ଯାଜପୁରରୋଡ଼,୬।୫(ପବିତ୍ର ରଞ୍ଜନ ମହାନ୍ତି): କ୍ରମବର୍ଦ୍ଧିଷ୍ଣୁ ଯାଜପୁରରୋଡ଼ ସହରର ଅଭିବୃଦ୍ଧି ଦିନକୁ ଦିନ ଘଟୁଛି। ଏଥିଯୋଗୁ ସହରର ଟ୍ରାଫିକ ବ୍ୟବସ୍ଥା ମୁଖ୍ୟ ସମସ୍ୟା ଭାବେ ଉଭା ହୋଇଛି। ଏହି ସହର କଳିଙ୍ଗନଗର ଶିଳ୍ପାଞ୍ଚଳର ମୁଖ୍ୟ ଦ୍ୱାର ହୋଇଥିବାରୁ ଯାନବାହାନ ସଂଖ୍ୟା ଆଶାତୀତ ଭାବେ ବଢ଼ିଛି ା ସହରର କୋର୍ଟ ଛକ, ଚୋରଦା ଛକ, ଚୋରଦା ବାଇପାସ, ଗୋପବନ୍ଧୁ ଛକ, ଦଳା ଛକ, ଡାକବଙ୍ଗଳା ଛକରେ ଟ୍ରାଫିକ ବ୍ୟବସ୍ଥା ବିପର୍ଯ୍ୟସ୍ତ ହୋଇଛି ା ଏହି ସହରରେ ଟ୍ରାଫିକ୍ ପୋଲିସର ବ୍ୟବସ୍ଥା ନ ଥିବାରୁ ତାହା ଗୁରୁତର ରୂପ ନେଇଛି ା ଫଳରେ ପ୍ରତିଦିନ ଛୋଟ ବଡ଼ ଦୁର୍ଘଟଣା ଘଟୁଛି ା ଏହାକୁ ନେଇ ସହରରେ ଜନ ଅସନ୍ତୋଷ ପ୍ରକାଶ ପାଇଛି ା ବିଭିନ୍ନ ସଙ୍ଗଠନ ଓ ସହରବାସୀଙ୍କ ପକ୍ଷରୁ ଟ୍ରାଫିକ୍ ସମସ୍ୟାର ନିରାକାରଣ ପାଇଁ ଦାବି ହୋଇ ଆସୁଥିଲେ ମଧ୍ୟ ପ୍ରଶାସନର ନିଦ ଭାଙ୍ଗୁନାହିଁ ବୋଲି ଅଭିଯୋଗ ହୋଇଛି ା
ସୂଚନାଯୋଗ୍ୟ,୨୦୦୯ରେ ତତ୍କାଳୀନ ଯାଜପୁର ଏସ୍ପି ଟ୍ରାଫିକ ସମସ୍ୟାର ସମାଧାନ ପାଇଁ ଏକ ବ୍ଲୁ ପ୍ରିଣ୍ଟ ପ୍ରସ୍ତୁତ କରି ଟ୍ରାଫିକ ପୋଲିସ ନିଯୁକ୍ତ ଉପରେ ଗୁରୁତ୍ୱାରୋପ କରିଥିଲେ ା ଏ ସଂକ୍ରାନ୍ତରେ ଏକ ରିପୋର୍ଟ ଗୃହ ବିଭାଗକୁ ପଠାଇଥିଲେ । ଇତିମଧ୍ୟରେ ଦୀର୍ଘ ବର୍ଷ ବିତିଯାଇଥିଲେ ମଧ୍ୟ ଉକ୍ତ ଫାଇଲ ନାଲିଫିତା ତଳେ ଚାପି ହୋଇ ରହିଛି । ଚୋରଦା, ଚୋରଦା ବାଇପାସ୍, ଫାୟାର ଷ୍ଟେଶନ ଛକ, ଧାଳଗିରି, ବେଣାପୁର ଛକରେ ଟ୍ରାଫିକ ସିଗ୍ନାଲ ପୋଷ୍ଟ ପ୍ରତିଷ୍ଠା କରିବା ପାଇଁ ଏକ ପ୍ରସ୍ତାବ ଗୃହ ବିଭାଗକୁ ପଠାଯାଇଥିଲା । କିନ୍ତୁ ଏ ସମ୍ପର୍କରେ ଅଦ୍ୟାବଧି କୌଣସି ପଦକ୍ଷେପ ନିଆ ନ ଯିବା ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି। ଏବେ ଗ୍ରୀଷ୍ମ ପ୍ରବାହ ଚାଲିଥିଲା ବେଳେ ପୂର୍ବାହ୍ନ ଓ ଅପରାହ୍ନରେ ସହରର ଛକରେ ଅସମ୍ଭବ ଭିଡ଼ ହେଉଛି ।
ଅନ୍ୟପକ୍ଷେ ଗୋପବନ୍ଧୁ ଛକ ଓ ଡାକବଙ୍ଗଳା ଛକ ନିକଟରେ ଥିବା ରେଳ ଫାଟକ ଘଣ୍ଟା ଘଣ୍ଟା ଧରି ପଡିରହିବା ଦ୍ୱାରା ଟ୍ରାଫିକ ସମସ୍ୟାକୁ ଦ୍ୱିଗୁଣିତ କରୁଛି ା କଳିଙ୍ଗନଗର ଶିଳ୍ପାଞ୍ଚଳର କର୍ମଚାରୀମାନଙ୍କୁ ନେବା ଆଣିବାରେ ନିୟୋଜିତ ଶତାଧିକ ବସ୍ ଓ ଯାନବାହାନ ଟ୍ରାଫିକ୍ ସମସ୍ୟାକୁ ଅଧିକ ଜଟିଳ କରୁଛି ା ଯାହାଫଳରେ ରୋଗୀ ନେଇ ଯାଉଥିବା ଆମ୍ବୁଲାନ୍ସ ଓ ଅନ୍ୟ ଜରୁରୀ ଗାଡ଼ିଗୁଡ଼ିକ ବହୁ ଘଣ୍ଟା ଧରି ଟ୍ରାଫିକରେ ଫସି ରହୁଛି ା ଯାଜପୁରରୋଡ଼ ପୋଲିସ ପକ୍ଷରୁ ନାମକୁ ମାତ୍ର କିଛି ହୋମଗାର୍ଡଙ୍କୁ ବିଭିନ୍ନ ଛକରେ ମୁତୟନ କରାଯାଇଛି । ସେମାନେ ଟ୍ରାଫିକ ନିୟମ ବିଷୟରେ ଅନଭିଜ୍ଞ ଥିବାରୁ ଟ୍ରାଫିକ ନିୟନ୍ତ୍ରଣରେ ବିଫଳ ହେଉଛନ୍ତି ବୋଲି ସହରବାସୀ କହିଛନ୍ତି ା
ଏସମ୍ପର୍କରେ ଯାଜପୁରରୋଡ଼ ଆଦର୍ଶ ଥାନା ଅଧିକାରୀ ଉପେନ୍ଦ୍ର କୁମାର ପ୍ରଧାନଙ୍କୁ ପଚାରିବାରେ ସେ କହିଛନ୍ତି, ସହରର ମୁଖ୍ୟ ଛକରେ ଜଣେ ହୋମଗାର୍ଡ ଓ ଜଣେ କନ୍ଷ୍ଟେବଳ ମୁତୟନ କରାଯାଇ ଟ୍ରାଫିକ ନିୟନ୍ତ୍ରଣ କରାଯାଉଛି। ଅଧିକାଂଶ ସମୟରେ ଶିଳ୍ପାଞ୍ଚଳ ବସ୍ଗୁଡ଼ିକ ରାସ୍ତାରେ ଯିବା ଆସିବା ଦ୍ୱାରା ଟ୍ରାଫିକ ସମସ୍ୟା ବୃଦ୍ଧି ପାଉଛି ା ପୋଲିସ ପକ୍ଷରୁ ସହରର ଟ୍ରାଫିକ ସମସ୍ୟା ଯଥା ସମ୍ଭବ ନିୟନ୍ତ୍ରଣ କରାଯାଉଛି ା
