ଛେଣ୍ଡିପଦା,୨୩।୭(ସ୍ବ.ପ୍ର.)-ଅନୁଗୋଳ ଜିଲା ଛେଣ୍ଡିପଦା ବନାଞ୍ଚଳର ବିଭିନ୍ନ ଗ୍ରାମରେ ହାତୀ ଉପଦ୍ରବ ଯୋଗୁ ବ୍ୟାପକ କ୍ଷୟକ୍ଷତି ଘଟିଛି। ବୁଧବାର ବିଳମ୍ବିତ ରାତିରେ ଶିମିଳିପାଳ ପଞ୍ଚାୟତ ଚରାକାନି ଗାଁରେ ୨୪ ହାତୀ ପଶି ଲକ୍ଷ ଲକ୍ଷ ଟଙ୍କାର କଦଳୀ ଫସଲ ନଷ୍ଟ କରିବା ସହ ଘର ଭାଙ୍ଗିଛନ୍ତି। ଗ୍ରାମର କୁମୁଦ ସାହୁଙ୍କ ୧ ଏକର ଜାଗାରେ ଲାଗିଥିବା ୩ ଶହ କଦଳୀଗଛ ଓ ୬୦ରୁ ଊଦ୍ଧର୍ବ ପୋଟଳ ମନ୍ଦା ଦଳି ଚକଟି ନଷ୍ଟ କରିଛନ୍ତି। ସେହିପରି ସୁଶାନ୍ତ ଗଡନାୟକଙ୍କ ୨୦ ଗୁଣ୍ଠ ଜମିରେ ଲାଗିଥିବା ଦେଢଶହରୁ ଊଦ୍ଧର୍ବ କଦଳୀଗଛ, ପ୍ରଶାନ୍ତ ଗଡନାୟକଙ୍କ ୧୨ ଗୁଣ୍ଠ ଜାଗାରେ ଥିବା ୩୫୦ରୁ ଊଦ୍ଧର୍ବ ପୋଟଳ ମନ୍ଦା ଓ ଘର, ନିରାକାର ପ୍ରଧାନଙ୍କ ୬୫ରୁ ଊଦ୍ଧର୍ବ କଦଳୀ ଗଛ ଏବଂ ମାଧବ ଚନ୍ଦ୍ର ସାହୁଙ୍କ ୨ଟି ବାଉଁଶ ମାଢିକୁ ହାତୀ ପଲ ସମ୍ପୂର୍ଣ୍ଣ ନଷ୍ଟ କରିଦେଇଛନ୍ତି। ପ୍ରାୟ ୫ ଲକ୍ଷରୁ ଊଦ୍ଧର୍ବ ଟଙ୍କାର ଫସଲ ନଷ୍ଟ ହୋଇଥିବା ଚାଷୀମାନେ ଅଭିଯୋଗ କରିଛନ୍ତି। ଚାଷୀଙ୍କୁ ବିଭାଗ ପକ୍ଷରୁ କ୍ଷତିପୂରଣ ପ୍ରଦାନ କରାଯିବାକୁ ଦାବି ହୋଇଛି।
