କେସିଙ୍ଗା,୪।୮(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ଅଧିନସ୍ଥ ବୋରିଆ ପଞ୍ଚାୟତ ଚିଚର୍ଲା ଗାଁ ନିକଟରେ ଥିବା ଜାତୀୟ ରାଜପଥ ୨୬ ନିକଟରେ ଥିବା ଉଦ୍ୟାନ ବିଭାଗର ନର୍ସରି ଏବେ ଶ୍ରୀହୀନ ଅବସ୍ଥାରେ ରହିଥିବା ଦେଖିବାକୁ ମିଳିଛି।
ଦୀର୍ଘ ବର୍ଷ ହେଲା ଏହି ନର୍ସରିରେ ପାଣିର ସୁବିଧା ନ ଥିବାରୁ ବିଭିନ୍ନ ଚାରା ଉପ୍ତାଦନ କ୍ଷେତ୍ରରେ ଅସୁବିଧା ହେଉଛି। ସମଗ୍ର କେସିଙ୍ଗା ବ୍ଲକର ୨୬ତି ଗ୍ରାମ ପଞ୍ଚାୟତର ଚାଷୀମାନଙ୍କୁ ପ୍ରୋତ୍ସାହନ ଯୋଗାଇଦେବା ଉଦ୍ଦେଶ୍ୟରେ ସରକାରଙ୍କ ପକ୍ଷରୁ ଚିଚର୍ଲା ନିକଟରେ ୨୦।୯।୧୯୯୫ ମସିହାରେ ଏକ ଅଫିସ କୋଠା ନିର୍ମାଣ କରାଯାଇଥିଲା।
ଏହାକୁ ତତ୍କାଳୀନ ଜିଲାପାଳ ଜି. ସୁବର୍ଣା ରାଣୀ ଉଦଘାଟନ କରିଥିଲେ। ପରେ ଏହି ନର୍ସରୀ ମଧ୍ୟରେ ବିଭିନ୍ନ ପ୍ରକାରର ଫୁଲ, ଫଳ, ଚାରାରୋପଣ କରାଯାଉଥିଲା। ଏଠାରୁ ପଞ୍ଚାୟତ ଅଞ୍ଚଳ ତଥା ବ୍ଲକ ଓ ବ୍ଲକ ବାହାରକୁ ମଧ୍ୟ ଚାରାଗୁଡ଼ିକ ଚାଷୀମାନଙ୍କୁ ରିହାତି ଦରରେ ଯୋଗାଇ ଦିଆଯାଉଥିଲା।
ସେ ସମୟରେ କିଛି ବର୍ଷ ଗଲାପରେ ନର୍ସରୀଟି ସୌନ୍ଦର୍ଯ୍ୟମୟ ପରିବେଶ ସୃଷ୍ଟି ହୋଇଥିଲା l ଏଣୁ
ଅଞ୍ଚଳ ତଥା ଆଖପାଖ ଅଞ୍ଚଳରୁ ପ୍ରତ୍ୟେକ ଦିନ ଲୋକମାନେ ଫୁଲ ଫଳ ଗଛ କିଣି ଆସିବା ଏବଂ ପରିଭ୍ରମଣ ପାଇଁ ସକାଳ ସମୟ ଓ ସନ୍ଧ୍ୟାରେ ଆସୁଥିଲେ l ଏହି ନର୍ସରିଟି ଏଥିପାଇଁ ବ୍ଲକ ତଥା ଜିଲ୍ଲା ମଧ୍ୟରେ ବେଶ ନନ୍ଦନବନ ନାମରେ ପରିଚିତ ହୋଇଥିଲା l କିନ୍ତୁ ଏହି ନନ୍ଦନବନ ଆଜି ଶ୍ରୀହୀନ ଅବସ୍ଥାରେ ପଡ଼ିରହିଛି l ହେଲେ କାଳକ୍ରମେ କଣ ହେଲା କେଜାଣି ଧୀରେ ଧୀରେ ଜରାଜୀର୍ଣ୍ଣ ଅବସ୍ଥାକୁ ଚାଲି ଆସିଯାଇଛି। ଏଠାରେ ନିୟୋଜିତ କର୍ମଚାରୀଙ୍କ ଦେଖା ଦେଖା ଦର୍ଶନ ମଧ୍ୟ ମିଲୁ ନାହିଁ।
