ଉମରକୋଟ,୨୮।୧୧(ସ୍ବ.ପ୍ର.): ଆଜିର ବିଜ୍ଞାନ ଯୁଗରେ ସୁବିଧା ପାଇଁ ମଣିଷ ଅନେକ ଆବିଷ୍କାର କରୁଛି। କିନ୍ତୁ ଏହାଦ୍ୱାରା ବେଳେବେଳେ କେତେକ ଅସୁବିଧା ଦେଖାଯିଏ। ଏପରିକି କୃଷି କାର୍ଯ୍ୟ ମଧ୍ୟ ପ୍ରଭାବିତ ହେଉଛି। ଏହାର ଉଦାହରଣ ଦେଖିବାକୁ ମିଳିଛି ନବରଙ୍ଗପୁର ଜିଲା ଉମରକୋଟ ଅଞ୍ଚଳରେ। ଉମରକୋଟ ପୌରାଞ୍ଚଳର ବିଭିନ୍ନ ୱାର୍ଡକୁ ସଂଯୋଗ କରୁଥିବା ରାସ୍ତାଗୁଡ଼ିକରେ ଲାଗିଥିବା ଷ୍ଟ୍ରିଟଲାଇଟ ଯୋଗୁ କେତେଜଣ ଚାଷୀଙ୍କ ଫସଲ ପ୍ରଭାବିତ ହୋଇଥିବା ଅଭିଯୋଗ ଆସିଛି । ଷ୍ଟ୍ରିଟ୍ ଲାଇଟ ଆଲୁଅ ଯେତେ ଦୂର ଯାଏ ପଡିଛି ସେହି ସ୍ଥାନରେ ଧାନଗଛରେ ଫୁଲ ଆସିନାହିଁ। ଏ ନେଇ ଜିଲା କୃଷି ଅଧିକାରୀ ବିଜୟ କୁମାର ପଟ୍ଟନାୟକଙ୍କୁ ପଚାରିବାରୁ ଧାନଗଛ ସ୍ବଳ୍ପ ସମୟରେ ଚାଷ ହୁଏ। ସବୁବେଳେ ଗଛ ଉପରେ ଆଲୋକ ପଡୁଥିବା ଯୋଗୁ ଧାନ ଗଛରେ ଫୁଲ ଆସିପାରିଲା ନାହିଁ। ଅନ୍ଧାର ନ ହେଲେ କୌଣସି ସ୍ବଳ୍ପ ସମୟ ଚାଷ ଫସଲରେ ଫୁଲ ଆସିବ ନାହିଁ। ଧାନ କେଣ୍ଡା ଧରିବାରେ ଅସୁବିଧା ହେବ। ଯଦି ଏହି ସ୍ଥାନରେ ଚାଷ କରିବାର ଅଛି ତେବେ ଗଛରେ ଫୁଲ ଆସିବା ସମୟରେ ଲାଇଟ୍ ବନ୍ଦ ବ୍ୟବସ୍ଥା କରିବା ଜରୁରୀ ବୋଲି ସେ କହିଛନ୍ତି।
ଉମରକୋଟ ସହରରୁ ନୂଆଁଗୁଡ଼ା ପର୍ଯ୍ୟନ୍ତ ପ୍ରାୟ ୨ କି.ମି. ରାସ୍ତାରେ ୧୫୦ଟି ଖୁଣ୍ଟ ପୋତି ଆଲୋକୀକରଣ ବ୍ୟବସ୍ଥା ଚଳିତ ବର୍ଷ କରାଯାଇଛି। ସେଥିରୁ ୯୦ଟି ବିଦ୍ୟୁତ୍ ଖୁଣ୍ଟ ଧାନଜମି କଡ଼ରେ ରହିଛି। ରାତିରେ ପଥଚାରୀଙ୍କ ସୁବିଧା ପାଇଁ ବିଦ୍ୟୁତ୍ ଖୁଣ୍ଟଗୁଡିକରେ ହୋଇଥିବା ଆଲୋକୀକରଣ ବ୍ୟବସ୍ଥା କରାଯାଇଥିବାବେଳେ ଯେଉଁ ଗଛ ଉପରେ ରାତିସାରା ବିଜୁଳି ଆଲୁଅ ପଡୁଛି ସେଠାରେ ଫୁଲ ମଧ୍ୟ ଫୁଟିନାହିଁ। ଆଲୁଅ ନ ପଡ଼ିବା ସ୍ଥାନରେ ଫସଲ ହୋଇଛି। କିନ୍ତୁ ଯେଉଁଠାରେ ଆଲୁଅ ପଡୁଛି ସେଠାରେ ଧାନ ଗଛ ବଢିଛି, କିନ୍ତୁ ଫଳ ଫଳିଲା ନାହିଁ। ରାସ୍ତାକଡରେ ଜମି ଥିବା ଚାଷୀ ଏବେ ମୁଣ୍ଡରେ ହାତ ଦେଇ ବସିଛନ୍ତି। ଧାରକରଜ କରି ଚାଷ କରିଥିଲୁ। ଷ୍ଟ୍ରିଟ୍ ଲାଇଟ ଆଲୁଅ ଯୋଗୁ ଧାନ ଫସଲ ନଷ୍ଟ ହେଲା। ମହାଜନକୁ ଋଣ ପରିଶୋଧ କିଭଳି କରିବେ ବୋଲି ଦୁଃଖରେ ଚାଷୀ ପ୍ରଶ୍ନ କରିଛନ୍ତି। ପ୍ରାୟ ୧୦ଏକର ଜମିରେ ଫସଲ ନଷ୍ଟ ହୋଇଥିବା ଅନୁମାନ କରାଯାଉଛି। ଏଥିସହ କ୍ଷତିପୂରଣ ଦେବାକୁ ଚାଷୀମାନେ ପ୍ରଶାସନକୁ ନିବେଦନ କରୁଛନ୍ତି। ଏପରି କ୍ଷତିଗ୍ରସ୍ତ ଚାଷୀଙ୍କ ପାଇଁ ସରକାରୀସ୍ତରରେ କୌଣସି କ୍ଷତିପୂରଣ ବ୍ୟବସ୍ଥା ନାହିଁ ବୋଲି ଜିଲା କୃଷି ଅଧିକାରୀ କହିଛନ୍ତି।
