ହାଇଦ୍ରାବାଦ,୨୭।୨: ଭାରତରେ କରୋନା ପରେ ହୃଦଘାତ ଏବଂ କାର୍ଡିଆକ୍ ଆରେଷ୍ଟ ଘଟଣା ଦ୍ରୁତ ଗତିରେ ବୃଦ୍ଧି ପାଇଛି। ବିଶେଷ କରି ଯୁବକମାନଙ୍କ ମଧ୍ୟରେ ଏହା ବେଶୀ ଦେଖିବାକୁ ମିଳିଛି। ବର୍ତ୍ତମାନ ତେଲେଙ୍ଗାନାରେ ଏଭଳି ଏକ ଘଟଣା ଘଟିଛି। ଏଠାରେ ଜଣେ ୧୯ ବର୍ଷ ବୟସ୍କ ଯୁବକ ତାଙ୍କ ସମ୍ପର୍କୀୟଙ୍କ ବିବାହରେ ନାଚୁଥିବାବେଳେ ହଠାତ୍ ଟଳିପଡିଥିଲେ। ପରିବାର ସଦସ୍ୟ ତାଙ୍କୁ ତୁରନ୍ତ ଡାକ୍ତରଖାନା ନେଇଥିଲେ, ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ।
ମୃତକ ଜଣଙ୍କ ହେଲେ ମୁଟ୍ୟମ ବୋଲି ଜଣାପଡିଛି। ସେ ମହାରାଷ୍ଟ୍ରର ମୂଳ ବାସିନ୍ଦା ଥିଲେ। ସେ ହାଇଦ୍ରାବାଦଠାରୁ ପ୍ରାୟ ୨୦୦ କିଲୋମିଟର ଦୂରରେ ଥିବା ନିର୍ମଲ ଜିଲାର ପାର୍ଡି ଗ୍ରାମରେ ସମ୍ପର୍କୀୟଙ୍କ ବିବାହ ରିସେପ୍ସନରେ ପହଞ୍ଚିଥିଲେ। ଏହି ଅବସରରେ ସେ ନାଚୁଥିଲେ। ଏହି ଘଟଣାର ଭିଡିଓ ମଧ୍ୟ ଭାଇରାଲ ହେବାରେ ଲାଗିଛି। ଭିଡିଓରେ ଏହା ଦେଖିବାକୁ ମିଳେ, ମୁଟ୍ୟମ ଧଳା ଶର୍ଟ ପିନ୍ଧି ନାଚୁଥିଲେ, ହଠାତ୍ ସେ ତଳେ ପଡ଼ି ଟିକେ ଉଠିବାକୁ ଚେଷ୍ଟା କରିଥିଲେ, ତା’ପରେ ଜଣେ ବ୍ୟକ୍ତି ତାଙ୍କ ପାଖରେ ପହଞ୍ଚି ତାଙ୍କୁ ଉଠାଇବାକୁ ଚେଷ୍ଟା କରିଥିଲେ।
ଡାକ୍ତରମାନେ କହିଛନ୍ତି, ଯୁବକ ଜଣକ ନିଶ୍ଚିତ ଭାବରେ ହୃଦ୍ତର ଶିକାର ହୋଇଥିଲେ। ଏହି କାରଣରୁ ତାଙ୍କର ମୃତ୍ୟୁ ଘଟିଛି। ଚାରି ଦିନ ମଧ୍ୟରେ ତେଲେଙ୍ଗାନାରେ ଏହା ହେଉଛି ଦ୍ୱିତୀୟ ଘଟଣା। ଏହାପୂର୍ବରୁ, ଫେବୃଆରୀ ୨୨ରେ, ୨୪ ବର୍ଷ ବୟସ୍କ ପୋଲିସ କନଷ୍ଟେବଳ ହାଇଦ୍ରାବାଦରେ ଏକ ଜିମରେ ବ୍ୟାୟାମ କରୁଥିବା ସମୟରେ ହୃଦ୍ଘାତରେ ମୃତ୍ୟୁବରଣ କରିଥିଲେ।
https://twitter.com/zeeshan_zahed/status/1629751372194148354
