ଖଣ୍ଡପଡ଼ା,୩ା୨(ସ୍ବ.ପ୍ର.): ଖଣ୍ଡପଡ଼ା ବିଦ୍ୟୁତ୍ ଉପଖଣ୍ଡ ଅଧୀନରେ ଥିବା ଏକାଧିକ ଟ୍ରାନ୍ସଫର୍ମର ଓ ସବ୍ଷ୍ଟେଶନ ବିପଦସଙ୍କୁଳ ଅବସ୍ଥାରେ ରହିଛି । ଟିପିସିଓଡିଏଲର ଖାମଖିଆଲ ମନୋଭାବ ଯୋଗୁ ଉକ୍ତ ଟ୍ରାନ୍ସଫର୍ମରଗୁଡ଼ିକ ଖୋଲା ପଡ଼ିଛି । ଟ୍ରାନ୍ସଫର୍ମର ଏବଂ ସବ୍ଷ୍ଟେଶନ ଚତୁଃପାର୍ଶ୍ୱରେ ସୁରକ୍ଷା ପ୍ରାଚୀର ନିର୍ମାଣ କରାଯାଉନାହଁି । ଫଳରେ ବିଦ୍ୟୁତ୍ ସଂସ୍ପର୍ଶରେ ଆସି ଜୀବନହାନୀ ଘଟିବାର ଆଶଙ୍କା ରହିଛି ।
ଖଣ୍ଡପଡ଼ା ଓ କଣ୍ଟିଲୋର ବିଭିନ୍ନ ଅଞ୍ଚଳକୁ ବିଦ୍ୟୁତ୍ ସେବା ଯୋଗାଇବା ଲକ୍ଷ୍ୟରେ ଦୀର୍ଘ ୫୦ ବର୍ଷ ହେବ ଜନବସତି ନିକଟ ଏବଂ ରାସ୍ତାପାର୍ଶ୍ୱରେ ସବ୍ଷ୍ଟେଶନ ସ୍ଥାପନ କରାଯାଇଛି । ନିୟମାନୁସାରେ ଖୋଲାରେ ଥିବା ସବ୍ଷ୍ଟେଶନ ଓ ଟ୍ରାନ୍ସଫର୍ମର ଚତୁଃପାର୍ଶ୍ୱରେ ସୁରକ୍ଷା ପ୍ରାଚୀର କିମ୍ବା ତାର ବାଡ ନିର୍ମାଣ ହେବା କଥା । ସେହିପରି ବିଦ୍ୟୁତ୍ ସରବରାହ ହେଉଥିବା ୩ ଫେଜ୍ ଜୀବନ୍ତ ତାରଗୁଡ଼ିକ ଭୂମିପତନଠାରୁ ମାତ୍ର ୩ରୁ ୪ଫୁଟ ଉଚ୍ଚରେ ଖୋଲାରେ ରହିଥିବାରୁ ସର୍ବଦା ବିପଦ ଲାଗି ରହିଛି ା ବିଶେଷ କରି ଖଣ୍ଡପଡ଼ା କୋର୍ଟ ଓ ତହସିଲ କାର୍ଯ୍ୟାଳୟ ନିକଟରେ ଥିବା ୧୦୦ କେଭିର ୨ଟି ଟ୍ରାନ୍ସଫର୍ମର ଓ ସବ୍ଷ୍ଟେଶନ ଫାଙ୍କା ଅବସ୍ଥାରେ ରହିଛି । ପ୍ରତ୍ୟେହ ବିଭିନ୍ନ କାର୍ଯ୍ୟରେ ତହସିଲ ଓ କଚେରୀକୁ ଲୋକମାନେ ଆସୁଛନ୍ତି। ସାମାନ୍ୟ ଅସାବଧାନ ହେଲେ ଜୀବନ ଚାଲିଯିବାର ଆଶଙ୍କା ରହିଛି । ଅପରପକ୍ଷେ ସେହି ରାସ୍ତା ଦେଇ ଶତାଧିକ ଗୋରୁ ଚଳପ୍ରଚଳ କରୁଛନ୍ତି। ସେହି ଗୋରୁମାନେ ବି ବିଦ୍ୟୁତ୍ ଆଘାତରେ ପ୍ରାଣ ହରାଇବାର ଭୟ ରହିଛି । ଖଣ୍ଡପଡ଼ା ବ୍ଳକ ଅଧୀନ ଉମାଦେବୀ ଛକ, ଦୋସନ୍ଧି ସାହି, ରଥଗଡ଼ା ଛକ, କାଦୁଆ ସାହି, ଥାନା ପାଖ, ଗଉଡ଼ ସାହି, କୁମ୍ଭାରସାହି, କୁନ୍ଦୁରା ସାହି, ହରିଜନ ସାହି, ରାମଚନ୍ଦ୍ର ଉଚ୍ଚ ବିଦ୍ୟାଳୟ ପାଖ, ନୂଆପୋଖରୀ ପାଖ, ମଠସାହି, କଚେରୀପାଖ, ଗଡ଼ଭିତର ସାହି, ବାଇପାସ୍ ରାସ୍ତା ପାର୍ଶ୍ୱ, ଫାୟାର ଷ୍ଟେଶନ ପାଖ, ମଧୁବନ ସାହି, ଗିରି ହନୁମାନ ମନ୍ଦିର ପାଖ, ନୂଆସାହାସପୁର, ତୁଳସୀବାରି, ଟିଙ୍କଚୁଆ, କଳସପଲ୍ଲୀ, କରଡ଼ାବଣି, ଶାଳବଣି, ମେଡିକାଲ, ଡାକଘର ଓ ଖଣ୍ଡପଡ଼ା ମହିଳା ମହାବିଦ୍ୟାଳୟ ନିକଟରେ ଥିବା ଏସବୁ ସବ୍ଷ୍ଟେଶନ ତଥା ଟ୍ରାନ୍ସଫର୍ମର ଚାରିପାଖରେ କୌଣସି ସୁରକ୍ଷା ପ୍ରାଚୀର ନାହିଁ ବୋଲି ଅଭିଯୋଗ ହୋଇଛି । ଏ ସମ୍ପର୍କରେ ଖଣ୍ଡପଡ଼ା ଉପଖଣ୍ଡ ସହକାରୀ ଯନ୍ତ୍ରୀ ଅନୀଲ କୁମାର ସାହୁଙ୍କ ସହ ଯୋଗାଯୋଗ କରାଯାଇଥିଲା । ସେ କହିଛନ୍ତି, ସମସ୍ତ ବିଦ୍ୟୁତ୍ ସବ୍ଷ୍ଟେଶନ ଚାରିପାଖରେ ସୁରକ୍ଷା ପ୍ରାଚୀର ନିର୍ମାଣ ପର୍ଯ୍ୟାୟ କ୍ରମେ କରାଯିବ । ଅଧିକ ବିପଦ ସଙ୍କୁଳ ଅବସ୍ଥାରେ ଥିବା ସବ୍ଷ୍ଟେଶନ ପ୍ରତି ପ୍ରଥମେ ପଦକ୍ଷେପ ନିଆଯିବ ।
