ତରଭା,୮ା୧(ମାନଭଞ୍ଜନ ମିଶ୍ର): ସୁବର୍ଣ୍ଣପୁର ଜିଲା ତରଭା ସହରସ୍ଥିତ ମାରୱାଡି ଧର୍ମଶାଳା ପଛପଟେ ଥିବା ଏକ ଘରୋଇ ମୋବାଇଲ କମ୍ପାନୀ ଟାଓ୍ୱାର ଉପରେ ଗୁରୁବାର ଜଣେ ଯୁବକ ଚଢି ଯାଇଥିଲେ। ତାଙ୍କୁ ଯେତେ କହିଲେ ବି ସେ ଓହ୍ଲାଇ ନ ଥିଲେ। ଏହାକୁ ନେଇ ଘଟଣାସ୍ଥଳରେ ଲୋକଙ୍କ ଭିଡ ଜମିଥିଲା। ଯୁବକ ଜଣକ ତରଭା ସହର ସୁନାରିପଡାର ସୁମିତ ସାହୁ(୨୭) ବୋଲି ଜଣାପଡିଥିଲା।
ଖବର ପାଇ ତରଭା ପୋଲିସ ଓ ଦମକଳ ବାହିନୀ ଘଟଣାସ୍ଥଳରେ ପହଞ୍ଚତ୍ ଥିଲେ। ଦମକଳ ବାହିନୀର ଦୁଇ ଜଣ ଟାୱାର ଉପରକୁ ଚଢି ଯୁବକଙ୍କୁ ବୁଝାଶୁଝା କରି ତଳକୁ ଓହ୍ଲାଇବାରେ ସଫଳ ହୋଇଥିଲେ। ତାଙ୍କୁ ତୁରନ୍ତ ତରଭା ଡାକ୍ତରଖାନାରେ ଭର୍ତ୍ତି କରାଯାଇଥିଲା l ତରଭା ଥାନା ଏସଆଇ ରବୀନ୍ଦ୍ର ସାହୁ, ଏଏସଆଇ ସୁଧୀର ଜେନାଙ୍କ ସହ ପୋଲିସ କର୍ମଚାରୀ ଓ ଅଗ୍ନିଶମ ଅଧିକାରୀ ଅନିଲ ମିଶ୍ରଙ୍କ ନେତୃତ୍ୱରେ ଉଦ୍ଧାର କାର୍ଯ୍ୟରେ ସାମିଲ ଥିଲେ। ଯୁବକ ଜଣକ ଟାଓ୍ୱାରକୁ କାହିଁ ଚଢିଥିଲେ ତାହାର କାରଣ ଜଣାପଡିନାହିଁ।
