ରଘୁନାଥପୁର,୯ା୯(ଡି.ଏନ.ଏ.): କେନ୍ଦ୍ର ଓ ରାଜ୍ୟ ସରକାର ଚାଷୀଙ୍କ ହିତ ପାଇଁ ବହୁବିଧି ଯୋଜନା କରୁଛନ୍ତି। ହେଲେ ପ୍ରଶାସନ ପକ୍ଷରୁ ଏହା ତୃଣମୂଳ ସ୍ତରରେ କାର୍ଯ୍ୟକାରୀ ଠିକ୍ ଭାବେ ହେଉନାହିଁ। ଗତବର୍ଷ ଅଦିନିଆ ଲଗାଣ ବର୍ଷାରେ ଜଗତ୍ସିଂହପୁର ଜିଲା ରଘୁନାଥପୁର ବ୍ଲକ ଅଞ୍ଚଳରେ ଧାନ ଫସଲ ବ୍ୟାପକ କ୍ଷତିଗ୍ରସ୍ତ ହୋଇଥିଲା। ଚଳିତବର୍ଷ ଜଳସେଚନ ସୁବିଧା ଥାଇ ସୁଧା କେନାଲରେ ପାଣି ନ ଆସିବାରୁ ରୁଆ ହୋଇଥିବା ଧାନ ଜମି ଫାଟି ଆଁ କଲାଣି। ଆଗାମୀ ୨ରୁ ୩ ଦିନ ଭିତରେ ପର୍ଯ୍ୟାପ୍ତ ବର୍ଷା ନ ହେଲେ, ପ୍ରବଳ ଖରାରେ ଧାନଗଛ ସୁଖି ମରିଯିବାର ଆଶଙ୍କା ଦେଖାଦେଇଛି। ଏଭଳି ଦେଖିବାକୁ ମିଳିଛି ବ୍ଲକ ଅନ୍ତର୍ଗତ ଚିକିଣିଆ ପଞ୍ଚାୟତ କଳାଧାରୀ ଓ ଏରଣ୍ଡପାଳ ଗଁାର ଚାଷଜମିରେ। ଦୁଇ ଗ୍ରାମର ୪୦ ଏକରରୁ ଊଦ୍ଧର୍ବ ଜମିରେ ରୁଆ ହୋଇଥିବା ଧାନ ନଷ୍ଟ ହେବାକୁ ବସିଲାଣି। ଉକ୍ତ ପଞ୍ଚାୟତର ସରପଞ୍ଚ ବିଷ୍ଣୁଚରଣ ସେଠୀଙ୍କ କହିବା ଅନୁଯାୟୀ, ୭ନଂ. ସି ଜଳସେଚିତ କେନାଲରେ ପାଣି ଆସି ଉକ୍ତ ଜମିରେ ମାଡ଼ିଥାଏ। ଉପଯୁକ୍ତ ସମୟରେ ଉକ୍ତ କେନାଲରେ କୋଡ଼ି ସଫେଇ କରା ନ ଯିବାରୁ ସେଥିରେ ଉଠିଥିବା ଅନାବନା ଗଛ ଜଳପ୍ରବାହରେ ବାଧକ ସାଜିଛି। ଫଳରେ ପାଣି ଧାନ ଜମି ପର୍ଯ୍ୟନ୍ତ ଯାଇ ପାରୁନାହିଁ। ୭ଦିନ ଭିତରେ ବର୍ଷା ହୋଇ ନ ଥିବାରୁ ଧାନ ଜମି ଶୁଖି ଆଙ୍ଗୁଳିଏ ଓସାରର ଫାଟ ହୋଇଯାଇଛି ବୋଲି ଚାଷୀ କେଦାର ନାୟକ, ଦିଲୀପ ଖୁଣ୍ଟିଆ ଓ ସଞ୍ଜୟ ବାରିକ କହିଛନ୍ତି। ସରକାରଙ୍କୁ ଜଳକର ଦେଇ ଯଦି ଏହିପରି ଅବସ୍ଥାରେ ଫସଲ ଉଜୁଡିଯାଏ ତାହା ହେଲେ ବ୍ୟାଙ୍କ, ସୋସାଇଟିରୁ ଆଣିଥିବା ଋଣ ଏବଂ ହାତଉଧାରୀ କରଜ ଟଙ୍କାକୁ କିପରି ଶୁଝିବୁ ବୋଲି ରବୀନ୍ଦ୍ର ନାୟକ, ଦେବେନ୍ଦ୍ର ନାୟକ ଓ ଭାସ୍କର ବାରିକଙ୍କ ସମେତ ବହୁ ଚାଷୀ କହିଛନ୍ତି। ଜମିକୁ ଯଦି ପାଣି ନ ମାଡେ ଧାନ ଫସଲ ଉଜୁଡିବ ସହ ଅମଳ କମିବ ବୋଲି ସେମାନେ କହିଛନ୍ତି। ଚାଷୀମାନେ ଜଳସେଚନ ବିଭାଗର ଅପାରଗତାକୁ ଦାୟି କରିବା ସହ, ଚାଷ ଉଜୁଡି ଗଲେ ଏହାର ଭରଣା କିଏ କରିବ ବୋଲି ପ୍ରଶ୍ନ କରିଛନ୍ତି। ଏ ସମ୍ପର୍କରେ ଖୁବ୍ଶୀଘ୍ର ଜିଲାପାଳଙ୍କୁ ଅଭିଯୋଗ କରାଯିବ ବୋଲି ସୋମନାଥ ପଣ୍ଡା, ଦୀପକ ବାରିକ, ରଜନୀକାନ୍ତ ନାୟକ, ଇମାନ ଲେଙ୍କା, ପ୍ରଫୁଲ୍ଲ ବାରିକ, ନିହାର ରଞ୍ଜନ ନାୟକ, ପ୍ରମୋଦ ବାରିକ ଓ ବିଶ୍ୱଜିତ ବାରିକ କହିଛନ୍ତି। ଏଥି ପ୍ରତି ଜଳସେଚନ ବିଭାଗ ଦୃଷ୍ଟି ଦେଇ ତୁରନ୍ତ କେନାଲ ସଫା କରିବା ସହ ଧାନ ତି ରୁଆ ହୋଇଥିବା ଜମିକୁ ପାଣି ଯୋଗାଇ ଦେବାକୁ ଦାବି ହୋଇଛି।
