ମହାକାଳପଡ଼ା,୩୦ା୬(ଡି.ଏନ.ଏ.): କେନ୍ଦ୍ରାପଡ଼ା ଜିଲା ମହାକାଳପଡା ବ୍ଲକ ଉପକୂଳ ଅଞ୍ଚଳ ପେଟଛେଲା ପଞ୍ଚାୟତ ଆଦିବାସୀ ଶବରପଡ଼ା ଗ୍ରାମବାସୀଙ୍କ ଜୀବନ ଅଧିକାଂଶ ସମୟ ଜଙ୍ଗଲ ଭିତରେ ହିଁ କଟେ। ଏହି ଗାଁର ପରିବାର ସଂଖ୍ୟା ୩୫। ଜନସଂଖ୍ୟା ୨ଶହରୁ ଊର୍ଦ୍ଧ୍ୱ। ଆଦିବାସୀମାନଙ୍କ ନିଜସ୍ବ ଚାଷ ଜମି ନାହିଁ। ମୂଲ ମଜୁରୀ ଲାଗି ସେମାନେ ପରିବାର ଚଳନ୍ତି। ଏହି ଅନୁସୂଚୀତ ଜନଜାତି ପରିବାରକୁ ସରକାରୀ ଉଜ୍ଜଳା ଯୋଜନାରେ ସାମିଲ କରାଯାଇନାହିଁ। ଦାରିଦ୍ର୍ୟ ସୀମା ରେଖା ତଳେ ବସବାସ କରୁଥିବା ଏହି ଶବର ସମ୍ପ୍ରଦାୟ ଲୋକମାନେ ପ୍ରତିଦିନ ଜଙ୍ଗଲ ଯାଆନ୍ତି। ଜଙ୍ଗଲରେ ବୁଲି ବୁଲି ଶୁଖିଲା କାଠ, ଡାଳ, ପତ୍ର ସଂଗ୍ରହ କରି ଆଣିଥାନ୍ତି। ଏଥିପାଇଁ ସେମାନଙ୍କୁ ବହୁ କଷ୍ଟ ସ୍ବୀକାର କରିବାକୁ ପଡିଥାଏ। ଅଧିକାଂଶ ସମୟରେ ସେମାନେ ଜାଳେଣୀ ସଂଗ୍ରହ କରିବାକୁ ଘଞ୍ଚ ଜଙ୍ଗଲ ଭିତରକୁ ଚାଲିଯାଆନ୍ତି। ଭୋକ ଉପାସରେ ଜଙ୍ଗଲରେ ବୁଲି ବୁଲି ସନ୍ଧ୍ୟାକୁ କାଠ, ପତ୍ର ମୁଣ୍ଡରେ ଧରି ଘରେ ପହଞ୍ଚନ୍ତି। ସେମାନେ କାଠ ନେଇ ପହଞ୍ଚତ୍ଲେ ତାଙ୍କ ଘରେ ଚୁଲି ଉପରେ ହାଣ୍ଡି ବସେ ।
ଏ ସଂକ୍ରାନ୍ତରେ ଗାଁର ମହିଳାମାନେ କୁହନ୍ତି, ଆମର ଚାଷ ଜମି ନ ଥିବାରୁ ପର ଘରେ ମୂଲ ଲାଗିବାକୁ ପଡ଼ିଥାଏ। ବର୍ଷାଦିନ ଆସିବା ପୂର୍ବରୁ ଜଙ୍ଗଲକୁ ଯାଇ ଜାଳେଣି ସଂଗ୍ରହ କରି ସାଇତି ରଖିଥାଉ। ନଚେତ୍ ବର୍ଷାଋତୁରେ ଆମକୁ ଶୁଖିଲା କାଠ ମିଳେନାହିଁ। ଜଙ୍ଗଲରୁ କାଠ ସଂଗ୍ରହ କରୁଥିବାବେଳେ ଅଧିକାଂଶ ସମୟରେ ଜଙ୍ଗଲୀ ଜନ୍ତୁ ଓ ସରୀସୃପଙ୍କ ସାମ୍ନା କରିବାକୁ ପଡେ। ତଥାପି ଜୀବନକୁ ବାଜି ଲଗାଇ ଜାଳେଣୀ ସଂଗ୍ରହ କରିବାକୁ ପଡ଼ିଥାଏ। କେନ୍ଦ୍ର ସରକାରଙ୍କ ଉଜ୍ଜଳା ଯୋଜନା ବିଷୟରେ ଏହି ଗାଁର ଲୋକମାନେ କିଛି ଜାଣିନାହାନ୍ତି। ବିଭାଗୀୟ ଅଧିକାରୀଙ୍କ ଏହି ଗାଁରେ କେବେ ପାଦ ପଡିନାହିଁ ବୋଲି ଗାଁର ଲୋକମାନେ କହିଛନ୍ତି। ବିଭାଗ ପକ୍ଷରୁ ଏହି ଗାଁରେ ସଚେତନତା ସୃଷ୍ଟି କରାଯିବା ସହ ସବୁ ପରିବାରକୁ ଉଜ୍ଜଳା ଯୋଜନାରେ ସାମିଲ କରିବାକୁ ସାମାଜିକ କର୍ମୀ ପବିତ୍ର ବେହେରା ଦାବି କରିଛନ୍ତି।
