କର୍ଲାମୁଣ୍ଡା,୨୨ା୭(ପ୍ରଦୀପ କୁମାର ସାହୁ): କଳାହାଣ୍ଡି ଜିଲା କର୍ଲାମୁଣ୍ଡା ବ୍ଲକ ସଦର ମହକୁମାଠାରୁ ୨୦ କିମି ଦୂରରେ ଅବସ୍ଥିତ ବୋରାପଦର ପଞ୍ଚାୟତର କେର୍ଣାପଲା ଗାଁ। ୩୫ ପରିବାର ବିଶିଷ୍ଟ ଏହି ଗାଁରେ ୧୦୫ ଜଣ ମହିଳା-ପୁରୁଷ ରହିଛନ୍ତି। ତେବେ ସ୍ବାଧୀନତାର ଦୀର୍ଘବର୍ଷ ପରେ ମଧ୍ୟ ଗାଁକୁ ପକ୍କା ରାସ୍ତାଟିଏ ନାହିଁ,ଏପରି କି ୨୦୨୦ରେ ଗାଁରେ ଥିବା ପ୍ରାଥମିକ ବିଦ୍ୟାଳୟ ଛାତ୍ରୀଛାତ୍ର ସଂଖ୍ୟା କମ୍ ଥିବାରୁ ବିଦ୍ୟାଳୟକୁ ସରକାର ବନ୍ଦ କରିଦେଲେ। ଫଳରେ ଏହି ଗାଁର ୧୩ ଜଣ ଛାତ୍ରୀଛାତ୍ର ୨ କିମି ଦୂରରେ ଥିବା ମ. ରାମପୁର ବ୍ଳକ ଟୁର୍ଚ୍ଚି ବିଦ୍ୟାଳୟରେ ପାଠ ପଢୁଛନ୍ତି। ଏହା ବ୍ୟତୀତ ଜନସଂଖ୍ୟା କମ୍ କାରଣ କେର୍ଣାପଲା,ବତୀକୁପା ଓ ପୁରଗୁଡ଼ିପଦର ପାଇଁ ବତୀକୁପା ଗାଁରେ ରହିଛି ଅଙ୍ଗନଓ୍ବାଡି କେନ୍ଦ୍ର। ଏହି ଗାଁକୁ ଯିବାକୁ ହେଲେ ମରାମପୁର ବ୍ଲକର ଟୁର୍ଚ୍ଚିଠାରୁ ମାଟି ରାସ୍ତା ୨ କିମି ଅତିକ୍ରମ କଲାପରେ କେର୍ଣାପଲା ଗାଁ ପଡ଼ିଥାଏ। ରାସ୍ତାଟି ଖାଲଖମା ଓ କାଦୁଅ ହୋଇଥିବାରୁ ଅନେକ ସମୟରେ ବିଦ୍ୟାଳୟକୁ ଯାଉଥିବା ଛାତ୍ରୀଛାତ୍ର ଦୁର୍ଘଟଣାର ଶିକାର ହେଉଥିବା ଗାଁର ସ୍ବେଚ୍ଛାସେବୀ ଯୁବକ ବଳଭଦ୍ର ମାଝି ଅଭିଯୋଗ କରିଛନ୍ତି। ଏଣୁ ଉକ୍ତ ଗ୍ରାମର ରାସ୍ତା ନିର୍ମାଣ ସହିତ ଅଙ୍ଗନଓ୍ବାଡ଼ି କେନ୍ଦ୍ର ସ୍ଥାପନ କରିବା ଓ ପ୍ରାଥମିକ ବିଦ୍ୟାଳୟକୁ ପୁଣିଥରେ ଖୋଲିବା ପାଇଁ ଗ୍ରାମବାସୀ ଅନୁରୋଧ କରିଛନ୍ତି। ଏନେଇ କର୍ଲାମୁଣ୍ଡା ଅତିରିକ୍ତ ଗୋଷ୍ଠୀ ଶିକ୍ଷା ଅଧିକାରୀ ରାମଚନ୍ଦ୍ର ସାଙ୍କୁ ପଚାରିବାରୁ ପୁଣିଥରେ ବିଦ୍ୟାଳୟ ଖୋଲାଯିବାକୁ ଜିଲା ପ୍ରଶାସନର ଦୃଷ୍ଟି ଆକର୍ଷଣ କରିଛୁ ବୋଲି କହିଛନ୍ତି। ଠିକ୍ ସେହିପରି ଆଇସିଡିଏସ୍ ସୁପରଭାଇଜର କୁସୁମ ପଣ୍ଡାଙ୍କୁ ପଚାରିବାରୁ ଗାଁରେ କେନ୍ଦ୍ର ହେବା ପାଇଁ ଆବଶ୍ୟକ ଜନସଂଖ୍ୟା ନ ଥିବା କାରଣ ଅଙ୍ଗନଓ୍ବାଡ଼ି କେନ୍ଦ୍ର ଖୋଲିବା ସମ୍ଭବପର ହେଉନାହିଁ। ତଥାପି ଆମେ ଏହି ଗାଁକୁ ଆଇସିଡିଏସ୍ର ସୁବିଧା ଠିକ୍ ଭାବେ ଯୋଗାଇ ଦେଇ ଆସୁଛୁ ବୋଲି କହିଛନ୍ତି।
