କେନ୍ଦୁଝର,୧୬ା୧୧(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ମୁଖ୍ୟାଳୟ ପରିସରରୁ ରୋଗୀ ତଥା ରୋଗୀ ସମ୍ପର୍କୀୟଙ୍କ ବିଭିନ୍ନ ସାମଗ୍ରୀ ଚୋରି ହେଉଛି। ଫଳରେ ଏହାକୁ ନେଇ ଅସନ୍ତୋଷ ବଢୁଛି। ଶୁକ୍ରବାର ରାତିରେ ଏସ୍ଏନ୍ସିୟୁ (ଶିଶୁ) ଓ୍ବାର୍ଡରେ ଜଣେ ରୋଗୀଙ୍କ ସମ୍ପର୍କୀୟ ଶତିନ୍ଦ୍ର ମହାନ୍ତଙ୍କ ମୋବାଇଲ ଚୋରି ହେବା ନେଇ ଅଭିଯୋଗ ହୋଇଛି। ତାଙ୍କ ଘର ମୟୂରଭଞ୍ଜ ଜିଲା ଯଶୀପୁର ଅଞ୍ଚଳରେ ବୋଲି ଜଣାପଡ଼ିଛି। ସେ ଗତ ୧୨ ତାରିଖରୁ ଏଠାକୁ ଆସି ନବଜାତ ଶିଶୁର ଚିକିତ୍ସା କରାଉଛନ୍ତି। ସବୁଦିନ ଭଳି ଏସ୍ଏନ୍ସିୟୁ ଓ୍ବାର୍ଡ ବାହାରେ ବାରଣ୍ଡାରେ ଶୋଇଥିବାବେଳେ ଚୋରି ହୋଇଥିବା ଅଭିଯୋଗ କରିଛନ୍ତି।
ସୂଚନାଯୋଗ୍ୟ, ଜିଲା ମୁଖ୍ୟାଳୟ ଚିକିତ୍ସାଳୟରେ ସୁରକ୍ଷା ପାଇଁ ଲକ୍ଷାଧିକ ଟଙ୍କା ବ୍ୟୟରେ ଏକ ଘରୋଇ ସଂସ୍ଥା ଜରିଆରେ ସୁରକ୍ଷା ବ୍ୟବସ୍ଥା କରାଯାଇଛ। ତେବେ ଉପଯୁକ୍ତ ତଦାରଖ ଅଭାବରୁ ସୁରକ୍ଷାକର୍ମୀମାନେ ଡ୍ୟୁଟି ସଠିକ୍ ଭାବରେ କରୁନାହାନ୍ତି। ଫଳରେ ଡାକ୍ତରଖାନା ପରିସରରୁ ଗାଡ଼ିଠାରୁ ଆରମ୍ଭ କରି ରୋଗୀ ଓ ତାଙ୍କ ସମ୍ପର୍କୀୟଙ୍କ ବିଭିନ୍ନ ପ୍ରକାରର ସାମଗ୍ରୀ ଚୋରି ହେଉଛି। ଏନେଇ ଭୟରେ ଅନେକ କିଛି କହୁ ନ ଥିବାବେଳେ ଅନେକ ଥାନାରେ ଲିଖିତ ଅଭିଯୋଗ କରୁଛନ୍ତି। ଏପରିକି ମେଡିକାଲ ପରିସରରେ ଅବାଧ ମଦ, ଗଞ୍ଜେଇ ତଥା ଡ୍ରଗ୍ସ ଖାଇ ବାହାର ଅସାମାଜିକ ଲୋକ ଏଭଳି କାଣ୍ଡ ଭିଆଉଥିଲେ ହେଁ ସେସବୁ ରୋକାଯାଇ ପାରୁନାହିଁ ବୋଲି ସାମାଜିକ କର୍ମୀ ଦିଲ୍ଲୀପ କୁମାର ସାହୁ କହିଛନ୍ତି। ଏନେଇ ଅଭିଯୋଗ କଲେ ମଧ୍ୟ ସ୍ବାସ୍ଥ୍ୟ ବିଭାଗ କୌଣସି ଦୃଢ଼ କାର୍ଯ୍ୟାନୁଷ୍ଠାନ ଘରୋଇ ଠିକା ସିକ୍ୟୁରିଟି ସଂସ୍ଥା ବିରୋଧରେ ନେଉ ନ ଥିବାରୁ ଏଭଳି ପରିସ୍ଥିତି ଉପୁଜିଛି ବୋଲି ଆଇନଜୀବୀ ସୁରଜ ମହାପାତ୍ର କହିଛନ୍ତି। ସେହିପରି ଲକ୍ଷାଧିକ ଟଙ୍କା ବ୍ୟୟରେ ସିସିଟିଭି କ୍ୟାମେରା ଲଗାଯାଇଥିଲେ ହେଁ ବହୁ କ୍ୟାମେରା କାମ କରୁନାହିଁ। ତେବେ ଏହି କାମ କରିଥିବା ସଂସ୍ଥା ଏହାର ମରାମତି କରୁ ନ ଥିଲେ ମଧ୍ୟ ମେଡିକାଲ କର୍ତ୍ତୃପକ୍ଷ ତାଗିଦ କରୁ ନ ଥିବାରୁ ଏହାର ଫାଇଦା ଅସାମାଜିକ ଲୋକମାନେ ଉଠାଉଛନ୍ତି ା ବିଶେଷକରି ରାତିରେ ସୁରକ୍ଷା କର୍ମୀମାନେ ଠିକ୍ ଭାବରେ ଡ୍ୟୁଟି କରୁ ନ ଥିବାରୁ ଅସାମାଜିକ ଲୋକ ତଥା ଚୋରଙ୍କୁ ସୁହାଉଛି। ଫଳରେ ମେଡିକାଲ କର୍ମଚାରୀ, ଡାକ୍ତରମାନେ ମଧ୍ୟ ଅସୁରକ୍ଷିତ ଅବସ୍ଥାରେ ରହୁଛନ୍ତି। ଏଣୁ ଏନେଇ ତୁରନ୍ତ ଜିଲା ପ୍ରଶାସନ ପଦକ୍ଷେପ ନେଇ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରିବା ସହ ଅସାମାଜିକ ଲୋକ ଓ ଚୋରଙ୍କୁ ଦମନ କରିବାକୁ ଦାବି ହେଉଛି।
