ଡେରାବିଶ,୩୦ା୧୧(ବେବର୍ତ୍ତା ଅଜୟ ଦାସ)କେନ୍ଦ୍ରାପଡ଼ା କେନ୍ଦ୍ରୀୟ ବିଦ୍ୟାଳୟକୁ ରାସ୍ତା ନାହିଁ। ଦୁର୍ଦ୍ଦଶା ଭୋଗୁଛନ୍ତି ଛାତ୍ରୀଛାତ୍ର। ଶିକ୍ଷାର ସମୃଦ୍ଧି ପାଇଁ କେନ୍ଦ୍ର ସରକାରଙ୍କ ପକ୍ଷରୁ କେନ୍ଦ୍ରାପଡ଼ା ଜିଲା ଅନ୍ତର୍ଗତ ଡେରାବିଶ ବ୍ଲକ ବାରିମୂଳଠାରେ ୨୦୧୦ରେ ପ୍ରତିଷ୍ଠା ହୋଇଛି କେନ୍ଦ୍ରୀୟ ବିଦ୍ୟାଳୟ। ୫ ଏକର ପରିମିତ ଏହି ବିଦ୍ୟାଳୟରେ ବାଲବାଟିକା-୩ଠାରୁ ଦ୍ୱାଦଶ ଶ୍ରେଣୀ ଯାଏ ରହିଥିବା ବେଳେ ବର୍ତ୍ତମାନ ଛାତ୍ରୀଛାତ୍ରଙ୍କ ସଂଖ୍ୟା ୯୯୬।ବିଦ୍ୟାଳୟ ପାଇଁ ସରକାରଙ୍କ ପକ୍ଷରୁ ଆବଶ୍ୟକ ଭିତ୍ତିଭୂମି ଥିବା ବେଳେ ରାସ୍ତାଟିଏ ନ ଥିବାରୁ ଛାତ୍ରୀଛାତ୍ରମାନେ ଦୈନିକ ଆସୁଥିବା ଯାନବାହାନରୁ ଓହ୍ଲାଇ ଅଧ କି.ମି. ଚାଲିବାକୁ ପଡ଼ୁଛି।
କେନ୍ଦ୍ରାପଡ଼ା -ଇନ୍ଦପୁର ରାସ୍ତାର ପାର୍ଶ୍ୱରେ ଅବସ୍ଥିତ ଏହି ବିଦ୍ୟାଳୟ ଦେଇ ବାରିମୂଳ ଜେଲ୍କୁ ଯାଇଥିବା ଏକ ଅଣଓସାରିଆ ପୁରୁଣା ରାସ୍ତାକୁ ବ୍ୟବହାର କରୁଛନ୍ତି ବିଦ୍ୟାଳୟ କର୍ତ୍ତୃପକ୍ଷ। ଏହି ବିଦ୍ୟାଳୟରେ ଅଧ୍ୟୟନରତ ଛାତ୍ରୀଛାତ୍ରମାନଙ୍କୁ ନେଇ ଆସୁଥିବା ବିଭିନ୍ନ ଯାନବାହାନ ବିଦ୍ୟାଳୟ ନିକଟକୁ ଯାଇ ନ ପାରି କେନ୍ଦ୍ରାପଡ଼ା-ଇନ୍ଦୁପର ରାସ୍ତାର ବାରିମୂଳ ଛକଠାରେ ଉଭୟ ପାର୍ଶ୍ୱରେ ରହିବାକୁ ପଡ଼ୁଛି। ଫଳରେ ଏହି ରାସ୍ତା ଦେଇ ଯାଉଥିବା ଯାନବାହାନ ପାଇଁ ଟ୍ରାଫିକ ସମସ୍ୟା ଉତ୍କଟ ହେବାରେ ଲାଗିଛି। ଅନ୍ୟପକ୍ଷେ ବିଦ୍ୟାଳୟ ଦେଇ ଯାଇଥିବା ବାରିମୂଳ ଜେଲ୍ ରାସ୍ତାରେ ଜେଲକୁ ଯାଉଥିବା ବିଭିନ୍ନ ଯାନବାହାନ ପିଲାଙ୍କ ପାଇଁ ଘୋର ସମସ୍ୟା ସୃଷ୍ଟି କରିଛି। ଏପରି କି ଜେଲ୍ ରାସ୍ତାରେ ବଡ଼ବଡ଼ ଚାଖୁଣ୍ଡା ଗଛ ଥିବାରୁ ଛାତ୍ରୀଛାତ୍ରଙ୍କୁ ନେଇ ଆସୁଥିବା ବିଦ୍ୟାଳୟ ବସ୍ ଇନ୍ଦୁପୁର ରାସ୍ତାରେ ଅଟକିବାକୁ ପଡ଼ୁଛି ା ଗାଡ଼ିରୁ ଓହ୍ଲାଇ ପିଲାମାନେ ଚାଲିଚାଲି ଆସୁଛନ୍ତି।
