ଦିଗପହଣ୍ଡି,୫।୬(ଡି.ଏନ.ଏ.): ଦିଗପହଣ୍ଡି ଥାନା ଇଲାକାର ମଧ୍ୟସ୍ଥଳ ଡେଙ୍ଗାଓସ୍ତା – ସିଙ୍ଗପୁର ଛକ ଚୋରା ମଦ ବ୍ୟବସାୟୀଙ୍କ ଅମରାବତୀ ପାଲଟିଛି। ଚୋରା ବିଦେଶୀ ମଦ କାରବାରର ମୁଖ୍ୟ ବ୍ୟକ୍ତି ଜଣକ ଏହି ଅଞ୍ଚଳ ପାଇଁ ଦେଶୀ ମଦ ବିକ୍ରି ପାଇଁ ଲାଇସେନ୍ସ ହାସଲ କରି ଦୀର୍ଘଦିନ ହେଲା ବ୍ୟବସାୟ ଚଳାଇଥିବା ବେଳେ ଏବେ ନକଲି ବିଦେଶୀ ମଦ କାରବାର କରି ବେଶ୍ ମୁନାଫା ଉଠାଉଥିବା ବେଳେ ଅବକାରୀ ବିଭାଗ ଏବଂ ସ୍ଥାନୀୟ ପୋଲିସ ସବୁ ଜାଣି କିଛି ନ ଜାଣିବା ପରି ଚୁପ୍ ରହୁଥିବାରୁ ଚୋରା ବିଦେଶୀ ମଦ କାରବାର ବୃଦ୍ଧି ପାଉଛି। ଡେଙ୍ଗାଓସ୍ତା, ପୋଡ଼ାମାରି ଗ୍ରାମର ନିର୍ଦ୍ଦିଷ୍ଟ ପାନ ଦୋକାନ, ଢ଼ାବା ହୋଟେଲ, ଜଳଖିଆ ଦୋକାନ ଏବଂ ରାଶନ ଦୋକାନଗୁଡ଼ିକରେ ଖୁଲମଖୁଲା ଦେଶୀ ଓ ବିଦେଶୀ ମଦ ବିକ୍ରି ହେଉଛି। ପୋଡ଼ାମାରି, ଡେଙ୍ଗାଓସ୍ତା ବଜାର, ସିଙ୍ଗପୁର, ରତ୍ନମଣିପୁର, ଡେଙ୍ଗାଓସ୍ତା-ଭୀଷ୍ମଗିରି ଛକ, କଂସାମାରି, ଧରମପୁର, ଛଣମେରି, ଫାସିଗୁଡ଼ା, ମଳାଭଞ୍ଜା, ରାଧାନଗର ସମେତ ଆଖାପାଖ ଗ୍ରାମ ଗୁଡ଼ିକରେ ୫୦ରୁ ଊଦ୍ଧର୍ବ ସ୍ଥାନରେ ବେଆଇନ ମଦ ଦୋକାନ ଖୋଲାଯାଇ ଦୈନିକ ପ୍ରାୟ ୫ ଲକ୍ଷରୁ ଊଦ୍ଧର୍ବ ଟଙ୍କାର ଦେଶୀ ଓ ବିଦେଶୀ ମଦ କାରବାର ହେଉଛି। ଡେଙ୍ଗାଓସ୍ତା – ସିଙ୍ଗପୁର ମୁଖ୍ୟରାସ୍ତା କଡ଼ରେ ଥିବା ଏକ ଘରେ ନକଲି ବିଦେଶୀ ମଦ ମହଜୁଦ କରାଯାଇ ସେଠାରୁ ବିଭିନ୍ନ ଗାଁ ଛକରେ ଥିବା ମଦ ଦୋକାନଗୁଡ଼ିକୁ ଚୋରା ଚାଲାଣ କରାଯାଉଛି। ଡେଙ୍ଗାଓସ୍ତା ଓ ପୋଡ଼ାମାରି ଅଞ୍ଚଳରେ ଦିନକୁ ଦିନ ନ କଲି ବିଦେଶୀ ମଦ ଏବଂ ଚୋରା ଦେଶୀମଦ ପାଉଚର କାରବାର ବେଧଡକ ଚାଲିଥିବା ବେଳେ ଏହାକୁ ରୋକିବାରେ ଅବକାରୀ ବିଭାଗ କିମ୍ବା ସ୍ଥାନୀୟ ପାଟପୁର ଏବଂ ଦିଗପହଣ୍ଡି ପୋଲିସର ନିଷ୍କ୍ରିୟତା ଜନ ଅସନ୍ତୋଷର କାରଣ ପାଲଟିଛି। ଡେଙ୍ଗାଓସ୍ତା, ସିଙ୍ଗପୁର, ପୋଡ଼ାମାରି ଗାଁର ୩ ଘରେ ବିପୁଳ ପରିମାଣର ନକଲି ବିଦେଶୀ ମଦ ମହଜୁଦ ଥିବା ନେଇ ସ୍ଥାନୀୟ ଜନସାଧାରଣଙ୍କୁ ଅଛପା ନଥିବା ବେଳେ ଅବକାରୀ ବିଭାଗ କିମ୍ବା ପୋଲିସ କିପରି ଜାଣି ପାରୁନାହିଁ ତାହା ସାଧାରଣରେ ବିସ୍ମୟ ସୃଷ୍ଟି କରିଛି। ଗଜପତି ଜିଲାର ଦୁର୍ଗମ ଅଞ୍ଚଳ ଗୁଡ଼ିକରେ ବ୍ୟାପକ ଗଞ୍ଜେଇ ଚାଷ ହେଉଥିବା ବେଳେ ସେଠାରୁ ପର୍ଯ୍ୟାପ୍ତ ପରିମାଣର ଗଞ୍ଜେଇ ଆଣି ଏଠାରେ ଅବାଧ କାରବାର ଚାଲିଛି। ଡେଙ୍ଗାଓସ୍ତା, ବାଙ୍ଗରଡ଼ା, କଂସାମାରି, ଧରମପୁର, ଛଣମେରି, ପଟିଗୁଡ଼ା, ରଥପୁର, ଦସେଇପୁର, କତାପଲ୍ଲୀ, ଖପରାବାଡ଼ ସମେତ ଅନୁସୂଚିତ ଜନଜାତି ବହୁଳ ଦୁର୍ଗମ ଗାଁ ଗୁଡ଼ିକ ଏବେ ଚୋରା ରନ୍ଧା ମଦ ଏବଂ ଗଞ୍ଜେଇ କାରବାରର ଟ୍ରାଞ୍ଜିଟ ପଏଣ୍ଟ ପାଲଟିଛି। ଚୋରା ଦେଶୀ ଓ ବିଦେଶୀ ମଦ କାରବାର ବିରୋଧରେ ସ୍ଥାନୀୟ ପୋଲିସ ଏବଂ ଅବକାରୀ ବିଭାଗକୁ ବାରମ୍ବାର ଅଭିଯୋଗ କରାଗଲେ ମଧ୍ୟ ବିଭାଗ ପକ୍ଷରୁ ନାମକୁ ମାତ୍ର ଚଢ଼ାଉ କରାଯାଇ କେରାଣ୍ଡି ଧରି ଶେଉଳ ଛାଡ଼ିବା ସଦୃଶ ହେଉଛି।
ଦିଗପହଣ୍ଡି ଥାନା ଅଧୀନରେ ସରକାରୀ ଲାଇସେନ୍ସ ପ୍ରାପ୍ତ ବିଦେଶୀ ମଦ ଦୋକାନ ଏବଂ ବିଦେଶୀ ମଦ ବାର ଥିବା ବେଳେ ପୁନର୍ବାର ଡେଙ୍ଗାଓସ୍ତା ଏବଂ ପୋଡ଼ାମାରିରେ ନୂତନ ବିଦେଶୀ ମଦ ଦୋକାନ ଖୋଲିବା ପାଇଁ ମଧ୍ୟ ଯୋଜନା ଚାଲିଛି। ଯଦ୍ୱାରା ଏହି ଅଞ୍ଚଳର ଜନସାଧାରଣଙ୍କ ଆର୍ଥିକ ମାନ ଦଣ୍ଡ ଦୁର୍ବଳ ହୋଇପଡ଼ିବା ଆଶଙ୍କା ରହିଛି। ଏଣୁ ଉକ୍ତ ଅଞ୍ଚଳରେ ବେଆଇନ ଭାବେ ଚୋରା ଦେଶୀ ଓ ବିଦେଶୀ ମଦ ବ୍ୟବସାୟରେ ସମ୍ପୃକ୍ତ ଥିବା ବ୍ୟକ୍ତିମାନଙ୍କୁ ଚିହ୍ନଟ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଜନସାଧାରଣଙ୍କ ପକ୍ଷରୁ ଅବକାରୀ ଏସ୍ପି ଏବଂ ପୋଲିସ ଏସପିଙ୍କୁ ଲିଖିତ ସ୍ମାରକପତ୍ର ପ୍ରଦାନ କରାଯାଇଛି।
