ନୂଆଗାଁ,୩୦।୧୦ (ଧନେଶ୍ୱର ସାହୁ): ସରକାରୀ କର୍ମଚାରୀମାନଙ୍କ ପାଇଁ କ୍ୱାର୍ଟର୍ସ ରହିଛି। ନିଜ କାର୍ଯ୍ୟକ୍ଷେତ୍ର ନିକଟରେ ସରକାରୀ କର୍ମଚାରୀଙ୍କ ରହିବାର ବ୍ୟବସ୍ଥା କରାଯାଇଛି। ଏଥିପାଇଁ ସରକାର ଲକ୍ଷାଧିକ ଟଙ୍କା ବ୍ୟୟ କରୁଛନ୍ତି। କିନ୍ତୁ କେତେଜଣ କର୍ମଚାରୀ ଏହାର ଫାଇଦା ନେବା ବଦଳରେ ସେହି କ୍ୱାର୍ଟର୍ସର ଦୁଆର ମାଡ଼ୁ ନାହାନ୍ତି ।ଏହାକୁ ନେଇ ନୟାଗଡ଼ ଜିଲା ନୂଆଗାଁ ବ୍ଲକ କାପ୍ତାପଲିଠାରେ ଥିବା ମକରାପଲି ବନରକ୍ଷୀଙ୍କ କ୍ୱାର୍ଟର୍ସକୁ ନେଇ ବିବାଦ ଆରମ୍ଭ ହୋଇଛି । କ୍ୱାର୍ଟର୍ସ ନିର୍ମାଣ କରାଯାଇଥିଲେ ମଧ୍ୟ ବନରକ୍ଷୀ କ୍ୱାର୍ଟର୍ସରେ ରହୁ ନ ଥିବା ଅଭିଯୋଗ ହେଉଛି।
ନୟାଗଡ଼ ବନଖଣ୍ଡ ମହିପୁର ବନାଞ୍ଚଳ ଓ ଓଡ଼ଗାଁ ବନାଞ୍ଚଳକୁ ଲାଗି ରହିଛି ଗଞ୍ଜାମ ଜିଲା ସୀମା । ନୂଆଗାଁ ବ୍ଲକ କାପ୍ତାପଲି ପଞ୍ଚାୟତ ଓ ଓଡ଼ଗାଁ ବନାଞ୍ଚଳ ଅଧୀନରେ ଥିବା ମକରାପଲିକୁ ଘେରି ରହିଛି ବିଶାଳ ଘଞ୍ଚ ଜଙ୍ଗଲ । ସେହି ଜଙ୍ଗଲରେ ପୂରି ରହିଛି ଶାଳ, ପିଆଶାଳ, କୁରୁମ, ଶିଶୁ ଭଳି ଅନେକ ମୂଲ୍ୟବାନ ଗଛ । ସେଗୁଡିକର ସୁରକ୍ଷା ପାଇଁ ବାହାଡାଝୋଲା ଫରେଷ୍ଟ ସେକ୍ସନ ଅଧୀନରେ ମକରାପଲି ବନରକ୍ଷୀଙ୍କୁ ନିୟୋଜିତ କରାଯାଇଛି । ତେଣୁ ଜଙ୍ଗଲକୁ ସୁରକ୍ଷା ଦେବା ସୁବିଧା ଦୃଷ୍ଟିରୁ ମକରାପଲି ବନରକ୍ଷୀଙ୍କ ନିମନ୍ତେ ମହିପୁର ବନାଞ୍ଚଳ ଗୁମୀ ଫରେଷ୍ଟ ସେକ୍ସନର କାପ୍ତାପଲି ବନରକ୍ଷୀ କ୍ୱାର୍ଟର୍ସ ପରିସରରେ ୨୦୨୧-୨୨ ଆର୍ଥତ୍କ ବର୍ଷରେ କାମ୍ପା ଯୋଜନାରେ ଲକ୍ଷାଧିକ ଟଙ୍କା ବ୍ୟୟରେ ଏକ କ୍ୱାର୍ଟର୍ସ ନିର୍ମାଣ କରାଯାଇଛି । ଉକ୍ତ କ୍ୱାର୍ଟର୍ସକୁ ନୟାଗଡ଼ ଡିଏଫ୍ଓ କ୍ଷମା