ରାଜକନିକା,୨୮ା୬(ଡି.ଏନ୍.ଏ.): ଡେରାଡୁନ୍ ମଶୌରୀର ନ୍ୟାଶନାଲ ଡିଫେନ୍ସ ଏକାଡେମୀରେ ଭାରତୀୟ ଯବାନଙ୍କ ବୀରତ୍ୱର ଝଲକ ସ୍ବରୂପ ମୂର୍ତ୍ତି ସ୍ଥାନ ପାଇବ। ଏହି ମୂର୍ତ୍ତି ନିର୍ମାଣ କରୁଛନ୍ତି କେନ୍ଦ୍ରାପଡ଼ା ଜିଲା ରାଜକନିକା ବ୍ଲକ ଅନ୍ତର୍ଗତ ନହୁଣି ପଞ୍ଚାୟତସ୍ଥିତ ନୂଆଗାଁରେ ତ୍ରିଲୋଚନ ବେହେରା (୩୭)। ଏ ନେଇ ଗାଁ ଓ ପରିବାରରେ ଆନନ୍ଦର ଲହରୀ ଖେଳିଯାଇଛି। ଜଣେ ପେସାଦର କାରିଗର ଭାବେ ୧୮ବର୍ଷ ଧରି ସେ ବିଭିନ୍ନ ସ୍ଥାନରେ ମୂର୍ତ୍ତି ଗଢ଼ି ଚାଲିଛନ୍ତି।
ସୂଚନାଯୋଗ୍ୟ, ତ୍ରିଲୋଚନ କୁମ୍ଭକାର ପରିବାରରେ ଜନ୍ମ ନେଇଥିବାରୁ ପିଲାଦିନୁ ଭାଲୁକୁଣୀ ଓ କଣ୍ଢେଇ ତିଆରି କରିବାରେ ସଉକ ଥିଲା। ବାପା ବୃନ୍ଦାବନ ଓ ମାଅ ଜ୍ୟୋତି ଏହି ମୂର୍ତ୍ତି ନିର୍ମାଣରେ ସହଯୋଗର ହାତ ବଢ଼ାଇଥିଲେ। ସେ ନିକଟସ୍ଥ ସପଲାଙ୍ଗ ଶ୍ରୀରାମଚନ୍ଦ୍ର ଉଚ୍ଚ ବିଦ୍ୟାଳୟରୁ ମାଟ୍ରିକ୍ ପାସ କଲାପରେ ଓଳାଭର କଲେଜରେ ବିଏ ପଢ଼ିଥିଲେ। ହେଲେ ସେତେବେଳେ ଓଡ଼ିଶାରେ ଘଟିଥିଲା ୧୯୯୯ ମହାବାତ୍ୟା। ଗରିବ ପରିବାର ହୋଇଥିବାରୁ ଖାଇବାକୁ ନ ପାଇ ତାଙ୍କୁ ଘର ଛାଡ଼ିବାକୁ ପଡ଼ିଥିଲା। ସେ ନିକଟସ୍ଥ ପେଗରପଡା ଗାଁର ନନ୍ଦ ମଉସାଙ୍କ ଘରେ ସିମେଣ୍ଟ କାରିଗର ଭାବେ ମୂର୍ତ୍ତି ଗଢ଼ୁ ଥିଲେ। ଘରର ଶୋଚନୀୟ ଅବସ୍ଥା ନିଜ ଆଖିରେ ଦେଖି ପେଟ ପୋଷିବାକୁ ସେଠାରୁ ପୁରୀ ପଳାଇଥିଲେ। ସେ ମହାପ୍ରଭୁ ଜଗନ୍ନାଥଙ୍କୁ ଦର୍ଶନ କରି ସାରିବା ପରେ ଅଠରନଳା ପାଖରେ ଥିବା ୟୁନିଭରସାଲ ଆର୍ଟ ଆଣ୍ଡ କ୍ରାଫ୍ଟରେ କିଛିଦିନ କାମ କରିଥିଲେ। ପରେ ସେ ବରହମପୁରର ଜଣେ ବନ୍ଧୁଙ୍କ ଘରେ ରହି କାମ କରୁଥିଲେ। ସେଠାରୁ ଦିଲ୍ଲୀ, ମଥୁରା, ବମ୍ବେରେ ରହି ମୂର୍ତ୍ତି ଗଢ଼ିବା କାମ ଜାରି ରଖିଥିଲେ। ତାଙ୍କ ନିଖୁଣ କାମ ଦେଖି ଲୋକେ ପ୍ରଶଂସା କରୁଥିଲେ। ଏହି ଅବସରରେ ଉତ୍ତରପ୍ରଦେଶର ଜଗତ୍ଗୁରୁ କ୍ରିପାଳିଜୀ ମହାରାଜଙ୍କ ଆଶ୍ରମରେ ପ୍ରାୟ ୧୫ ବର୍ଷ ଧରି ରହି ବିଭିନ୍ନ ମୂର୍ତ୍ତି ନିର୍ମାଣ କରିଥିଲେ। ତାଙ୍କ ସୁନାମ ଦିନକୁ ଦିନ ବଢ଼ିବାରେ ଲାଗିଲା। ଏହି ଅବସରରେ ଦିଲ୍ଲୀରେ ରହୁଥିବା ବେଳେ ୨୦୨୦ରେ ଜନୈକ ଠିକାଦାରଙ୍କ ପାଖରୁ ଭାରତୀୟ ମିଲିଟାରୀ ଏକାଡେମୀର ମୂର୍ତ୍ତି ନିର୍ମାଣ କରିବାର ଅର୍ଡର ପାଇଥିଲେ। ଏହି ସମୟରେ ଦେଶରେ କରୋନା ମହାମାରୀ ଯୋଗୁ ଲୋକେ ଆତଙ୍କିତ ହୋଇ ପଡ଼ିଥିଲେ। ମା’ବାପା ଭୟଭୀତ ହୋଇ ତାଙ୍କୁ ଗାଁକୁ ଫେରି ଆସିବାକୁ ପରାମର୍ଶ ଦେଇଥିଲେ।ଗାଁକୁ ଆସିବା ପରେ ବେକାର ହୋଇ ବୁଲୁଥିବା ୩୫ ଜଣ ଯୁବକଙ୍କୁ ଏକଜୁଟ କରି ଏକ ଟିମ୍ ଗଠନ କଲେ। ସେ ଟିମ୍ର ମୁଖ୍ୟ ହୋଇ ସେନାବାହିନୀର ଯବାନମାନଙ୍କ ବୀରତ୍ୱର ଝଲକ ମୂର୍ତ୍ତି ଗଠନ କାର୍ଯ୍ୟରେ ଲାଗି ପଡ଼ିଛନ୍ତି। ପ୍ରଥମେ ମାଟିରେ ଗଢ଼ି ତାହା ଉପରେ ପ୍ଲାଷ୍ଟର ପ୍ୟାରିସ୍ରେ ଶେଷରେ ଫାଇବରରେ କନ୍ଭର୍ଟ କରାଯିବ। ଏହି ୨୫ ମୂର୍ତ୍ତି ନ୍ୟାଶନାଲ ଡିଫେନ୍ସ ଏକାଡେମୀରେ ସ୍ଥାନ ପାଉଥିବାରୁ ଗ୍ରାମବାସୀ ଆନନ୍ଦିତ। ତ୍ରିଲୋଚନଙ୍କ ଏହି କାମ ଦେଖି ଗ୍ରାମବାସୀ କହିଛନ୍ତି, ସେ ଆମ ଗାଁର ନାଁ ଦେଶରେ ଟେକ ରଖିଥିବାରୁ ଆମେ ଗର୍ବ ଅନୁଭବ କରୁଛୁ।
