ମହାକାଳପଡ଼ା,୧୮ା୮ (ପ୍ରତାପ ଚନ୍ଦ୍ର ସ୍ବାଇଁ): ଭାରତ ସ୍ବାଧୀନତାର ୭୭ ବର୍ଷ ପରେ ମଧ୍ୟ ଗାଁକୁ ରାସ୍ତା ନାହିଁ ବୋଲି କହିଛନ୍ତି ଗ୍ରାମବାସୀ। ଗ୍ରାମର ଛାତ୍ରୀଛାତ୍ରମାନେ ପାଠ ପଢ଼ିବା ପାଇଁ ୨ କି.ମି. ଦୂର ନିକଟ ଉଚ୍ଚ ବିଦ୍ୟାଳୟକୁ ଯାତାୟାତ ପାଇଁ ବର୍ଷାଦିନରେ ନାହିଁ ନ ଥିବା ଅସୁବିଧା ଭୋଗୁଥିବା ଦେଖିବାକୁ ମିଳୁଛି। ପିଲାମାନେ କାଦୁଅ ପଙ୍କରେ ହାତରେ ଚପଲ, ବସ୍ତାନି ଧରି ଯାଉଛନ୍ତି। ବାଇକ୍ ଆରୋହୀମାନେ ଆଣ୍ଠୁଏ କାଦୁଅରେ ବାଇକ୍କୁ ଠେଲି ଠେଲି ନେଇ ଯାଉଥିବା ଦେଖିବାକୁ ମିଳୁଛି। ଏଭଳି ଦେଖିବାକୁ ମିଳୁଛି କେନ୍ଦ୍ରାପଡ଼ା ଜିଲା ମହାକାଳପଡ଼ା ବ୍ଲକ ଅଧୀନ ଗଡ଼ରୋମିତ-ସୋବଳା ମଧ୍ୟ ସ୍ଥଳ ଗ୍ରାମ୍ୟ ରାସ୍ତାର ଅତି ଦୟନୀୟ ଅବସ୍ଥା।
ପ୍ରତିଦିନ ଗ୍ରାମର ଶ୍ରମିକମାନେ ଦୁର୍ଦ୍ଦିନରେ ବାଇକ୍ ଯୋଗେ ପାରାଦୀପ ଶିଳ୍ପ କାରଖାନାକୁ ଯାତାୟାତ କରୁଛନ୍ତି। ତେବେ ଗ୍ରାମର ୪୦ରୁ ଅଧିକ ଛାତ୍ରୀଛାତ୍ର ଏହି କାଦୁଅ ପଙ୍କ ରାସ୍ତା ପାରହୋଇ ଗଡ଼ରୋମିତସ୍ଥିତ ଚମ୍ପକେଶ୍ୱର ସରକାରୀ ଉଚ୍ଚ ବିଦ୍ୟାଳୟକୁ ଅଧ୍ୟୟନ କରିବାକୁ ଯାଇଥାନ୍ତି। ତେବେ ଗ୍ରାମର ୨ଟି ୱାର୍ଡ ୩୦୦ ପରିବାର ବିଶିଷ୍ଟ ୧ ହଜାରରୁ ଅଧିକ ଲୋକ ବସବାସ କରନ୍ତି। ହେଲେ ଏହି ଗ୍ରାମକୁ ଭଲ ରାସ୍ତା ନାହିଁ ଆମେ ବାଧ୍ୟ ହୋଇ କାଦୁଅରେ ବାଇକ୍ଗୁଡିକୁ ଠେଲି କି ନେଉଥିବା ରବୀନ୍ଦ୍ର ସାହୁ , ରଶ୍ମିରଞ୍ଜନ ରାଉତ, ସଦାନନ୍ଦ ସ୍ବାଇଁ ପ୍ରମୁଖ କହିଛନ୍ତି। ଆମ ଦେଶ ସ୍ବାଧୀନ ହୋଇଛି ସତ କିନ୍ତୁ ଆମେ ପାଠ ପଢ଼ିବା ପାଇଁ ଦୈନିକ ବହି ବସ୍ତାନି ବୋଝ ଧରି କାଦୁଆ ପଙ୍କପାଣିରେ ବହୁ କଷ୍ଟରେ ବିଦ୍ୟାଳୟ ଯାଉଛୁ ବୋଲି ଗାଁର ଛାତ୍ରୀଛାତ୍ରମାନଙ୍କ ମଧ୍ୟରେ ପୂଜାରାଣୀ ରାଉତ, ଜଗନ୍ନାଥ ରାଉତ, ଲିପ୍ସାରାଣୀ ସ୍ବାଇଁ, ଅବିନାଶ ସ୍ବାଇଁ, ରକି ବେହେରା ଓ ପୂଜାରାଣୀ ଦାସଙ୍କ ସମେତ ଅନ୍ୟ ପିଲାମାନେ କହିଛନ୍ତି। ଗ୍ରାମର ସୂର୍ଯ୍ୟକାନ୍ତ ସେଠୀଙ୍କ କହିବା କଥା ଏହି କାଦୁଅ ରାସ୍ତାକୁ ପାରହେବା ପାଇଁ ଘଣ୍ଟାଏ ସମୟ ଲାଗେ। ନିର୍ବାଚନ ପୂର୍ବରୁ ଠିକାଦାରମାନେ ମୁଠାଏ ମୁଠାଏ ଗୋଡ଼ି, ବାଲି, ଡଷ୍ଟ ଛିଞ୍ଚତ୍ ଦେଇ କାମ ସାରି ଦିଅନ୍ତି। ନିର୍ବାଚନ ସରିଲେ ଉକ୍ତ କାଦୁଅ ରାସ୍ତା ଅବସ୍ଥା ବଦଳେ ନାହିଁ। ଏ ସଂକ୍ରାନ୍ତରେ ବିଡିଓ ସାଗର କୁମାର ନନ୍ଦଙ୍କୁ ପଚାରିବାରେ ସୋବଳା ଗାଁ ରାସ୍ତା ସମସ୍ୟା ନଜରକୁ ଆସିଛି। ପ୍ରଶାସନ ପକ୍ଷରୁ ଖୁବ୍ଶୀଘ୍ର ରାସ୍ତା ପୁନରୁଦ୍ଧାର କରାଯିବ ବୋଲି ସେ କହିଛନ୍ତି।
