ଲୋଇସିଂହା,୨୬।୨(ସୁଶାନ୍ତ ବାରିକ): ବଲାଙ୍ଗୀର ଜିଲା ଲୋଇସିଂହା ଥାନା ଅଞ୍ଚଳରେ କ୍ରମାଗତ ଭାବରେ ଚୋରି ବୃଦ୍ଧି ପାଇଛି। ଥାନା ଅନ୍ତର୍ଗତ ଜେଉଁଟିପାଲି ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟ ନିକଟରେ ଲାଗିଥିବା ହାଇମାଷ୍ଟ ଲାଇଟକୁ ଦୁବୃର୍ତ୍ତମାନେ ଚୋରି କରି ନେଇଛନ୍ତି। ଏନେଇ ବିଦ୍ୟାଳୟ କର୍ତ୍ତୃପକ୍ଷ ଏନେଇ ଗତ ୨୧ ତାରିଖରୁ ଲୋଇସିଂହା ଥାନାରେ ଲିଖିତ ଅଭିଯୋଗ କରି ଏହାର ତଦନ୍ତ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଛନ୍ତି। ଇତିମଧ୍ୟରେ ୫ ଦିନ ବିତିଯାଇଥିଲେ ସୁଦ୍ଧା ଦୁବୃର୍ତ୍ତମାନେ ଧରା ପଡି ନ ଥିବାରୁ ବିଦ୍ୟାଳୟ ପରିଚାଳନା କମିଟି ଓ କେଉଁଟିପାଲି ଗ୍ରାମବାସୀଙ୍କ ମଧ୍ୟରେ ଅସନ୍ତୋଷ ପ୍ରକାଶ ପାଇଛି।
ଅଭିଯୋଗରୁ ପ୍ରକାଶ ଯେ, ବିଧାୟକ ପାଣ୍ଠିରୁ ବର୍ଷକ ତଳେ ଗ୍ରାମର ହାଇସ୍କୁଲ ପରିସରରେ ଏବଂ ଉଚ୍ଚ ପ୍ରାଥମିକ ବିଦ୍ୟାଳୟର ପାଚେରି ବାହାରେ ତଥା କେଉଁଟିପାଲି-ଘେଷରା ନାଲା ରାସ୍ତାରେ ୪ ଟିକିଆ ହାଇମାଷ୍ଟ ଲାଇଟ ଲଗାଯାଇଥିଲା। ରାତି ସମୟରେ ସ୍କୁଲ ପରିସର ଆଲୋକିତ ହେବା ସହିତ ଉକ୍ତ ରାସ୍ତା ଦେଇ ଯିବା ଆସିବା କରୁଥିବା ଲୋକେ ଉପକୃତ ହେଉଥିଲେ। ହେଲେ ଗତ ୨୦ ତାରିଖ ରାତିରେ ଦୁବୃର୍ତ୍ତମାନେ ଉଚ୍ଚ ପ୍ରାଥମିକ ବିଦ୍ୟାଳୟରେ ଲାଗିଥିବା ହାଇମାଷ୍ଟ ଲାଇଟକୁ ଚୋରି କରିନେଇଥିଲେ। ୨୧ ତାରିଖରେ ଗ୍ରାମବାସୀ ଏନେଇ ଜାଣିବାକୁ ପାଇଥିଲେ।
Dharitri – Odisha’s No.1 Odia Daily
