ ଭାଗ ନେଇଥିବା ବେଳେ ୪୬ଜଣ ସର୍ତ୍ତ ପୂରଣ କରି ନ ଥିଲେ। ଏହି ଖଣି ନିଲାମଧାରୀମାନେ ୨ବର୍ଷ ୪ମାସ ବ୍ୟବହାର ଚଳାଇଥିବା ବେଳେ ଜାତୀୟ ଗ୍ରୀନ ଟ୍ରିବ୍ୟୁନାଲର ରାୟ ପରେ ହାତୀ ଚଲାପଥ ଓ ପରିବେଶ ସୁରକ୍ଷା ଆଦି ବିଷୟ ଉପରେ ରାଜ୍ୟ ସରକାରଙ୍କ ନିକଟରୁ ଜାଣିବାକୁ ଚାହିଁଥିଲେ ଓ ଖଣି ବ୍ୟବହାର ଉପରେ କଟକଣା ଲଗାଇଥିଲେ। ଏହାସହିତ ସମସ୍ତ ଖଣିରେ ୧୪୪ ଧାରା ଲାଗୁ ହୋଇଥିଲା। ଏବେ କିଛି ବର୍ଷ ଖଣି ବ୍ୟବହାର କରିଥିବା ଏବଂ ନିଲାମ ପାଇଁ ଅନୁମତି ପାଇଥିବା ବ୍ୟକ୍ତିମାନେ ଅଦାଲତରେ ଆଶ୍ରୟ ନେବା ଏବଂ ରାୟ ଆସିବା ପରେ ପୁଣି ଥରେ ଖଣି ଚଲାଇବାକୁ ପ୍ରସ୍ତୁତି ଆରମ୍ଭ ହୋଇଛି। ହେଲେ ଏଥର ଚିଠି ନମ୍ବର ୦୭୪୧ତା୧୪/୧୧/୨୨ରିଖରେ ଦିଆଯାଇଥିବା ବିଜ୍ଞପ୍ତିରେ ଲଘୁ ଖଣିଜ ପଦାର୍ଥର ପରିଚାଳନା ଦାୟିତ୍ୱ ଇସ୍ପାତ ଓ ଖଣି ବିଭାଗକୁ ହସ୍ତାନ୍ତର କରାଯାଇଥିଲା।
ଯେଉଁ ଜିଲାରେ ଖଣି ଅଧିକାରୀ ନିଯୁକ୍ତ ଥିବେ ସେଠାରେ ତାଙ୍କୁ ଏହାର ପରିଚାଳନା ଦାୟିତ୍ୱ ପ୍ରଦାନ ପାଇଁ ବିଜ୍ଞପ୍ତିରେ ଉଲ୍ଲେଖ କରାଯାଇଥିଲା। ଯଦି କୋଣସି ଜିଲାରେ ଖଣି ଅଧିକାରୀ ନାହାନ୍ତି ତେବେ ଅଧିକାରୀ ନିଯୁକ୍ତି ପର୍ଯ୍ୟନ୍ତ ସମସ୍ତ ଖଣି ଜିଲାପାଳ, ବନ ସଂରକ୍ଷକ, ରାଜସ୍ବ ବିଭାଗ ଅଧିକାରୀ ଏହାର ତଦାରଖ କରିବାକୁ କୁହାଯାଇଥିଲା। ଏ ପର୍ଯ୍ୟନ୍ତ ବାଲେଶ୍ୱର ଜିଲାରେ କୌଣସି ଖଣି ଅଧିକାରୀ ନିଯୁକ୍ତ ହୋଇ ନ ଥିବା ବେଳେ ଖଣି ଲୁଟେରାମାନେ ଖଣି ଚଳାଇବାକୁ ଅନୁମତି ମିଳିଥିବା ଏକ ଗୁଜବ ସୃଷ୍ଟି କରି ରୀତିମତ ଚୋରି କାର୍ଯ୍ୟରେ ଲାଗି ପଡିଛନ୍ତି।
ଏ ସମ୍ପର୍କରେ ତହସିଲଦାର ପ୍ରଶାନ୍ତ କୁମାର ମହାରଣାଙ୍କୁ ପଚାରିବାରେ କେବଳ ପ୍ରସ୍ତୁତି ଚାଲିଛି ହେଲେ ଖଣି ଚଳାଇବାକୁ କୌଣସି ଚିଠି ତାଙ୍କ ପାଖରେ ନାହିଁ। ଖଣିଚୋରି ସମ୍ପର୍କରେ ଖବର ପାଇ ରାତିରେ ପାହାଡରେ ପହଞ୍ଚିବା ପୂର୍ବରୁ ଆଗୁଆ ସୂଚନା ପାଇ ଖଣି ଚୋରମାନେ ଖସି ପଳାଉଥିବା ସେ କହିଛନ୍ତି।
ଉତ୍କଳବନ୍ଧୁ ପଣ୍ଡା
