ଭୁବନେଶ୍ୱର,୨୦।୧୦(ବ୍ୟୁରୋ): ଓଡ଼ିଆ ସିନେମାର ସ୍ଥିତି ଠିକ୍ ନ ଥିବାବେଳେ ବିଭିନ୍ନ ସମସ୍ୟାରେ ଛନ୍ଦି ହୋଇଯାଇଛନ୍ତି ପ୍ରଯୋଜକ ଓ ନିର୍ଦ୍ଦେଶକ। ଫିଲ୍ମ ନିର୍ମାଣ ପରେ ବି ପ୍ରେକ୍ଷାଳୟ ମିଳୁନି। ଏଥିସହ ୨୦୦୮ରୁ ଫିଲ୍ମ ନିର୍ମାଣରେ ସବ୍ସିଡି ମଧ୍ୟ ମିଳୁନାହିଁ। ଫାଇଲ୍ ଭିତରେ ସୀମିତ ରହିଛି ଓଡ଼ିଆ ସିନେମା ନୀତି। ଏଭଳି ସ୍ଥିତିରେ ଓଡ଼ିଆ ସିନେମାର ଭବିଷ୍ୟତକୁ ନେଇ ଚିନ୍ତାରେ ପଡ଼ିଥିବା ପ୍ରଯୋଜକ ଓ ନିର୍ଦ୍ଦେଶକମାନେ ଶେଷରେ ରାସ୍ତାକୁ ଓହ୍ଲାଇଛନ୍ତି। ସମସ୍ୟାର ସମାଧାନ ସହ ଓଡ଼ିଆ ସିନେମାକୁ ସଫଳତାର ଶୀର୍ଷରେ ପହଞ୍ଚାଇବା ପାଇଁ ବୁଧବାର ଆରମ୍ଭ ହୋଇଛି ‘ଓଡ଼ିଆ ସିନେମା ବଞ୍ଚାଅ ଅଭିଯାନ ପଦଯାତ୍ରା’। ପ୍ରଯୋଜକ, ନିର୍ଦ୍ଦେଶକମାନେ ସୂଚନା ଭବନରୁ ପଦଯାତ୍ରାରେ ବାହାରି ‘ଓଡ଼ିଆ ସିନେମା ବଞ୍ଚାଅ, ଆସ ଓଡ଼ିଆ ସିନେମାକୁ ଆଗେଇ ନେବା’ ସ୍ଲୋଗାନ ଦେଇ ରଜଭବନ ଯାଏ ଯାଇଥିଲେ। ରାଜଭବନ ଛକସ୍ଥିତ ମଧୁବାବୁଙ୍କ ପ୍ରତିମୂର୍ତ୍ତି ତଳେ ଠିଆ ହୋଇ ସେମାନେ ଦାବି ଉପସ୍ଥାପନ କରିଥିଲେ। ସରକାରୀ ନିୟମ ଅନୁସାରେ ପ୍ରେକ୍ଷାଳୟରେ ୭ସପ୍ତାହ ଓଡ଼ିଆ ଚଳଚ୍ଚିତ୍ର ଚଲାଇବାର ନିମୟ ଥିଲେ ବି ଚଳଚ୍ଚିତ୍ର ନିର୍ମାଣ କରି ମୁକ୍ତିଲାଭ କରିବା ପାଇଁ ଡିଷ୍ଟ୍ରିବ୍ୟୁଟରମାନଙ୍କୁ ହଲ୍ ମାଲିକଙ୍କ ପଛରେ ଗୋଡାଇବାକୁ ପଡ଼ୁଛି। ହଲ୍ ମାଲିକଙ୍କ ପାଇଁ ସରକାରୀ କଟକଣା କ’ଣ ପାଇଁ ରହୁନି ବୋଲି ସେମାନେ ଅଭିଯୋଗ କରିଥିଲେ। କାର୍ଯ୍ୟକ୍ରମରେ ପ୍ରଯୋଜକ ସଚ୍ଚିକାନ୍ତ ଜେନା, ଶ୍ରୀଧର ମାର୍ଥା, ସଞ୍ଜୟ ପାତ୍ର, ନିର୍ଦ୍ଦେଶକ ସନ୍ତୋଷ ବିଷୋୟୀ, ଓଲିଉଡ କ୍ରିଏଟିଭ୍ ହେଡ୍ ପ୍ରଣୟ ଜେଠୀ ପ୍ରମୁଖ ଯୋଗ ଦେଇଥିଲେ। ଏହା ପ୍ରତିଦିନ ଅପରାହ୍ନ ୫ଟାରେ ଅନୁଷ୍ଠିତ ହେବ। ଯେ ପର୍ଯ୍ୟନ୍ତ ସରକାର କୌଣସି ପଦକ୍ଷେପ ଗ୍ରହଣ ନ କରିଛନ୍ତି, ସେ ପର୍ଯ୍ୟନ୍ତ ପଦଯାତ୍ରା ଚାଲୁରହିବ ବୋଲି କ୍ରିଏଟିଭ୍ ହେଡ୍ ଜେଠୀ କହିଛନ୍ତି।
