ବରଗଡ଼,୪।୧୨(ପ୍ରେମାନନ୍ଦ ଖମାରୀ): ବରଗଡ଼ ସହରର ବିଭିନ୍ନ ପଡ଼ାରେ ପର୍ଯ୍ୟାୟକ୍ରମେ ଜବରଦଖଲ ଉଚ୍ଛେଦ ପ୍ରକ୍ରିୟା ଚାଲିଛି। ଗୋଟିଏ ପଟେ ଉଚ୍ଚ ନ୍ୟାୟାଳୟରେ ବିଚାରାଧିନ ଥିବା ଯୋଗୁ ସହରବାସୀଙ୍କ ଦୀର୍ଘବର୍ଷର ଦାବି ଲେଙ୍ଗୁ ମିଶ୍ର ଛକଠାରୁ ପୁରୁଣା ଜୀରାବ୍ରିଜ ପର୍ଯ୍ୟନ୍ତ ରାସ୍ତା ଜବରଦଖଲ ଏପର୍ଯ୍ୟନ୍ତ ଉଚ୍ଛେଦ ହୋଇପାରି ନ ଥିବାବେଳେ ଅନ୍ୟସ୍ଥାନରେ ଜବରଦଖଲରେ ରହିଥିବା ଗରିବ ଲୋକଙ୍କ ଘର, ଉଠା ଦୋକାନକୁ ହଟାଇ ଦିଆଯାଉଛି। ବୃହତ୍ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା ମହୋତ୍ସବ ପାଖେଇ ଆସୁଥିବାବେଳେ ବିନା ଥଇଥାନରେ ଏଭଳି ଉଚ୍ଛେଦରେ ପ୍ରଭାବିତ ଲୋକଙ୍କ ମଧ୍ୟରେ ଚାପା ଅସନ୍ତୋଷ ଲାଗି ରହିଛି। ଏହି କ୍ରମରେ ବୁଧବାର ବରଗଡ଼ ପୌର ପରିଷଦ ଅଧିନ ୱାର୍ଡ଼ ନଂ.୧୪ ମାଷ୍ଟରଟିକ୍ରାରେ ରହୁଥିବା ଲୋକେ ଜିଲାପାଳ ଆଦିତ୍ୟ ଗୋୟଲଙ୍କୁ ଫେରାଦ ହୋଇ ଏକ ସ୍ମାରକପତ୍ର ପ୍ରଦାନ କରିଛନ୍ତି। ଅତିରିକ୍ତ ଜିଲାପାଳ ମଧୁଛନ୍ଦା ସାହୁ ସ୍ମାରକପତ୍ର ଗ୍ରହଣ କରିଥିଲେ। ଠିକ୍ଭାବେ ଥଇଥାନ କରି ଉଚ୍ଛେଦ କରିବା ପାଇଁ ସେମାନେ ଜିଲାପାଳଙ୍କୁ ନିବେଦନ କରିଛନ୍ତି।
ସ୍ମାରକପତ୍ରରେ ସେମାନେ ଉଲ୍ଲେଖ କରିଛନ୍ତି, ଦୀର୍ଘବର୍ଷ ହେଲା ମାଷ୍ଟରଟିକ୍ରାରେ ଘର କରି ରହୁଛନ୍ତି। ପଡ଼ାରେ ୩୯ପରିବାର ରହୁଛନ୍ତି। ସେମାନେ ସମସ୍ତେ ଭୂମିହୀନ, ଗରିବ, ଅନୁସୂଚିତ ଜାତି ଓ ଶ୍ରମଜୀବି ଶ୍ରେଣୀର ଅଟନ୍ତି। ପୂର୍ବପୁରୁଷ ଅମଳରୁ ଘରଦ୍ୱାର କରି ପରିବାର ସହିତ ଏବଂ କୁଲି, ମଜୁରୀ କରି ସମସ୍ତେ ପରିବାର ଗୁଜୁରାଣ ମେଣ୍ଟାଉଛନ୍ତି। ସେଠାରେ ରହି ସେମାନଙ୍କ ପିଲାଛୁଆ ମଧ୍ୟ ସ୍ଥାନୀୟ ସ୍କୁଲ, କଲେଜରେ ପଢ଼ୁଛନ୍ତି। ମାତ୍ର ମଙ୍ଗଳବାର ସେମାନେ ରହୁଥିବା ପଡ଼ାକୁ ଉଚ୍ଛେଦ କରାଯିବ ବୋଲି ଡାକବାଜି ଯନ୍ତ୍ରରେ ସୂଚନା ଦେବା ସହିତ ୪୮ଘଣ୍ଟା ମଧ୍ୟରେ ଘର ଖାଲି କରିବାକୁ ନିର୍ଦ୍ଦେଶ ଦିଆଯାଇଛି। ନଚେତ୍ ସେମାନଙ୍କ ଘର ଭାଙ୍ଗି ଦିଆଯିବ ବୋଲି ସୂଚନା ଦିଆଯାଇଛି।
ଏଭଳି କରାଗଲେ ସେମାନଙ୍କ ଜୀବନ, ଜୀବିକା ଉଜୁଡ଼ି ଯିବା ସହିତ ପିଲାଛୁଆଙ୍କ ପାଠପଢ଼ା ଏବଂ ବୃଦ୍ଧାବୃଦ୍ଧ ମା, ବାପାଙ୍କ ଚିକିତ୍ସା ମଧ୍ୟ ବାଧାପ୍ରାପ୍ତ ହେବ ବୋଲି ପଡ଼ାବାସୀ କହିଛନ୍ତି। ଏହି ଦୃଷ୍ଟିରୁ ଉଚ୍ଛେଦ ପୂର୍ବରୁ ଥଇଥାନ କରାଯାଉ ବୋଲି ସେମାନେ ଦାବି କରିଛନ୍ତି। ସେହିପରି ଉଚ୍ଛେଦ ପାଇଁ ୪୮ଘଣ୍ଟା ବଦଳରେ ଅତିକମ୍ରେ ୬ମାସ ସମୟ ଦିଆଯାଉ ବୋଲି ପଡ଼ାବାସୀ ସ୍ମାରକପତ୍ରରେ ଉଲ୍ଲେଖ କରିଛନ୍ତି। ପଡ଼ାର ଯୋଗେନ୍ଦ୍ର ସାଗର, ଅକ୍ଷୟ କୁମାର ନାଗ, ଗୋପି ମହାନନ୍ଦ, ରୀନା ବିଭାର, ଡିଲେଶ୍ୱରୀ ନାଗ, ସୁଷମା ସାଗର ପ୍ରମୁଖ ସ୍ମାରକପତ୍ର ପ୍ରଦାନ ପାଇଁ ଜିଲାପାଳଙ୍କ କାର୍ଯ୍ୟାଳୟକୁ ଯାଇଥିଲେ। ଆମ୍ ଆଦମୀ ପାର୍ଟି(ଏଏପି)ର ରାଜ୍ୟ ସମ୍ପାଦକ ଭବାନୀ ପ୍ରସାଦ ସାହୁ ମଧ୍ୟ ସେମାନଙ୍କ ସହିତ ଉପସ୍ଥିତ ଥିଲେ।
