ରାଜକନିକା, ୩୧ା୮(ଡି.ଏନ.ଏ.): ରାଜକନିକା ଅଞ୍ଚଳରେ ସରକାରୀ ଜାଗା, ପାଣିନାଳ, ଶଶ୍ମାନ, ଗୋଚର, ଖେଳପଡିଆ ଆଦି ସର୍ବସାଧାରଣ ସ୍ଥାନକୁ ବ୍ୟକ୍ତିଗତ ସମ୍ପତ୍ତିରେ ପରିଣତ କରୁଛନ୍ତି। ପାଣି ନିଷ୍କାସନକୁ ବାଟକୁ ବନ୍ଦ କରାଯିବା ସହ ମୁଖ୍ୟ ରାସ୍ତା କଡରେ ଦୋକାନ ଘର କରି ଭଡା ଦିଆଯାଇଥିଲା। ବହୁବାର ଜନ ଆନ୍ଦୋଳନ କରାଯିବା, ବିଭିନ୍ନ ଫୋରମରେ ଦାବି ହେବା, ଦୁର୍ଘଟଣା ବୃଦ୍ଧି ପାଇବାରେ ଲାଗିଥିଲା। ଶେଷର ବ୍ଲକ ପ୍ରଶାସନ ମଙ୍ଗଳବାର ବାଧ୍ୟ ବାଧକତାରେ ଷ୍ଟ୍ରକଚର ଛକଠାରୁ ରାଜନକିକା ଥାନା ଯାଏ ରାସ୍ତା କଡରେ ଥିବା ବେଆଇନ ଭାବେ ନିର୍ମାଣ ହୋଇଥିବା ଦୋକାନ ଘର ଭାଙ୍ଗିଛି।
କନିକା ତହସିଲ ପକ୍ଷରୁ ବହୁବାର ଏ ଦିଗରେ ପଦକ୍ଷେପ ନେବାକୁ ନୋଟିସ୍ କରାଯିବା ପରେ ପୁଣି ଚୁପ ରହିବା, ଫଳରେ ଆଇନକୁ ଭୟ ନ କରି ଏହି ରାସ୍ତାରେ ବାରମ୍ବାର ଜବରଦଖଲ ବଢି ଚାଲିଥିଲା। ନିକଟରେ ରାଜକନିକାରେ ଏକ ବସ୍ଷ୍ଟାଣ୍ଡ ପାଇଁ ସ୍ଥାନ ନିରୂପଣ କରାଯାଇ କାମ ଆରମ୍ଭ କରାଯିବାକୁ ଥିବା ବେଳେ ଏସବୁ ଜବରଦଖଲ ବାଧକ ସାଜି ଥିଲା। ତେବେ କନିକା ତହସିଲ ପକ୍ଷରୁ ମଙ୍ଗଳବାର ପୂର୍ବାହ୍ନ ୧୦ଟାରେ ଗୋଟିଏ ଜେସିବି, ଶ୍ରମିକ ସହ ଏକ ପ୍ଲାଟୁନ ଫୋର୍ସ ମୁତୟନ ରହି ପ୍ରଥମେ ରଥ ସେଠୀଙ୍କ ସ୍ଥାୟୀ ଘରକୁ ଉଚ୍ଛେଦ କରିଥିଲେ। ପରେ ଷ୍ଟ୍ରକଚର ଛକରେ ଥିବା ସମସ୍ତ ମାଛ, ଶୁଖୁଆ, ମାଂସ, ଚା ଆଦି ଦୋକାନ ଘର ଗୋଟିକ ପରେ ଗୋଟିଏ ୧୯ଟି ଦୋକାନ ଗୃହ ଉଚ୍ଛେଦ କରାଯାଇଥିବା ତହସିଲ ପକ୍ଷରୁ କୁହାଯାଇଛି। ଏହି ଜବରଦଖଲ ଉଚ୍ଛେଦ ଅପରାହ୍ନ ୫ ଟା ଯାଏ ଚାଲିଥିଲା। ଉଚ୍ଛେଦ ପରେ ରାଜକନିକା ରାସ୍ତାକଡ ସହ ବିଭିନ୍ନ ସରକାରୀ ଜାଗାକୁ ଅବରୋଧ କରି ନିଜ ମାଲିକାନା ଜାହିର କରିଥିବା ବ୍ୟକ୍ତିବର୍ଗଙ୍କ ମନରେ ଛନକା ଖେଳି ଯାଇଛି। କେବଳ ଷ୍ଟ୍ରକଚର ଛକ ନୁହେଁ କନିକା ସଦରର ସମସ୍ତ ଅଫିସ ଦପ୍ତର ଆଗକୁ ଅବରୋଧ କରାଯାଇ ବିଭିନ୍ନ ବ୍ୟକ୍ତି ସ୍ଥାୟୀ ଘର କରିଥିବାରୁ ଏହାର ଉଚ୍ଛେଦ କରିବାକୁ ମଧ୍ୟ ଉଚ୍ଛେଦ ବେଳେ ବହୁ ବ୍ୟକ୍ତି ପ୍ରଶାସନକୁ ନିବେଦନ କରୁଥିବା ଦେଖିବାକୁ ମିଳିଥିଲା। ଉଚ୍ଛେଦରେ ମାଜିଷ୍ଟ୍ରେଟ ଭାବେ ଆଳି ତହସିଲଦାର ତପନ କୁମାର ସେନାପତି ଓ କନିକା ତହସିଲଦାର ପ୍ରେମାନନ୍ଦ ବେହେରାଙ୍କ ସହ ରାଜକନିକା ପୋଲିସ ଉପସ୍ଥିତରେ କରାଯାଇଥିଲା।
