ନୂଆଦିଲ୍ଲୀ,୧୬।୩: ନିର୍ବାଚନ କମିଶନରଙ୍କ ନିଯୁକ୍ତିରେ ପ୍ରତିବନ୍ଧକ ଲଗାଇବା ସମ୍ପର୍କରେ ସୁପ୍ରିମକୋର୍ଟରେ ଶୁଣାଣି ହୋଇଛି। କିନ୍ତୁ କୋର୍ଟ ଦୁଇ ନୂଆ ଇସିଙ୍କ ନିଯୁକ୍ତିରେ ରୋକ୍ ଳଗାଇବାକୁ ମନା କରିଛନ୍ତି। ଏହାର ପରବର୍ତ୍ତୀ ଶୁଣାଣି ମାର୍ଚ୍ଚ ୨୧ ଗୁରୁବାର ହେବ। ଏହି ପରିପ୍ରେକ୍ଷୀରେ ଆବେଦନକାରୀଙ୍କ ଓକିଲ ବିକାଶ ସିଂ କହିଛନ୍ତି, ନିର୍ବାଚନ କମିଶନରଙ୍କ ନିଯୁକ୍ତି ମାର୍ଚ୍ଚ ୧୫ରେ ହୋଇଥା’ନ୍ତା କିନ୍ତୁ ଗୋଟିଏ ଦିନ ପୂର୍ବରୁ ତାଙ୍କୁ ନିଯୁକ୍ତ କରାଯାଇଛି। ଏନେଇ ଜଷ୍ଟିସ ସଞ୍ଜୀବ ଖାନ୍ନା, ଜଷ୍ଟିସ ଦୀପଙ୍କର ଦତ୍ତା ଏବଂ ଜଷ୍ଟିସ ଅଗଷ୍ଟିନ ଜର୍ଜ ମାସିହଙ୍କ ବେଞ୍ଚ ସରକାରଙ୍କୁ ପ୍ରଶ୍ନ କରିଛନ୍ତି, ଏହି ମାମଲା କୋର୍ଟରେ ବିଚାରାଧୀନ ଥିବାବେଳେ କାହିଁକି ନିଯୁକ୍ତି ଦିଆଯାଇଛି? ମାର୍ଚ୍ଚ ୨୧ ରେ ସରକାର ଏନେଇ ଜବାବ ଦାଖଲ କରିବେ। ମାମଲା ପୂର୍ଣ୍ଣ ସମାଧାନ ନ ହେବା ପର୍ଯ୍ୟନ୍ତ ନିର୍ବାଚନ କମିଶନରଙ୍କ ପଦ ଖାଲି ରଖିବାକୁ ସୁପ୍ରିମକୋର୍ଟଙ୍କୁ ADR ଦାବି କରିଛି।
କହିରଖୁଛୁ କି, ଗୁରୁବାର ସଂଧ୍ୟାରେ କେନ୍ଦ୍ର ସରକାର ପୂର୍ବତନ ଆଇଏଏସ ଅଧିକାରୀ ଗଣେଶ କୁମାର ଏବଂ ସୁଖବୀର ସାନ୍ଧୁଙ୍କୁ ନିର୍ବାଚନ କମିଶନର ଭାବେ ନିଯୁକ୍ତ କରିଛନ୍ତି। ସରକାରଙ୍କୁ ଏକାସାଙ୍ଗରେ ଦୁଇ ଜଣ କମିଶନର ନିଯୁକ୍ତ କରିବାକୁ ପଡିଥିଲା କାରଣ ଜଣେ ନିର୍ବାଚନ କମିଶନର (ଅନୁପ ଚନ୍ଦ୍ର ପାଣ୍ଡେ) ଗତ ମାସରେ ଅବସର ନେଇଥିବାବେଳେ ଚଳିତ ମାସରେ ଅନ୍ୟ ଜଣେ ନିର୍ବାଚନ କମିଶନର (ଅରୁଣ ଗୋଏଲ) ତାଙ୍କ କାର୍ଯ୍ୟକାଳ ଶେଷ ହେବାର ବହୁ ପୂର୍ବରୁ ଇସ୍ତଫା ଦେଇଛନ୍ତି। ତେବେ ନିର୍ବାଚନ କମିଶନରଙ୍କ ନିଯୁକ୍ତିରେ କାହିଁକି ସୁପ୍ରିମକୋର୍ଟଙ୍କୁ ଚୟନ କମିଟିରୁ ହଟାଯାଇଛି ଏନେଇ ମାମଲାର ଶୁଣାଣି ଚାଲିଛି।
