ପୁରୀ ଅଫିସ,୨୫ା୭(ଅଜିତ ମହାନ୍ତି):ଭକ୍ତଙ୍କ ପାଇଁ ଶ୍ରୀମନ୍ଦିର ଚାରିଦ୍ୱାର ଖୋଲିବା ନେଇ ବିଭିନ୍ନ ସଂଗଠନଠାରୁ ଆରମ୍ଭ କରି ରାଜନେତା, ପରିଚାଳନା କମିଟି ସଦସ୍ୟ, ସେବାୟତଙ୍କ ପକ୍ଷରୁ ଦାବି କରାଯିବା ପରେ ଶେଷରେ ମୁଣ୍ଡ ନୁଆଁଇଛି ପ୍ରଶାସନ। ପ୍ରାଥମିକତା ଦୃଷ୍ଟିରୁ ପୁରୀବାସୀଙ୍କ ପାଇଁ ଶ୍ରୀମନ୍ଦିର ପଶ୍ଚିମଦ୍ୱାର ସୋମବାରଠାରୁ ଖୋଲାଯାଇଛି। ଫଳରେ ପୁରୀବାସୀ ଏହି ନିଷ୍ପତ୍ତି ପ୍ରତି ସନ୍ତୋଷପ୍ରକାଶ କରିଥିବାବେଳେ ପ୍ରଥମ ଦିନରେ ଶୃଙ୍ଖଳିତ ଭାବେ ପରିଚୟପତ୍ର ଦେଖାଇ ବ୍ୟାରିକେଡ୍ ଦେଇ ସ୍ଥାନୀୟ ବାସିନ୍ଦା ଶ୍ରୀମନ୍ଦିରକୁ ପ୍ରବେଶ କରିଛନ୍ତି। ଅପରପକ୍ଷେ ପ୍ରଶାସନ ପଶ୍ଚିମଦ୍ୱାର ପୁରୀବାସୀଙ୍କ ପାଇଁ ଖୋଲି ଶ୍ରୀମନ୍ଦିର ଚାରିଦ୍ୱାର ଖୋଲିବା ଲାଗି ହେଉଥିବା ଦାବିକୁ ଦବେଇଦେବା ଏହା ଏକ ସୁଚିନ୍ତିତ ଯୋଜନା ବୋଲି ବିଭିନ୍ନ ମହଲରେ ଚର୍ଚ୍ଚା ହେଉଥିବା ବେଳେ ଭକ୍ତଙ୍କ ପାଇଁ ଚାରିଦ୍ୱାର ଖୋଲିବା ଆନ୍ଦୋଳନ ଜାରି ରହିବ ବୋଲି ବିଭିନ୍ନ ସଂଗଠନ ପକ୍ଷରୁ କୁହାଯାଇଛି। ସୂଚନାଯୋଗ୍ୟ, କୋଭିଡ୍ ପରଠାରୁ ଭକ୍ତମାନଙ୍କୁ କେବଳ ସିଂହଦ୍ୱାର ଦେଇ ଶ୍ରୀମନ୍ଦିରକୁ ପ୍ରବେଶ କରିବାକୁ ପ୍ରଶାସନ ପକ୍ଷରୁ ଅନୁମତି ଦିଆଯାଇଥିଲା। ଫଳରେ ଅନ୍ୟ ତିନିଦ୍ୱାର ଦେଇ ଭକ୍ତମାନେ ଯାଇପାରୁ ନଥିଲେ, ଯାହାକୁ ନେଇ ପୁରୀବାସୀଙ୍କଠାରୁ ଆରମ୍ଭ କରି ଭକ୍ତମାନେ ନାହିଁ ନ ଥିବା ସମସ୍ୟାର ସମ୍ମୁଖୀନ ହେଉଥିଲେ। କୋଭିଡ୍ ସରିଯିବା ପରେ ମଧ୍ୟ ଉକ୍ତ କଟକଣାକୁ ପ୍ରଶାସନ ଉଠାଇ ନ ଥିଲେ। ଫଳରେ ଏହାକୁ ବିରୋଧ କରି ବିଭିନ୍ନ ଅନୁଷ୍ଠାନ, ଓକିଲ ସଂଘ, ରାଜନୈତିକ ଦଳ, ସେବାୟତ, ପରିଚାଳନା କମିଟି ସଦସ୍ୟ ପ୍ରମୁଖ ଚାରିଦ୍ୱାର ଖୋଲିବା ପାଇଁ ଦାବି ଜୋରଦାର କରିଥିଲେ। ଫଳରେ ଛତିଶା ନିଯୋଗ ବୈଠକ ବସି ଦ୍ୱାର ଖୋଲିବା ନେଇ ଏକ ସବ୍କମିଟି ଗଠନ କରାଯାଇଥିଲା। ମାତ୍ର ଉକ୍ତ ସବ୍କମିଟି ଗଠନକୁ ମଧ୍ୟ ଅନେକେ ବିରୋଧ କରିଥିଲେ। ଫଳରେ ରବିବାର ଏକ ବୈଠକ ବସି ପୁରୀବାସୀଙ୍କ ପାଇଁ ପଶ୍ଚିମଦ୍ୱାର ଖୋଲିବା ନେଇ ନିଷ୍ପତ୍ତି ହୋଇଥିଲା। ନିଷ୍ପତ୍ତି ଅନୁଯାୟୀ, ପୁରୀବାସୀ ସେମାନଙ୍କ ପରିଚୟପତ୍ର ଦେଖାଇ ସୋମବାରଠାରୁ ପଶ୍ଚିମଦ୍ୱାରରେ ପ୍ରବେଶ କରି ଶ୍ରୀମନ୍ଦିରରେ ମହାପ୍ରଭୁଙ୍କ ଦର୍ଶନ କରିଛନ୍ତି। ଶୃଙ୍ଖଳିତ ଦର୍ଶନ ପାଇଁ ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଥିଲା। ପୋଲିସ ପ୍ରଶାସନ ମଧ୍ୟ ସଜାଗ ରହିଥିଲା। ଭକ୍ତମାନଙ୍କ ସୁବିଧା ପାଇଁ ପଶ୍ଚିମଦ୍ୱାର ନିକଟରେ ଥିବା ଶେଲଟର୍ ପାଭିଲିୟନରେ ଜୋତା ଓ ଅନ୍ୟ ଆସବାବପତ୍ର ରଖି ଧାଡ଼ିରେ ପ୍ରବେଶ କରିବା ପାଇଁ ବ୍ୟବସ୍ଥା କରାଯାଇଥିଲା। ଦୀର୍ଘଦିନ ପରେ ପୁରୀବାସୀ ପଶ୍ଚିମଦ୍ୱାର ଦେଇ ଶ୍ରୀମନ୍ଦିରକୁ ଯାଇ ମହାପ୍ରଭୁଙ୍କ ଦର୍ଶନ କରି ବେଶ୍ ଖୁସିବ୍ୟକ୍ତ କରିଛନ୍ତି। ଅପରପକ୍ଷେ ପୁରୀରେ ଦୀର୍ଘଦିନ ଧରି ରହୁଥିବା ଭକ୍ତମାନଙ୍କୁ ପଶ୍ଚିମଦ୍ୱାର ଦେଇ ଶ୍ରୀମନ୍ଦିର ପରିସରକୁ ଯିବା ପାଇଁ ଛଡ଼ାଯାଇ ନ ଥିଲା, ଯାହାକୁ ନେଇ ଅନେକ ବ୍ୟକ୍ତିବିଶେଷ ଅସନ୍ତୋଷ ପ୍ରକାଶ କରିଥିଲେ। ବିଶେଷ କରି ବୟସ୍କମାନେ ଯାଇ ନ ପାରି ମନ ଦୁଃଖ କରି ଫେରିଥିବା ଦେଖିବାକୁ ମିଳିଥିଲା। ତେବେ ପ୍ରଶାସନ ପରିକ୍ରମା ମାର୍ଗ କାର୍ଯ୍ୟ ଚାଲିଥିବାର ଆଳ ଦେଖାଇ ବର୍ତ୍ତମାନ ଉତ୍ତର ଓ ଦକ୍ଷିଣ ଦ୍ୱାରରେ ପ୍ରବେଶ ବନ୍ଦ ରଖିବା ନେଇ ସୂଚନା ଦେଇଛି। ଭଗବାନଙ୍କ ଆଗରେ ସବୁ ଭକ୍ତ ସମାନ, ତେଣୁ ସମସ୍ତଙ୍କ ପାଇଁ ଚାରିଦ୍ୱାର ଖୋଲାଯାଉ ବୋଲି ଭକ୍ତ, ସେବାୟତ ଓ ବିଭିନ୍ନ ସଙ୍ଗଠନ ଦାବି କରିଛନ୍ତି।
