ସୋନପୁର/ବିନିକା,୧୩।୯(ନି.ପ୍ର./ଡି.ଏନ୍.ଏ.):ଗୁଣାତ୍ମକ ଶିକ୍ଷାଦାନ କ୍ଷେତ୍ରରେ ବୈପ୍ଳବିକ ପରିବର୍ତ୍ତନର ଲକ୍ଷ୍ୟ ନେଇ ରାଜ୍ୟ ସରକାରଙ୍କ ପକ୍ଷରୁ ଆରମ୍ଭ ହୋଇଥିବା ରୂପାନ୍ତରଣ ବା ୫-ଟି ବିଦ୍ୟାଳୟ ଯୋଜନାକୁ ସୁବର୍ଣ୍ଣପୁର ଜିଲାରେ ବିଶେଷ ସଫଳତା ମିଳିିପାରି ନାହିଁ। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଦ୍ୱିତୀୟ ପର୍ଯ୍ୟାୟରେ ଉଦ୍ଘାଟିତ ହୋଇଥିବା ଅଧିକାଂଶ ରୂପାନ୍ତରଣ ହାଇସ୍କୁଲରେ ଏପର୍ଯ୍ୟନ୍ତ କାମ ହୋଇ ପାରନାହିଁ। ବିନିକା ୫-ଟି ହାଇସ୍କୁଲ ଏହାର ନିଚ୍ଛକ ଚିତ୍ର ସାମ୍ନାକୁ ଆଣିଛି। ଜୁନ୍ ୧ ତାରିଖରେ ଏହି ରୂପାନ୍ତରିତ ହାଇସ୍କୁଲକୁ ମୁଖ୍ୟମନ୍ତ୍ରୀ ଭିଡିଓ କନ୍ଫରେନ୍ସିଂ ଯୋଗେ ଲୋକାର୍ପଣ କରିଥିଲେ। ତେବେ ଏହି ହାଇସ୍କୁଲର ନବମ ଶ୍ରେଣୀର ଛାତ୍ରଙ୍କୁ ଆଲମିରାରେ ସାହିତ୍ୟ ପଢ଼ାଯାଉଥିବା ଭଳି ଦୃଶ୍ୟ ସୋମବାର ଦେଖିବାକୁ ମିଳିଛି। ସ୍ମାର୍ଟ କ୍ଲାସରୁମ୍ରେ ସାମାନ୍ୟ କଳାପଟାଟିଏ ନାହିଁ। ଶିକ୍ଷୟିତ୍ରୀ ସ୍ମିତାରାଣୀ ଭୁଏ ଆଲମିରାରେ ପାଠ ଲେଖି ଛାତ୍ରଙ୍କୁ ବୁଝାଉଥିବା ଭିଡିଓ ଭାଇରାଲ ହୋଇଛି। ଘଟଣାକୁ ନେଇ ଛାତ୍ର ଓ ଅଭିଭାବକଙ୍କ ମହଲରେ ଅସନ୍ତୋଷ ପ୍ରକାଶ ପାଇଛି।
୧୯୫୯ରେ ସ୍ଥାପିତ ବିନିକା ହାଇସ୍କୁଲରେ ବର୍ତ୍ତମାନ ୧୧୧ଜଣ ଛାତ୍ର ପାଠ ପଢୁଛନ୍ତି। ହାଇସ୍କୁଲ ରୂପାନ୍ତରଣ ପରେ ଶିକ୍ଷାକ୍ଷେତ୍ରରେ ପରିବର୍ତ୍ତନ ଆସିବ ବୋଲି ଛାତ୍ର ଓ ଅଭିଭାବକ ଆଶା ରଖିଥିଲେ। ତେବେ ବାହାରକୁ ଚକାଚକ୍ ଦେଖାଯାଉଥିବା ଏହି ୫-ଟି ବିଦ୍ୟାଳୟଗୁଡିକର ଶିକ୍ଷା ବ୍ୟବସ୍ଥାରେ କୌଣସି ପରିବର୍ତ୍ତନ ହୋଇନାହିଁ। ୨୫ବର୍ଷର ପୁରୁଣା କୋଠାକୁ ରଙ୍ଗ ମାରି ଚକାଚକ୍ କରାଯାଇଛି। ଛାତରୁ ପାଣି ଗଳୁଥିବା କୋଠାରେ ସ୍ମାର୍ଟ କ୍ଲାସରୁମ୍ କରାଯାଇଛି। ଗତ ବର୍ଷାରେ ଏହି ସ୍ମାର୍ଟ କ୍ଲାସରୁମ୍ର ସିଲିଂ ଓଦା ହୋଇ ତଳେ ଖସି ପଡିଥିଲା। ତାର ମରାମତି ସରିନି। ଇ-ଲାଇବ୍ରେରି ଓ ବିଜ୍ଞାନାଗାରର ଲାଭ ଛାତ୍ରଙ୍କୁ ମିଳୁନି। ସେହିପରି ୩ଟି ରୁମ୍ର ପ୍ଲେଟିଂ କାମ ଏ ପର୍ଯ୍ୟନ୍ତ ସରିନି। ପାଇଖାନାରେ ଟାଇଲ ବିଛାଯାଇନି କି ପ୍ୟାନ ବସିନି। ଠିକାଦାର ସ୍କୁଲର ବେଞ୍ଚ ଡେସ୍କକୁ ବାହାରେ ପକାଇ ରଖିଛନ୍ତି। ତାହା ବାହାରେ ପଡି ରହି ବର୍ଷାରେ ଭିଜୁଛି। ଛାତ୍ରମାନେ ତଳେ ବସି ପାଠ ପଢୁଛନ୍ତି। ଶ୍ରେଣୀ ଗୃହ ଅଭାବରୁ ପାଠ ପଢା ଠିକ୍ଭାବେ ହୋଇପାରୁନି। ଅନ୍ୟପକ୍ଷେ ହାଇସ୍କୁଲରେ ସଂସ୍କୃତ ଶିକ୍ଷକ, କମ୍ପ୍ୟୁଟର ଶିକ୍ଷକ, ଜଣେ ପିଅନ ଓ ରାତ୍ରି ଜଗୁଆଳି ପଦବୀ ଖାଲି ପଡିଛି। ଏଭଳି ସ୍ଥିତିରେ ଛାତ୍ରମାନେ କିଭଳି ସ୍ମାର୍ଟ ହେବେ ସେ ନେଇ ଶିକ୍ଷାବିତ୍ମାନେ ପ୍ରଶ୍ନ କରିଛନ୍ତି।
ଏ ସମ୍ପର୍କରେ ଜିଲା ଶିକ୍ଷା ଅଧିକାରୀ ଲକ୍ଷ୍ମଣ ଭୋଇ କୁହନ୍ତି, ପୁରୁଣା ଘରେ ସ୍ମାର୍ଟ କ୍ଲାସରୁମ୍ କରାଯାଇଛି। ଛାତରୁ ପାଣି ଗଳିବାରୁ ସିଲିଂ ଖସିଯାଇଛି। ଶ୍ରେଣୀ ଗୃହ ଅଭାବରୁ ଷ୍ଟୋରରୁମରେ ନବମ ଶ୍ରେଣୀ ଛାତ୍ରଙ୍କୁ ପାଠ ପଢାଯାଉଥିଲା। ବ୍ଲକ ପକ୍ଷରୁ ନିଯୁକ୍ତ ଠିକାଦାର କାମ ସାରୁ ନାହାନ୍ତି। ହାଇସ୍କୁଲର ପ୍ରଧାନଶିକ୍ଷକ ନୀଳାଚଳ ମେହେରଙ୍କୁ ପଚାରିବାରୁ ବିଦ୍ୟାଳୟ ସୌନ୍ଦର୍ଯ୍ୟକରଣ କାର୍ଯ୍ୟ ଓ ଉନ୍ନୟନମୂଳକ କାର୍ଯ୍ୟ ଅଧାରେ ଅଟକି ରହିଛି। ଉଦ୍ଘାଟନ ସତ୍ତ୍ୱେ କାମ ସମ୍ପୂର୍ଣ୍ଣ ହୋଇ ନଥିବାରୁ ଏଭଳି ସମସ୍ୟା ସୃଷ୍ଟି ହୋଇଥିବା କହିଛନ୍ତି।