ଷଡ଼ଙ୍ଗୀ, ଓଡ଼ଗାଁ ରେଞ୍ଜର ନିଖିଲେଶ ମଲିକ ୨୦୨୩ ଏପ୍ରିଲ ୧୩ରେ ଉଦ୍ଘାଟନ କରିଥିଲେ । ଉଦ୍ଘାଟନକୁ ୬ ମାସ ବିତି ଯାଇଥିଲେ ମଧ୍ୟ ବନରକ୍ଷୀ ସେଠାରେ ରହିବା ତ ଦୂରର କଥା ଉକ୍ତ କ୍ୱାର୍ଟର୍ସ ଦୁଆର ମାଡି ନ ଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ମକରାପଲି ଜଙ୍ଗଲ ସୁରକ୍ଷା ଦାୟିତ୍ୱରେ ଥିବା ବନରକ୍ଷୀ ବାହାଡାଝୋଲାଠାରେ ରହୁଥିବାରୁ ଏହାର ସୁଯୋଗ ନେଇ କାଠ ଚୋରା ଚାଲାଣକାରୀ ଓ ଶିକାରୀମାନେ ଅବାଧରେ ଜଙ୍ଗଲ ଲୁଟୁଛନ୍ତି ବୋଲି ସ୍ଥାନୀୟ ଲୋକମାନେ କହିଛନ୍ତି। ଅଧିକାଂଶ ସମୟରେ ମୂଲ୍ୟବାନ କାଠ ଓ ବନ୍ୟଜନ୍ତୁ ମାଂସ ବାହାଡାଝୋଲା ଆଖପାଖ ଅଞ୍ଚଳ ଓ ଗଞ୍ଜାମ ଜିଲାକୁ ରପ୍ତାନି ହେଉଥିବା ଅଭିଯୋଗ ହେଉଛି ।
ଏ ସଂକ୍ରାନ୍ତରେ ମକରାପଲି ବନରକ୍ଷୀ ସୁନୀଲ କୁମାର ନାୟକଙ୍କୁ ପଚାରିିବାରେ ସେ କ୍ୱାର୍ଟର୍ସରେ ରହୁ ନ ଥିବା ସ୍ବୀକାର କରିବା ସହ ଯେଉଁଠାରେ କ୍ୱାର୍ଟର୍ସ ନିର୍ମାଣ କରାଯାଇଛି ସେଠାରେ ମୋବାଇଲ ନେଟଓ୍ବର୍କ ନାହିଁ । ତା’ଛଡା ବାହାଡାଝୋଲାରେ ରହିଲେ ମୁଁ ଠିକ୍ ଭାବେ ନିଜ ଦାୟିତ୍ୱ ତୁଲାଇ ପାରୁଛି ବୋଲି କହିଛନ୍ତି। ମୁଁ ଏଠାରେ ନୂଆ କରି ଯୋଗ ଦେଇଛି । ଏ ବାବଦରେ ବନରକ୍ଷୀଙ୍କୁ ପଚାରି ବୁଝିବି ବୋଲି କହିଛନ୍ତି ବାହାଡାଝୋଲା ଫରେଷ୍ଟର ମନୋଜ କୁମାର ସେଠୀ । ନୟାଗଡ଼ ଡିଏଫ୍ଓ ଷଡ଼ଙ୍ଗୀ ଓ ଓଡ଼ଗାଁ ରେଞ୍ଜର ନିଖିଲେଶ ମଲିକଙ୍କୁ ଯୋଗାଯୋଗ କରିଥିଲେ ମଧ୍ୟ ସେ ଫୋନ୍ ଉଠାଇ ନ ଥିଲେ। ଡିଏଫ୍ଓଙ୍କୁ ମେସେଜ ମାଧ୍ୟମରେ ଜଣାଇଥିଲେ ମଧ୍ୟ କୌଣସି ପ୍ରତ୍ୟୁତ୍ତର ମିଳି ନ ଥିବାରୁ ତାଙ୍କ ପ୍ରତିକ୍ରିୟା ସ୍ଥାନିତ କରାଯାଇନାହିଁ।
