ନୂଆଦିଲ୍ଲୀ,୨ା୧: ଷ୍ଟକ୍ହୋମ ଇଣ୍ଟରନ୍ୟାଶନାଲ ପିସ୍ ରିସର୍ଚ୍ଚ ଇନଷ୍ଟିଚ୍ୟୁଟ୍ (SIPRI)ର ସଦ୍ୟତମ ରିପୋର୍ଟ ଅନୁଯାୟୀ, ବିଶ୍ୱ ଅସ୍ତ୍ରଶସ୍ତ୍ର ବାଣିଜ୍ୟ ଉପରେ ଆଲୋକପାତ କରିଛି। ରିପୋର୍ଟ ଅନୁଯାୟୀ, ୨୦୨୦ରୁ ୨୦୨୪ ମଧ୍ୟରେ ୟୁକ୍ରେନ ବିଶ୍ୱର ସର୍ବବୃହତ ଅସ୍ତ୍ରଶସ୍ତ୍ର ଆମଦାନୀକାରୀ ଦେଶ ହୋଇଥିବାବେଳେ ଭାରତ ଦ୍ୱିତୀୟ ସ୍ଥାନରେ ଥିଲା।
ରିପୋର୍ଟ ଅନୁଯାୟୀ, ଏହି ସମୟ ମଧ୍ୟରେ ୟୁକ୍ରେନ ବିଶ୍ୱର ମୋଟ୍ ଅସ୍ତ୍ରଶସ୍ତ୍ର ଆମଦାନୀର ୮.୮ ପ୍ରତିଶତ କିଣିଥିଲା। ଫେବୃଆରୀ ୨୦୨୨ରେ ଆରମ୍ଭ ହୋଇଥିବା ରୁଷିଆ ସହିତ ଯୁଦ୍ଧ ପରେ, ୟୁକ୍ରେନକୁ ଏକ ବଡ଼ ସାମରିକ ପୁନଃ ଯୋଗାଣ ଆବଶ୍ୟକ ଥିଲା। ଯୁଦ୍ଧ ପୂର୍ବରୁ ୟୁକ୍ରେନର ଅସ୍ତ୍ରଶସ୍ତ୍ର ଆମଦାନୀ ସୀମିତ ଥିଲା, କିନ୍ତୁ ସଂଘର୍ଷ ପରେ, ଏହା ଆମେରିକା, ଜର୍ମାନୀ ଏବଂ ପୋଲାଣ୍ଡ ସମେତ ୩୫ରୁ ଅଧିକ ଦେଶରୁ ଅସ୍ତ୍ରଶସ୍ତ୍ର ଆମଦାନୀ କରିଥିଲା। ଏହି ଆମଦାନୀର ସର୍ବାଧିକ ଅଂଶ ଆମେରିକାର ଥିଲା।
ରିପୋର୍ଟ ଅନୁଯାୟୀ, ଭାରତ ବିଶ୍ୱ ଅସ୍ତ୍ରଶସ୍ତ୍ର ଆମଦାନୀର ୮.୩ ପ୍ରତିଶତ ଅଂଶ ସହିତ ଦ୍ୱିତୀୟ ସ୍ଥାନରେ ରହିଛି। ଗୁରୁତ୍ୱପୂର୍ଣ୍ଣ କଥା ହେଉଛି, ଭାରତ କୌଣସି ବଡ଼ ଯୁଦ୍ଧରେ ସାମିଲ ନ ହେବା ସତ୍ତ୍ୱେ, ଏହାର ସୁରକ୍ଷା ଆବଶ୍ୟକତା ପୂରଣ କରିବା ପାଇଁ ଅସ୍ତ୍ରଶସ୍ତ୍ର କ୍ରୟ କରୁଛି। ଭାରତର ପ୍ରମୁଖ ଅସ୍ତ୍ରଶସ୍ତ୍ର ଯୋଗାଣକାରୀଙ୍କ ମଧ୍ୟରେ ରୁଷିଆ, ଫ୍ରାନ୍ସ ଏବଂ ଇସ୍ରାଏଲ ଅନ୍ତର୍ଭୁକ୍ତ। ରିପୋର୍ଟ ଏହା ମଧ୍ୟ କହିଛି ଯେ, ଭାରତ ସ୍ବଦେଶୀ ଅସ୍ତ୍ରଶସ୍ତ୍ର ଉତ୍ପାଦନ ଦିଗରେ ଦ୍ରୁତଗତିରେ ଅଗ୍ରଗତି କରୁଥିବାରୁ ପୂର୍ବ ବର୍ଷ ତୁଳନାରେ ଭାରତର ଆମଦାନୀ ହ୍ରାସ ପାଇଛି।
ରିପୋର୍ଟରେ କୁହାଯାଇଛି ୨୧୦୫-୧୯ ପର୍ଯ୍ୟନ୍ତ ଭାରତର ଅସ୍ତ୍ରଶସ୍ତ୍ର ଆମଦାନୀ ପ୍ରାୟ ୯ ପ୍ରତିଶତ ହ୍ରାସ ପାଇଛି। ଏହା ଭାରତର ବର୍ଦ୍ଧିତ ଘରୋଇ ପ୍ରତିରକ୍ଷା ଉତ୍ପାଦନ କ୍ଷମତା ଯୋଗୁ ହୋଇଛି। ବ୍ରହ୍ମୋସ କ୍ଷେପଣାସ୍ତ୍ର, ତେଜସ ଯୁଦ୍ଧ ବିମାନ ଏବଂ ଆଧୁନିକ ତୋପ ପ୍ରଣାଳୀ ଏହାର ଉଦାହରଣ।
କାତାର ତୃତୀୟ ସ୍ଥାନରେ ଅଛି, ଯାହା ମୋଟ୍ ଅସ୍ତ୍ରଶସ୍ତ୍ର ଆମଦାନୀର ୬.୮ ପ୍ରତିଶତ ଅଟେ। ସାଉଦି ଆରବ ପରେ ପାକିସ୍ତାନ ଚତୁର୍ଥ ଏବଂ ପଞ୍ଚମ ସ୍ଥାନରେ ଅଛି। ପାକିସ୍ତାନ ମୁଖ୍ୟତଃ ଚୀନ, ତୁର୍କୀ ଏବଂ ନେଦରଲ୍ୟାଣ୍ଡସଠାରୁ ଅସ୍ତ୍ରଶସ୍ତ୍ର କିଣେ।
ରିପୋର୍ଟ ଅନୁଯାୟୀ, ତାଲିକାରେ ୟୁକ୍ରେନ ଏବଂ ଭାରତ ସହିତ ଜାପାନ, ଅଷ୍ଟ୍ରେଲିଆ, ଇଜିପ୍ଟ, ଆମେରିକା ଏବଂ କୁଏତ୍ ଅନ୍ତର୍ଭୁକ୍ତ। ଆଶ୍ଚର୍ଯ୍ୟଜନକ ଭାବରେ ସବୁଠାରୁ ବଡ଼ ଅସ୍ତ୍ର ରପ୍ତାନିକାରୀ ଆମେରିକା ମଧ୍ୟ ଅସ୍ତ୍ର ଆମଦାନୀକାରୀ ଦେଶ ତାଲିକାର ଶୀର୍ଷ ୧୦ ତାଲିକାରେ ଅନ୍ତର୍ଭୁକ୍ତ।
ରିପୋର୍ଟରେ ଏହା ମଧ୍ୟ ପ୍ରକାଶ ପାଇଛି ଯେ, ୟୁରୋପୀୟ ଦେଶଗୁଡ଼ିକ ଗତ ୪ ବର୍ଷ ମଧ୍ୟରେ ସେମାନଙ୍କର ଅସ୍ତ୍ର ଆମଦାନୀ ୧୫୫ ପ୍ରତିଶତ ବୃଦ୍ଧି କରିଛନ୍ତି। ଏହା ମୁଖ୍ୟତଃ ୟୁକ୍ରେନ ଯୁଦ୍ଧ ଏବଂ ଆଞ୍ଚଳିକ ସୁରକ୍ଷା ଚିନ୍ତାକୁ ଦାୟୀ କରିଛି।
