ଆରଡ଼ି, ୭ା୪ (ଡି.ଏନ.ଏ.): କୋଭିଡ୍ ଯୋଗୁ ଦୁଇବର୍ଷ ହେଲା ବିଦ୍ୟାଳୟର ଛାତ୍ରୀଛାତ୍ର ମଧ୍ୟାହ୍ନ ଭୋଜନ ଖାଇବାରୁ ବଞ୍ଚିତ ହୋଇଥିଲେ। ଚଳିତମାସ ୨ ତାରିଖରୁ ଛାତ୍ରୀଛାତ୍ରଙ୍କ ପାଇଁ ପୁନଃ ମଧ୍ୟାହ୍ନଭୋଜନ ପ୍ରସ୍ତୁତ ହେବ ବୋଲି ଗଣଶିକ୍ଷା ବିଭାଗ ସ୍ପଷ୍ଟ କରିବା ସହ ଏ ସମ୍ପର୍କିତ ନିର୍ଦ୍ଦେଶନାମା ପ୍ରକାଶ ପାଇଥିଲା। ଭଦ୍ରକ ଜିଲା ଚାନ୍ଦବାଲି ବ୍ଲକ ଆଖଣ୍ଡଳମଣି ନୋଡାଲ ଓ ମଠଡିହ ନୋଡାଲ ଉଚ୍ଚ ବିଦ୍ୟାଳୟ କ୍ଲଷ୍ଟର ଅଧୀନରେ ଥିବା କେତୋଟି ସ୍କୁଲକୁ ଛାଡ଼ି ପ୍ରାୟ ସମସ୍ତ ସ୍କୁଲରେ ଚାଉଳ ଯୋଗାଣ ହୋଇ ନ ଥିବାରୁ ୩ ଦିନ ଧରି ମଧ୍ୟାହ୍ନଭୋଜନ ପ୍ରସ୍ତୁତ ହୋଇ ନ ଥିଲା। ଏ ସମ୍ପର୍କରେ ‘ରନ୍ଧା ହେଲାନି ମଧ୍ୟାହ୍ନଭୋଜନ’ ଶୀର୍ଷକ ଖବର ମଙ୍ଗଳବାର ଧରିତ୍ରୀରେ ପ୍ରକାଶ ପରେ ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟ ପକ୍ଷରୁ ପଦକ୍ଷେପ ନିଆଯାଇଛି। ବୁଧବାର ୨ କ୍ଲଷ୍ଟର ଅଧୀନରେ ଥିବା ସମସ୍ତ ସ୍କୁଲରେ ମଧ୍ୟାହ୍ନଭୋଜନ ପ୍ରସ୍ତୁତ କରାଯାଇଥିଲା। ଦୁଇବର୍ଷ ପରେ ଛାତ୍ରୀଛାତ୍ର ମଧ୍ୟାହ୍ନଭୋଜନରେ ଭାତ ଓ ଅଣ୍ଡା ତରକାରୀ ଖାଇଥିଲେ। ବ୍ଲକ ଶିକ୍ଷାଧିକାରୀଙ୍କ କାର୍ଯ୍ୟାଳୟ ପକ୍ଷରୁ ଚାଉଳ ଯୋଗାଣକାରୀ ସଂସ୍ଥାର କର୍ମକର୍ତ୍ତାଙ୍କୁ ୨ କ୍ଲଷ୍ଟରରେ ଥିବା ସମସ୍ତ ସ୍କୁଲକୁ ତୁରନ୍ତ ଚାଉଳ ଯୋଗାଇବାକୁ କୁହାଯାଇଥିଲା। ଫଳରେ ବୁଧବାର ସକାଳୁ ସମସ୍ତ ବିଦ୍ୟାଳୟକୁ ୨ ବସ୍ତା ଲେଖାଏ ଚାଉଳ ଯୋଗାଇ ଦିଆଯାଇଛି। ୨/୩ ଦିନ ପରେ ଏସବୁ ସ୍କୁଲକୁ ମାସକ ପାଇଁ ଆଗୁଆ ଚାଉଳ ଯୋଗାଣ କରାଯିବ ବୋଲି ଯୋଗାଣକାରୀ ସଂସ୍ଥା ପକ୍ଷରୁ କୁହାଯାଇଛି।
