ବ୍ରହ୍ମପୁର ଅଫିସ,୨୮।୪: ବ୍ରହ୍ମପୁର ମହାନଗର ନିଗମର ବହୁ ପୁରାତନ ସରକାରୀ ସିଟି ହାଇସ୍କୁଲରେ ଚଳିତ ଶିକ୍ଷାବର୍ଷ ନିମନ୍ତେ ଏପ୍ରିଲ ୨୦ରୁ ବିଭିନ୍ନ ଶ୍ରେଣୀରେ ଛାତ୍ରୀଛାତ୍ରଙ୍କ ନାମଲେଖା ଆରମ୍ଭ ହୋଇଛି। ତେବେ ସ୍ଥାନୀୟ ଅଞ୍ଚଳର ଅଭିଭାବକ ପିଲାଙ୍କ ନାମ ଲେଖାଇବା ପାଇଁ ଗଲେ ଫର୍ମ ଦିଆଯାଉ ନ ଥିବା, ଏପରକି ଏଠାରେ ନ ପଢ଼ାଇବା ପାଇଁ କୁହାଯାଉଥିବା ଅଭିଯୋଗ ହେଉଛି। ଜଣେ ଅଭିଭାବକ ୭ମ ଶ୍ରେଣୀରେ ତାଙ୍କ ଭଣଜାଙ୍କ ନାମ ଲେଖାଇବାକୁ ଯାଇଥିବା ବେଳେ ନିରାଶ ହୋଇ ଫେରିଛନ୍ତି। ଶିକ୍ଷକ ଅଭାବ ଏହାର ମୁଖ୍ୟ କାରଣ ବୋଲି କୁହାଯାଉଛି।
୧୯୩୦ରେ ପ୍ରତିଷ୍ଠା ହୋଇଥିବା ସିଟି ହାଇସ୍କୁଲ ରାଜ୍ୟ ସରକାରଙ୍କ ୫-ଟି ପଦ୍ଧତିରେ ରୂପାନ୍ତରିତ ହୋଇଛି। ଏଠାରେ ପ୍ରଥମରୁ ଦଶମ ଶ୍ରେଣୀ ପର୍ଯ୍ୟନ୍ତ ପିଲା ପଢ଼ୁଛନ୍ତି। ଟିଜିଟି କଳା, ବିଜ୍ଞାନ ଓ ଗଣିତ ଓ ପିଇଟି ନିମନ୍ତେ ବିଭିନ୍ନ ବିଭାଗର ମୋଟ ୩୪ ଶିକ୍ଷକ ଆବଶ୍ୟକ ଥିବା ବେଳେ ବର୍ତ୍ତମାନ ଅଛନ୍ତି ମାତ୍ର ୨୧ ଜଣ। ଯଦି କେବେ କୌଣସି ଶିକ୍ଷକ ଛୁଟିରେ ରୁହନ୍ତି ତେବେ ସେହି ପରିୟଡ଼ର ପାଠପଢ଼ା ସମ୍ପୁର୍ଣ୍ଣ ବନ୍ଦ ରହୁଛି। ଏ ନେଇ ବାରମ୍ବାର ଜିଲା ଶିକ୍ଷାଧିକାରୀଙ୍କ ଦୃଷ୍ଟି ଆକର୍ଷଣ କରାଯାଇଥିଲେ ସୁଦ୍ଧା ସମସ୍ୟା ସମାଧାନ ହୋଇପାରି ନ ଥିବା ପ୍ରଧାନଶିକ୍ଷକ କହିଛନ୍ତି। ଅନ୍ୟପକ୍ଷରେ ଶିକ୍ଷକ ଅଭାବ ସମ୍ପର୍କରେ ଅବଗତ ଥିବା ଜିଲା ଶିକ୍ଷାଧିକାରୀ ବିନୀତା ସେନାପତି କହିଛନ୍ତି। ଜିଲାରେ ନୂତନ ଭାବେ ଇନିସିଆଲି ଟିଚର ନିଯୁକ୍ତ ହେବେ। ଏକ ମାସ ମଧ୍ୟରେ ସିଟି ହାଇସ୍କୁଲର ଶିକ୍ଷକ ପଦବୀ ପୂରଣ ହେବ ବୋଲି ସେ କହିଛନ୍ତି।
