ମହାକାଳପଡ଼ା, ୯ା୧୧(ଡି.ଏନ.ଏ.): ଚାଷର ବିକାଶ ପାଇଁ କେନ୍ଦ୍ର ଓ ରାଜ୍ୟ ସରକାର ବିଭିନ୍ନ ଯୋଜନା କାର୍ଯ୍ୟକାରୀ କରୁଛନ୍ତି। ହେଲେ ତୃଣମୂଳସ୍ତରରେ ଚାଷୀମାନଙ୍କ ପାଖରେ ଏହିସବୁ ଯୋଜନା କିଭଳି କାର୍ଯ୍ୟକାରୀ ହେଉଛି ତାହାକୁ ନେଇ ଉଠିଛି ବଡ଼ ପ୍ରଶ୍ନ। କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଉପକୂଳ ପଞ୍ଚାୟତଗୁଡ଼ିକରେ ଚାଷଜମିରେ ପାଣି ଅଭାବରୁ କ୍ଷେତରେ ଧାନ ଥୋଡ ବାହାରି ପାରୁନାହିଁ। କ୍ଷେତ ପାଖ ଦେଇ ଗୋବରୀ ନଦୀ ଶାଖା ଯୋରି ଥିବାବେଳେ ନିକଟ ଚାଷଜମିରେ ଜଳସେଚନ ପାଇଁ ସରକାରଙ୍କ ପକ୍ଷରୁ ୬ଟି ଉଠା ଜଳସେଚନ ପଏଣ୍ଟ ନିର୍ମାଣ କରାଯାଇଛି। ଲକ୍ଷ୍ୟ ଥିଲା ଉଠା ଜଳସେଚନ ପଏଣ୍ଟ ମାଧ୍ୟମରେ ମରୁଡ଼ି ପରିସ୍ଥିତିରେ ଜମିକୁ ଜଳସେଚିତ କରାଯିବ। ମାତ୍ର ବିଦ୍ୟୁତ୍ ସଂଯୋଗ ନ ଥିବାରୁ ଉଠା ଜଳସେଚନ ପଏଣ୍ଟଗୁଡିକ କାମରେ ଆସୁନାହିଁ। ବିଦ୍ୟୁତ୍ ବିଭାଗର ଖାମଖିଆଲି କାର୍ଯ୍ୟ ପାଇଁ ଧାନ କ୍ଷେତରେ ପାଣି ମାଡ଼ି ନ ପାରିବାରୁ ଚାଷ ଜମି ଫାଟି ଆଁ କଲାଣି। ଏହାର ପ୍ରତିବାଦ କରି ବ୍ଲକର ବଳିପାଳ ପଞ୍ଚାୟତର ଅନ୍ଦୁଳି, ବସାଘର, କଳପଡ଼ା ଆଦି ଗ୍ରାମର ଶହେରୁ ଅଧିକ ଚାଷୀ ଓ ଭାଗ ଚାଷୀମାନେ ଉଠା ଜଳସେଚନ ପଏଣ୍ଟ ନିକଟରେ ବିକ୍ଷୋଭ ପ୍ରଦର୍ଶନ କରିଛନ୍ତି।
ଚାଷୀ ରଞ୍ଜନ ମଲିକ, ପ୍ରବୀର ମଲିକ, ସୁରେନ୍ଦ୍ର ମଲିକ, ଅମୂଲ୍ୟ ମଲିକ, ସାଧୁ ମଲିକ, ଯଦୁ ମଲିକ, ରବୀନ୍ଦ୍ର ମଲିକ, ନୃସିଂହ ମଲିକ, ଟୁକୁନା କର, ବାବାଜୀ ସାହୁ, ଦିଲୀପ କୁମାର ମହାନ୍ତି, ବିଭୁ ରାଉତ, ବାବାଜୀ ମଲିକଙ୍କ ସମେତ ବହୁ ଚାଷୀଙ୍କ କହିବା କଥା, ଏହି ଅଞ୍ଚଳରେ ୫୦୦ ଏକରରୁ ଅଧିକ ଚାଷଜମିରେ ବର୍ଷାର ଅଭାବ ସମୟରେ ଉଠା ଜଳସେଚନ ପଏଣ୍ଟ ମାଧ୍ୟମରେ ଜଳସେଚନ ହୋଇଥାଏ। ଚଳିତବର୍ଷ ଦୁର୍ଗାପୂଜା ପରେ ବର୍ଷା ଅଭାବ ଦେଖାଯାଇଛି। ବିଭିନ୍ନ କିସମର ସଙ୍କର ଜାତୀୟ ଧାନଗୁଡ଼ିକ ଥୋଡ ବାହାରିବା ବେଳକୁ ଗଛ ମୂଳରେ ପାଣି ନାହିଁ। ଫଳରେ ଧାନ ଥୋଡ ବାହାରିପାରୁନାହିଁ। ଧାନ ଗଛଗୁଡିକ ଶୁଖିବାକୁ ବସିଲାଣି। ଉଠା ଜଳସେଚନ ପଏଣ୍ଟକୁ ବିଦ୍ୟୁତ୍ ସଂଯୋଗ ଲାଗ ବିଭାଗର ଉଚ୍ଚପଦସ୍ଥ ଅଧିକାରୀଙ୍କୁ ବହୁବାର ଅଭିଯୋଗ କରାଯାଇଥିଲେ ମଧ୍ୟ କେହି ଶୁଣୁନାହାନ୍ତି। ଯଦି ୨ ଦିନ ମଧ୍ୟରେ ଚାଷ ଜମିରେ ଜଳସେଚନ ନ ହୁଏ ତେବେ ଆମେ ବାଧ୍ୟ ହୋଇ ବିଦ୍ୟୁତ୍ ବିଭାଗ କାର୍ଯ୍ୟାଳୟ (ବାବର ସେକ୍ସନ) ସମ୍ମୁଖରେ ଧାରଣା ଦେବାକୁ ବାଧ୍ୟ ହେବୁ ବୋଲି ସ୍ଥାନୀୟ ଚାଷୀମାନେ କହିଛନ୍ତି। ଆମର ଜୀବନ ଜୀବିକା ପାଇଁ ବିଭିନ୍ନ ବ୍ୟାଙ୍କ, ମହିଳା ସ୍ବୟଂ ସହାୟିକା ଗୋଷ୍ଠୀ ପାଖରୁ ଋଣ କରି ଧାନ ଚାଷ କରିଥିଲୁ। ଯେତେବେଳେ ଆମ ବର୍ଷକର ଆହାର ବିଦ୍ୟୁତ୍ ବିଭାଗ କର୍ମଚାରୀ ପାଇଁ ଉଜୁଡ଼ି ଯାଉଛି, ସେତେବେଳେ ଆମେ ବାଧ୍ୟ ହୋଇ ବିଭିନ୍ନ ଆଇନଗତ ପନ୍ଥା ଅବଲମ୍ବନ କରିବାକୁ ପଛାଇବୁ ନାହିଁ ବୋଲି ଚେତାବନୀ ଦେଇଛନ୍ତି। ବହୁ ଚାଷୀ ଉଠା ଜଳସେଚନ ପଏଣ୍ଟ ନିକଟରେ ପହଞ୍ଚତ୍ ବିଦ୍ୟୁତ୍ ବିଭାଗ କର୍ମଚାରୀଙ୍କ ବିରୋଧରେ ବର୍ଶୀ ଥିଲେ। ଏ ସମ୍ପର୍କରେ ବ୍ଲକର ବାବର ବିଦ୍ୟୁତ୍ ବିଭାଗ ସେକ୍ସନ କନିଷ୍ଠ ଯନ୍ତ୍ରୀ ଚିତ୍ତରଞ୍ଜନ ସାମଲଙ୍କୁ ଯୋଗାଯୋଗ ଲାଗି ଦିନତମାମ ଫୋନ କରାଯାଇଥିଲେ ହେଁ ମୋବାଇଲ ବନ୍ଦ ରହିଥିଲା। ସରକାରଙ୍କ ଅତ୍ୟାବଶ୍ୟକ ସେବା ଯୋଗାଣକାରୀ ବିଦ୍ୟୁତ୍ ବିଭାଗ ସେକ୍ସନ କନିଷ୍ଠ ଯନ୍ତ୍ରୀଙ୍କ ମୋବାଇଲ ବନ୍ଦ ହେବାକୁ ନେଇ ଉଠିଛି ବଡ଼ ପ୍ରଶ୍ନ। ଏହାକୁ ନେଇ ବୁଦ୍ଧିଜୀବୀ ମହଲରେ ଅସନ୍ତୋଷ ପ୍ରକାଶ ପାଇଛି।
