ଢେଙ୍କାନାଳ ଅଫିସ, ୨୭।୪: ଢେଙ୍କାନାଳ ଜିଲା ମୁଖ୍ୟ ଚିକିତ୍ସାଳୟରେ ଅବ୍ୟବସ୍ଥା ସୀମା ଟପିଛି। ଜିଲା ସ୍ବାସ୍ଥ୍ୟସେବାର ପ୍ରମୁଖ ପ୍ରତିଷ୍ଠାନ ବୋଲାଉଥିବା ଏହି ମେଡିକାଲରେ ୧୨୫ ଏସି ଏବଂ ୨ ଲିଫ୍ଟ ଅଚଳ ହୋଇପଡ଼ିଛି। ୮୦ ଷ୍ଟାବିଲାଇଜର ମଧ୍ୟ ଖରାପ ହୋଇଯାଇଛି। ଅସହ୍ୟ ଗ୍ରୀଷ୍ମ ପ୍ରବାହରେ ରୋଗୀ, ସମ୍ପର୍କୀୟ ସନ୍ତୁଳି ହେଉଥିବା ବେଳେ ସ୍ବାସ୍ଥ୍ୟକେନ୍ଦ୍ର କର୍ତ୍ତୃପକ୍ଷଙ୍କ ଅପାରଗତା ପଦାରେ ପଡ଼ିଛି।
ଢେଙ୍କାନାଳ ଜିଲାବାସୀଙ୍କୁ ଗୁଣାତ୍ମକ ସ୍ବାସ୍ଥ୍ୟସେବା ଯୋଗାଇଦେବା ଲକ୍ଷ୍ୟରେ ୨୦୧୮ ମେ’ ୨୬ରେ ଦକ୍ଷିଣକାଳୀ ରୋଡ୍ରେ କାର୍ଯ୍ୟକ୍ଷମ ହୋଇଥିଲା ଜିଲା ମୁଖ୍ୟ ଚିକିତ୍ସାଳୟ। ୭ ମହଲା ବିଶିଷ୍ଟ ଏହି ସ୍ବାସ୍ଥ୍ୟ ପ୍ରତିଷ୍ଠାନ ନିର୍ମାଣରେ ଖର୍ଚ୍ଚ ହୋଇଥିଲା ୫୦ କୋଟି ଟଙ୍କା। ହେଲେ କାର୍ଯ୍ୟକ୍ଷମ ହେବା ଦିନରୁ ଅଧିକାଂଶ ସମୟ ଏହା ବିବାଦ ଘେରରେ ରହି ଆସିଛି। ହସ୍ତଗତ ହୋଇଥିବା ସୂଚନା ଅନୁଯାୟୀ, ଜିଲା ମୁଖ୍ୟ ଚିକିତ୍ସାଳୟରେ ୨୨୭ ଏସି ଲାଗିଥିଲା। ତେବେ ରୋଗୀସେବା ପାଇଁ ଉଦ୍ଦିଷ୍ଟ ୧୭୫ଟି ଏସିରୁ ୧୨୫ଟି ଅଚଳ ହୋଇପଡ଼ିଛି। ଗୁରୁତ୍ୱପୂର୍ଣ୍ଣ ପ୍ରସୂତି ବିଭାଗରେ ୪ଟି, ଆଉଟ୍ଡୋରରେ ୩ଟି, ମେଡିସିନ୍ ବଣ୍ଟନ ପ୍ରକୋଷ୍ଠରେ ଗୋଟିଏ, ଇଞ୍ଜେକ୍ସନ ଦିଆଯିବା ଲାଗି ଉଦ୍ଦିଷ୍ଟ ପ୍ରକୋଷ୍ଠରେ ଗୋଟିଏ ଏବଂ ୧୫ଟି କ୍ୟାବିନ୍ରେ ଏସି କାମ କରୁନାହିଁ। ଏ ନେଇ ଦୃଷ୍ଟି ଆକର୍ଷଣ କରାଯିବା ସତ୍ତ୍ୱେ କର୍ତ୍ତୃପକ୍ଷ ଚେତୁନାହାନ୍ତି। ନିମ୍ନମାନର ଷ୍ଟାବିଲାଇଜର ଲଗାଯାଇଥିବାରୁ ଏଭଳି ଅବ୍ୟବସ୍ଥା ସୃଷ୍ଟି ହୋଇଥିବା କେତେଜଣ କର୍ମଚାରୀ ନାମ ଗୋପନ ରଖି କହିଛନ୍ତି। ସେହିପରି ହସ୍ପିଟାଲରେ ଥିବା ୪ ଲିଫ୍ଟ ମଧ୍ୟରୁ ୨ଟି କାମ କରୁନାହିଁ। ଲିଫ୍ଟ ବାରମ୍ବାର ଖରାପ ହେଉଥିବା ବେଳେ କର୍ତ୍ତୃପକ୍ଷ ଏହାର ସ୍ଥାୟୀ ସମାଧାନ ଦିଗରେ କୌଣସି ପଦକ୍ଷେପ ନେଉନାହାନ୍ତି। ଗ୍ରୀଷ୍ମପ୍ରବାହ ସମୟରେ ଏଭଳି ଅବ୍ୟବସ୍ଥା ତୀବ୍ର ଅସନ୍ତୋଷ ସୃଷ୍ଟି କରିଛି।
ଏ ସମ୍ପର୍କରେ ଅତିରିକ୍ତ ଜିଲା ମୁଖ୍ୟ ଚିକିତ୍ସାଧିକାରୀ (ମେଡିକାଲ) ଡା. ଜୟକୃଷ୍ଣ ନାୟକ କୁହନ୍ତି, ଅଚଳ ଏସିଗୁଡ଼ିକର ମରାମତି କାର୍ଯ୍ୟ ଜିଇଡି ପକ୍ଷରୁ ଆରମ୍ଭ ହୋଇଛି। ହସ୍ପିଟାଲ ୭ମହଲା ହୋଇଥିବାରୁ ଲମ୍ବା ଶିଡିରେ ଚଢ଼ି ଏସି ମରାମତି ପାଇଁ ସମୟ ଲାଗୁଛି। ଷ୍ଟାବିଲାଇଜରଗୁଡ଼ିକ ମଧ୍ୟ ମରାମତି କରାଯାଉଥିବା ସେ କହିଛନ୍ତି।
