ବାଲେଶ୍ୱର,୨୪।୫: ରୋଚକ ମୋଡରେ ଭୋଗରାଇ ରାଜନୀତି। ନିର୍ବାଚନକୁ ଆଉ ସପ୍ତାହେ ବାକି ଥିବାବେଳେ ଦଳଡିଆଁ କାର୍ଯ୍ୟକ୍ରମ ଏବେ ବି ଜାରି ରହିଛି। ଏହି କ୍ରମରେ ଶୁକ୍ରବାର ବିଜେଡି ଛାଡିଛନ୍ତି ଦଳର ଭେଟେରାନ ନେତା ତଥା ଭୋଗରାଇ ବିଧାୟକ ଅନନ୍ତ ଦାସଙ୍କ ଡାହାଣ ହାତ ଅଚ୍ୟୁତ ନନ୍ଦନ ଦାସ। ସାମ୍ବାଦିକ ସମ୍ମିଳନୀ କରି ସେ ଏ ସମ୍ପର୍କରେ ସୂଚନା ଦେଇଛନ୍ତି। ସେ ବିଜେଡି ପ୍ରାର୍ଥୀ ଗୌତମବୁଦ୍ଧ ଦାସଙ୍କ ମାମୁ ପୁଅ ଭାଇ ହୋଇଥିବାରୁ ବିଜେଡି ଛାଡିବା ପରେ ଆଗାମୀ ନିର୍ବାଚନ ଗୌତମଙ୍କ ପାଇଁ ଅଡୁଆ ହୋଇପାରେ ବୋଲି କୁହାଯାଉଛି।
ଭୋଗରାଇ ବିଧାୟକ ହେଉଛନ୍ତି ଅନନ୍ତ ଦାସ। ୨୦୦୪ ମସିହାରୁ ସେ ଲଗାତାର ଭାବେ ଜିତି ଆସୁଛନ୍ତି। ଦେହ ଅସୁସ୍ଥତା ଯୋଗୁ ଏଥର ସେ ତାଙ୍କ ପୁଅ ପାଇଁ ଅପିଲ କରିଥିଲେ। ଏପରିକି ନବୀନ ନିବାସ ଆସିଥିଲେ। ମାତ୍ର ଦେଖା ନ ପାଇ ଫେରି ଯାଇଥିଲେ। ତଥାପି ଭାବିଥିଲେ ତାଙ୍କ ପୁଅଙ୍କୁ ଟିକଟ ମିଳିବ। ହେଲେ ନିରାଶ ହୋଇଥିଲେ। ତାଙ୍କ ସ୍ଥାନରେ ବିଜେଡି ଗୌତମବୁଦ୍ଧ ଦାସଙ୍କୁ ପ୍ରାର୍ଥୀ କରିଥିଲା। ଯାହାକୁ ନେଇ ଅନନ୍ତଙ୍କ ସମର୍ଥକଙ୍କ ଭିତରେ ଅସନ୍ତୋଷ ପ୍ରକାଶ ପାଇଥିଲା। ଏପରିକି ଅଚ୍ୟୁତ ବିଜେଡିର ଏପରି ନିଷ୍ପତ୍ତିକୁ ବିରୋଧ କରିଥିଲେ। କିନ୍ତୁ ବିଜେଡି ଛାଡି ନ ଥିଲେ। କିନ୍ତୁ ଶୁକ୍ରବାର ସେ ବିଜେଡି ଛାଡିବା ପରେ ଗୌତମଙ୍କ ଅଡୁଆ ବଢିବ ନା ସେହି ଭୋଟ କଂଗ୍ରେସ-ଭାଜପାକୁ ଯିବ ସେ ନେଇ କଳ୍ପନାଜଳ୍ପନା ଆରମ୍ଭ ହୋଇଛି।
