ନୂଆଦିଲ୍ଲୀ, ୨୩ା୮ (ପି.ଟି.)-କୋଭିଡ୍-୧୯ ଯୋଗୁ ମହିଳା ରେସ୍ଲରମାନଙ୍କ ଲାଗି ହେବାକୁଥିବା ଜାତୀୟ କ୍ୟାମ୍ପକୁ ପୁଣି ସ୍ଥଗିତ ରଖାଯାଇଛି। କରୋନା ଭାଇରସ୍ ସଂକ୍ରମଣ ବୃଦ୍ଧି ପାଉଥିବାରୁ ଖେଳାଳିମାନେ କ୍ୟାମ୍ପରେ ଯୋଗଦେବା ଲାଗି କୁଣ୍ଠିତ ହେଉଛନ୍ତି। ଜାତୀୟ କ୍ୟାମ୍ପ ସେପ୍ଟେମ୍ବର ୧ରୁ ଲକ୍ଷ୍ନୌରେ ଆରମ୍ଭ ହେବାର ଥିଲା। ମାତ୍ର ଟପ୍ ରେସ୍ଲରମାନେ ଏଥିରେ ଯୋଗଦେବା ଲାଗି ଅନିଚ୍ଛା ପ୍ରକାଶ କରିଥିଲେ। ମହିଳା କ୍ୟାମ୍ପକୁ ଦ୍ୱିତୀୟ ଥର ପାଇଁ ସ୍ଥଗିତ ରଖାଯାଇଛି। ରେସଲିଂ ଫେଡେରେଶନ ଅଫ୍ ଇଣ୍ଡିଆ (ଡବ୍ଲ୍ୟୁଏଫ୍ଆଇ) ପ୍ରଥମେ ଅଗଷ୍ଟ ଦ୍ୱିତୀୟ ସପ୍ତାହରେ କ୍ୟାମ୍ପ ଆରମ୍ଭ କରିବା ଲାଗି ସ୍ଥିର କରିଥିଲା। ମାତ୍ର କୋଭିଡ୍-୧୯ର ଉତ୍ପତି ଯୋଗୁ ଏହାକୁ ସ୍ଥଗିତ ରଖିବାକୁ ହୋଇଥିଲା। ଅନ୍ୟପକ୍ଷରେ ସୋନେପତ୍ଠାରେ ପୁରୁଷ କ୍ୟାମ୍ପ ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ ଆରମ୍ଭ ହେବ। ନିକଟରେ ଦେଶର ସର୍ବୋଚ୍ଚ କ୍ରୀଡ଼ା ପୁରସ୍କାର ଖେଳରତ୍ନ ପାଇବା ଲାଗି ମନୋନୀତ ହୋଇଥିବା ଭିନେଶ ଫୋଗତ୍ ବର୍ତ୍ତମାନ ପରିସ୍ଥିତିରେ ଲକ୍ଷ୍ନୌ ଗସ୍ତ କରିବାକୁ ରୋକ୍ଠୋକ୍ ମନା କରିଦେଇଛନ୍ତି। ରିଓ ଅଲିମ୍ପିକ ବ୍ରୋଞ୍ଜ ପଦକ ବିଜୟିନୀ ସାକ୍ଷୀ ମଲିକ ମଧ୍ୟ ସ୍ବାସ୍ଥ୍ୟ ସୁରକ୍ଷା ନେଇ ଉଦ୍ବେଗ ପ୍ରକାଶ କରିଥିଲେ। ସେପ୍ଟେମ୍ବର ୧ରୁ ହେବାକୁ ଥିବା ମହିଳା କ୍ୟାମ୍ପରେ ଅଲିମ୍ପିକ୍ସରେ ଭାଗ ନେବାକୁ ଥିବା ୧୫ ମହିଳା ରେସ୍ଲର ଭାଗ ନେଇଥାନ୍ତେ। କ୍ୟାମ୍ପ ପାଇଁ ନୂଆ ତାରିଖ ଖେଳାଳିମାନଙ୍କୁ ଠିକଣା ସମୟରେ ଜଣାଇ ଦିଆଯିବ ବୋଲି ସ୍ପୋଟର୍ସ ଅଥରିଟି ଅଫ୍୍ ଇଣ୍ଡିଆ (ସାଇ) ତରଫରୁ ଏକ ବିବୃତିରେ କୁହାଯାଇଛି।