କେବଳ ସେତିକି ନୁହେଁ କେନ୍ଦ୍ର ସରକାରଙ୍କ ଶିକ୍ଷା ବିଭାଗ ପକ୍ଷରୁ ଛାତ୍ରୀଛାତ୍ରଙ୍କ ପାଇଁ ଦିଲ୍ଲୀ ଓ ଭୁବନେଶ୍ୱରରୁ ଆସୁଥିବା ପ୍ରଦର୍ଶନୀ ବସ୍ ମଧ୍ୟରେ ବିଜ୍ଞାନ, ଓ ବୈଷୟିକ ଜ୍ଞାନକୌଶଳ ବିଦ୍ୟାଳୟ ପରିସର ମଧ୍ୟକୁ ଯାଇ ନ ପାରି ଇନ୍ଦୁପୁର ରାସ୍ତା ଉପରେ ପ୍ରଦର୍ଶିତ ହେଉଛି। ଏହି ପ୍ରଦର୍ଶନୀ ଦେଖିଇବା ପାଇଁ ବିଦ୍ୟାଳୟର ଶିକ୍ଷକମାନେ ଛାତ୍ରୀଛାତ୍ରମାନଙ୍କୁ ଇନ୍ଦୁପୁର ରାସ୍ତା ନିକଟକୁ ଆଣିଥାନ୍ତି। ଫଳରେ ଛାତ୍ରୀଛାତ୍ର ଓ ଅଭିଭାବକ ମହଲରେ ଏ ନେଇ ତୀବ୍ର ଅସନ୍ତୋଷ ଦେଖାଦେଇଛି। ତେବେ ଏହି ବିଦ୍ୟାଳୟକୁ ବାରିମୂଳ ପଞ୍ଚାୟତ କାର୍ଯ୍ୟାଳୟଠାରୁ ମାତ୍ର ୫୦୦ ମିଟର ରାସ୍ତା ନିର୍ମାଣ କରାଗଲେ ସମସ୍ୟା ସମାଧାନ ହୋଇପାରନ୍ତା ବୋଲି ବରିଷ୍ଠ କଂଗ୍ରେସ ନେତା ଜୟନ୍ତ ମୁଖାର୍ଜୀ କହିଛନ୍ତି। ମୁଖାର୍ଜୀଙ୍କ ସୂଚନା ଅନୁଯାୟୀ, ଏହି ୫୦୦ ମିଟର ରାସ୍ତା ଆଗରୁ ମଧ୍ୟ ରହିଛି ା ମାତ୍ର ନିର୍ମାଣ ଓ ରକ୍ଷଣାବେକ୍ଷଣ ଅଭାବରୁ ରାସ୍ତାଟି ଅନାବନା ଜଙ୍ଗଲରେ ଭର୍ତ୍ତି ହୋଇଯାଇଛି ା କେନ୍ଦ୍ରୀୟ ବିଦ୍ୟାଳୟ ଅଧ୍ୟକ୍ଷ ଶଶିକୌଶଳଙ୍କୁ ପଚାରିବାରୁ ସେ କହିଲେ ଛାତ୍ରୀଛାତ୍ରଙ୍କ ଶିକ୍ଷାଦାନ ବ୍ୟବସ୍ଥା ପ୍ରତି ଏହି ବିଦ୍ୟାଳୟ ଗୁରୁତ୍ୱ ଦେଇଆସିଛି ା ଶିକ୍ଷା ବ୍ୟବସ୍ଥା କିପରି ସମୃଦ୍ଧ ହେବ ସେନେଇ ସେ ଓ ଅନ୍ୟଶିକ୍ଷକମାନେ ନିଷ୍ଠାପର ଉଦ୍ୟମ ଜାରି ରଖିଛନ୍ତି ା ହେଲେ ରାସ୍ତା ସମସ୍ୟା ଚିନ୍ତାର କାରଣ ହୋଇଛି ା ଏ ବିଷୟରେ ବାରିମୂଳ ସରପଞ୍ଚ କଳ୍ପନା ବେହେରାଙ୍କୁ ପଚାରିବାରୁ ସେ କହିଲେ ଏହି ରାସ୍ତା ନିର୍ମାଣ ପାଇଁ ଏମ୍ଜିଏନ୍ଆରଇଜିଏସ୍ ଯୋଜନାରେ ଡେରାବିଶ ବିଡ଼ିଓ ଓ ପିଡ଼ିଙ୍କୁ ପଞ୍ଚାୟତ ପକ୍ଷରୁ ବାରମ୍ବାର ଅନୁରୋଧ କରାଯାଇଛି ା ଅର୍ଥ ମଞ୍ଜୁର ହେଲେ ଏହି ରାସ୍ତା ନିର୍ମାଣ ହେବ ବୋଲି ସରପଞ୍ଚ ବେହେରା କହିଥିଲେ ା ଏ ବିଷୟରେ ବିଡ଼ିଓ ଦାଶରଥି ଜେନାଙ୍କୁ ଯୋଗାଯୋଗ କରାଯାଇଥିଲା ା ସେ କହିଲେ ଏହି ରାସ୍ତା ନିର୍ମାଣ ପାଇଁ ପଦକ୍ଷେପ ନିଆଯାଉଛି।