ଅପରପକ୍ଷେ ଗତ କିଛି ବର୍ଷ ତଳେ ଏଠାରେ ଏକ ଆଉ ଗୋଟିଏ ଅଫିସ ଗୃହ ନିର୍ମାଣ ହେଲା। ଏଥିରେ ଆନୁସାଙ୍ଗିକ ବ୍ୟବସ୍ଥା ରହିଛି। ସମ୍ପୃକ୍ତ ବିଭାଗ ପକ୍ଷରୁ ଜଣେ କର୍ମଚାରୀଙ୍କୁ ମଧ୍ୟ ଦିଆଯାଇଛି। କିନ୍ତୁ ଅନେକ ସମୟ ଏହି ଅଫିସରେ ତାଳା ଝୁଲୁଥିବା ଚାଷୀମାନେ ଅଭିଯୋଗ କରନ୍ତି l ଉକ୍ତ ନର୍ସରୀ ଉଭୟ ପାର୍ଶ୍ୱରେ ବାଡ଼ା ନିର୍ମାଣ କରାଯାଇଛି। ନିମ୍ନମାନର କାମ କରିଥିବା ମଧ୍ୟ ଅଭିଯୋଗ ଗ୍ରାମବାସୀ ଅଭିଯୋଗ କରିଛନ୍ତି। ଉକ୍ତ ନର୍ସରିର ଆନୁଷଙ୍ଗିକ ସାମଗ୍ରୀ ଭାଙ୍ଗି ନଷ୍ଟ ହେଲାଣି। ୩୫ କିମି ଦୂର ଭବାନୀପାଟଣାରେ ରହୁଥିବା କର୍ମଚାରୀଙ୍କ କାଁଭା ଦରକାର ପଡିଲେ ମନ ମୁତାବକ ଅଫିସ ଖୋଲା ଯାଉଥିବା ଦେଖିବାକୁ ମିଳେ l ଚାଷୀମାନେ କୌଣସି କାମ ପାଇଁ ଆସି ନିରାଶରେ ଫେରିଯାଆନ୍ତି l ଏଣୁ ଆଗାମୀ ଦିନରେ ଏହି ନର୍ସରିକୁ ପୁଣିଥରେ ପୁନଃ ଉଦ୍ଧାର କରାଗଲେ ବ୍ଲକ ଅଂଚଳର ଚାଷୀମାନେ ଉପକୃତ ହୋଇପାରନ୍ତେ l
ଏଥିପ୍ରତି ଜିଲା ପ୍ରଶାସନ ଦୃଷ୍ଟି ଦେବାକୁ ଚାଷୀ ମହଲରେ ଦାବି ହୋଇଛି । ଏ ସଂକ୍ରାନ୍ତରେ ଦାୟିତ୍ୱରେ ଅତିରିକ୍ତ ହର୍ଟିକଲଚର ଅଫିସର ପ୍ରଜ୍ଞାଶ୍ରୀ ପ୍ରିୟଦର୍ଶୀନି ସାହୁଙ୍କୁ ପଚାରିବାରୁ ରାଜ୍ୟ ଉଦ୍ୟାନ ବିଭାଗକୁ ମରାମତି ପାଇଁ ଚିଠି ପଠାଯାଇଛି। ଟଙ୍କା ଆସିଲେ ଏହି ସବୁ କରାଯିବ ବୋଲି ପ୍ରକାଶ କହିଥିଲେ।
