ଦେବଗଡ଼,୨୬ା୨(ଶଶାଙ୍କ ଶେଖର ଝାଙ୍କର):ଦେବଗଡ଼ ଜିଲା ରିଆମାଳ ଥାନା ଅଧୀନ ବରଡାତଇଲା ଗ୍ରାମରେ ସ୍ବାମୀ-ସ୍ତ୍ରୀ ଗଣ୍ଡଗୋଳର କରୁଣ ପରିଣତି ଦେଖିବାକୁ ମିଳିଛି। ଗଣ୍ଡଗୋଳ ପରେ ରାଗିଯାଇ ସ୍ତ୍ରୀ ବାପଘରକୁ ପଳାଇ ଥିବାବେଳେ ଘର ଭିତରେ ସ୍ବାମୀ ଆତ୍ମହତ୍ୟା କରିଥିବା ଜଣାପଡିଛି। ମୃତକ ହେଲେ ବରଡାତଇଲା ଗ୍ରାମର ଗିରେନ କାଣ୍ଡିର (୪୦)। ସୂଚନା ଅନୁଯାୟୀ ଗତ ୨୩ ତାରିଖ ମଧ୍ୟାହ୍ନ ୧୨ଟାରେ ଗିରେନ ଏବଂ ତାଙ୍କ ସ୍ତ୍ରୀ ଗଙ୍ଗା ପୂର୍ତ୍ତିଙ୍କ ମଧ୍ୟରେ କୌଣସି କଥାକୁ ନେଇ ଗଣ୍ଡଗୋଳ ହୋଇଥିଲା। ଭୟରେ ଗଙ୍ଗା ନିକଟରେ ଥିବା ନିଜ ବାପଘରକୁ ପଳାଇ ଯାଇଥିଲେ। ଗିରେନ ଘରେ ଏକୁଟିଆ ଥିବାବେଳେ ଏକ ଶାଢି ଜରିଆରେ ଘର ଭିତରେ ଝୁଲି ପଡିଥିଲେ। ମଙ୍ଗଳବାର ସନ୍ଧ୍ୟାରେ ଗଙ୍ଗା ଘରକୁ ଆସିବା ପରେ ସ୍ବାମୀଙ୍କ ମୃତଦେହ ଝୁଲୁଥିବା ଦେଖିଥିଲେ। ଏନେଇ ଅଭିଯୋଗ ହେବା ପରେ ରିଆମାଳ ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ କରିବା ସହ ମୃତଦେହ ବ୍ୟବଚ୍ଛେଦ ପାଇଁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଥିଲା। ବ୍ୟବଚ୍ଛେଦ ପରେ ପରିବାର ଲୋକଙ୍କୁ ମୃତଦେହ ହସ୍ତାନ୍ତର କରାଯାଇଛି। ଏନେଇ ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି।
Dharitri – Odisha’s No.1 Odia Daily
