ଓ୍ବାଶିଂଟନ,୧୭।୯: ଅଧିକାଂଶ ଦେଶର କେନ୍ଦ୍ରୀୟ ବ୍ୟାଙ୍କଗୁଡ଼ିକ ଏକସଙ୍ଗେ ସେମାନଙ୍କ ମୁଦ୍ରାନୀତିକୁ କଠୋର କରିଥିବାବେଳେ ଆସନ୍ତା ବର୍ଷ ବିଶ୍ୱ ମାନ୍ଦାବସ୍ଥାର ସମ୍ମୁଖୀନ ହୋଇପାରେ। ବିଶ୍ୱବ୍ୟାଙ୍କ ପକ୍ଷରୁ ସଦ୍ୟ ପ୍ରକାଶିତ ରିପୋର୍ଟରେ ଏହା କୁହାଯାଇଛି। ମୁଦ୍ରାସ୍ଫୀତି କମାଇବାକୁ ହେଲେ ଉତ୍ପାଦନ ବୃଦ୍ଧି ସାଙ୍ଗକୁ ଯୋଗାଣ କ୍ଷେତ୍ରରେ ରହିଥିବା ପ୍ରତିବନ୍ଧକ ହଟାଇବାକୁ ବିଶ୍ୱ ବ୍ୟାଙ୍କ ଆହ୍ବାନ ଦେଇଛି। ରିପୋର୍ଟ ଅନୁଯାୟୀ ବିଶ୍ୱ ମାନ୍ଦାବସ୍ଥାର ଅନେକ ଲକ୍ଷଣ ପରିଲକ୍ଷିତ ହେଲାଣି। ବିଶ୍ୱ ଅର୍ଥନୀତି ଏବେ ଦ୍ରୁତ ବେଗରେ ହ୍ରାସ ପାଉଛି। ୧୯୭୦ର ମାନ୍ଦାବସ୍ଥା ପରବର୍ତ୍ତୀ ଅବସ୍ଥାରେ ଅର୍ଥନୀତି କେବେ ଏଭଳି ହ୍ରାସ ପାଇ ନ ଥିଲା। ବିକାଶଶୀଳ ଅର୍ଥନୀତିଗୁଡ଼ିକ ଆର୍ଥତ୍କ ସଙ୍କଟର ସମ୍ମୁଖୀନ ହୋଇଛନ୍ତି, ଯାହା ଦୀର୍ଘମିଆଦୀ କ୍ଷତି ପହଞ୍ଚାଇପାରେ ବୋଲି ବିଶ୍ୱବ୍ୟାଙ୍କର ନୂଆ ଅଧ୍ୟୟନରେ କୁହାଯାଇଛି।
ମୁଦ୍ରାସ୍ଫୀତି କମାଇବା ଲାଗି ସାରା ବିଶ୍ୱରେ କେନ୍ଦ୍ରୀୟ ବ୍ୟାଙ୍କଗୁଡ଼ିକ ଚଳିତ ବର୍ଷ ଏକସଙ୍ଗେ ସୁଧ ବଢ଼ାଇଛନ୍ତି, ଯାହାକି ଗତ ୫ ଦଶନ୍ଧି ମଧ୍ୟରେ ଦେଖାଯାଇ ନ ଥିଲା। ଆଗାମୀ ବର୍ଷ ମଧ୍ୟ ଏହି ଧାରା ଜାରି ରହିପାରେ। କେନ୍ଦ୍ରୀୟ ବ୍ୟାଙ୍କ ସୁଧହାର ୪%ରେ ପହଞ୍ଚତ୍ପାରେ, ଯାହା ୨୦୨୧ରେ ଥିବା ସୁଧହାରର ଦୁଇଗୁଣ। ଆମେରିକା, ୟୁରୋପ, ଭାରତ ସମସ୍ତେ ମୁଦ୍ରାସ୍ଫୀତି କମାଇବା ପାଇଁ ସୁଧହାର ବଢ଼ାଇଛନ୍ତି। ଏଭଳି କଠୋର ମୁଦ୍ରାନୀତି ଯୋଗୁ ପୁଞ୍ଜିନିବେଶ, ନିଯୁକ୍ତି ଆଦି ପ୍ରଭାବିତ ହେବା ସହ ଅଭିବୃଦ୍ଧି ହ୍ରାସ ପାଇଛି। ସାରା ବିଶ୍ୱରେ ଆର୍ଥତ୍କ ଅଭିବୃଦ୍ଧି ଦ୍ରୁତ ଗତିରେ ହ୍ରାସ ପାଉଛି। ଅଧିକାଂଶ ଦେଶ ମାନ୍ଦାବସ୍ଥା ମଧ୍ୟକୁ ଠେଲିହୋଇଯାଉଥିବାରୁ ଅଭିବୃଦ୍ଧି ହାର ଆହୁରି କମିପାରେ ବୋଲି ରିପୋର୍ଟରେ କୁହାଯାଇଛି। ଏହି ଧାରା ଅଧିକ ଦିନ ତିଷ୍ଠି ରହିବା ସହ ଏହାର ପରିଣାମ ଦୀର୍ଘଦିନ ଅନୁଭୂତ ହେବ ବୋଲି ବିଶ୍ୱବ୍ୟାଙ୍କ ଅଧ୍ୟକ୍ଷ ଡାଭିଡ୍ ମାଲ୍ପାସ୍ କହିଛନ୍ତି। ମୁଦ୍ରାସ୍ଫୀତି ବୃଦ୍ଧିର ଏକାଧିକ କାରଣ ମଧ୍ୟରୁ ୟୁକ୍ରେନ୍ ଯୁଦ୍ଧ ଅନ୍ୟତମ। ଏଥିଯୋଗୁ ଖାଦ୍ୟ ଯୋଗାଣ ବାଧାପ୍ରାପ୍ତ ହୋଇଛି। ମହାମାରୀ ଯୋଗୁ ଯୋଗାଣ ଶୃଙ୍ଖଳ ପ୍ରଭାବିତ ହୋଇଥିଲାବେଳେ ଚାଇନାରେ ଦୀର୍ଘଦିନ ଧରି ଲକ୍ଡାଉନ ଯୋଗୁ ଚାହିଦା ହ୍ରାସ ପାଇଛି। ଏହାବ୍ୟତୀତ ପାଣିପାଗରେ ଅନିୟମିତତା କୃଷି ଉତ୍ପାଦନକୁ ପ୍ରଭାବିତ କରିଛି। ମୁଦ୍ରାସ୍ଫୀତି କମାଇବା ପାଇଁ ଭାରତର ରିଜର୍ଭ ବ୍ୟାଙ୍କ ଗତ ଅଗଷ୍ଟରେ ତୃତୀୟ ଥର ପାଇଁ ରେପୋ ରେଟ୍ ୫୦ ବେସିସ୍ ପଏଣ୍ଟ ବୃଦ୍ଧି କରିବା ଫଳରେ ଏହା ୫.୪୦ ପ୍ରତିଶତରେ ପହଞ୍ଚତ୍ଛି। ୨୦୨୨-୨୩ ବର୍ଷ ପାଇଁ ମୁଦ୍ରାସ୍ଫୀତି ୬.୭ ପ୍ରତିଶତ ରହିବା ସହ ଜିଡିପି ଅଭିବୃଦ୍ଧି ୭.୨ ପ୍ରତିଶତ ରହିବ ବୋଲି ଆର୍ବିଆଇ ଆକଳନ କରିଛି। ଖାଦ୍ୟସାମଗ୍ରୀ ମୂଲ୍ୟ ବୃଦ୍ଧି ଯୋଗୁ ଗତ ଅଗଷ୍ଟରେ ଭାରତର ଖୁଚୁରା ମୁଦ୍ରାସ୍ଫୀତି ୭ ପ୍ରତିଶତକୁ ବୃଦ୍ଧି ପାଇଥିଲା। ଜୁଲାଇରେ ମୁଦ୍ରାସ୍ଫୀତି ୬.୭୧ ପ୍ରତିଶତ ରହିଥିଲା।
