ଢେଙ୍କାନାଳ ଅଫିସ, ୮।୭ ଢେଙ୍କାନାଳ ଜିଲାର କଙ୍କଡ଼ାହାଡ଼ ବ୍ଲକର ଉପାନ୍ତ ଅଞ୍ଚଳ ଦେଇ କେନ୍ଦୁଝରକୁ ପକ୍କାସଡ଼କ ନିର୍ମାଣ ହେବ। ଏଥିଲାଗି ପୂର୍ତ୍ତ ବିଭାଗ ପକ୍ଷରୁ ସରକାରଙ୍କୁ ପ୍ରସ୍ତାବ ଦିଆଯାଇଛି। ଏହି ପ୍ରସ୍ତାବ ଅନୁମୋଦିତ ହେବା ପରେ ଖୁବ୍ଶୀଘ୍ର ନିର୍ମାଣ କାର୍ଯ୍ୟ ଆରମ୍ଭ ହେବ। ଏହି ପ୍ରକଳ୍ପ ପୂର୍ଣ୍ଣାଙ୍ଗ ରୂପ ନେଲେ ଜିଲାବାସୀଙ୍କ ଦୀର୍ଘଦିନର ସ୍ବପ୍ନ ପୂରଣ ହେବ। ଢେଙ୍କାନାଳ ସଦରରୁ କେନ୍ଦୁଝରକୁ ହାରାହାରି ୩୫ କିମି ଦୂରତା କମିଯିବ।
ଏବେ ଢେଙ୍କାନାଳରୁ କେନ୍ଦୁଝର ଯିବାକୁ ହେଲେ କାମାକ୍ଷାନଗର-ପରଜଙ୍ଗ-ଡିହଡୋଳ-ମହାବିରୋଡ଼-ତେଲକୋଇ ଦେଇ ରାସ୍ତା ରହିଛି। ଏହାର ଦୂରତା ୧୬୦ କିମି। ରାଜ୍ୟ ସଡ଼କ ପରିବହନ ବିଭାଗ ପକ୍ଷରୁ ଏକ ସରକାରୀ ବସ୍ ଭୁବନେଶ୍ୱରରୁ ଦୈନିକ ଏହି ରାସ୍ତା ଦେଇ ଯାତାୟାତ କରୁଛି। ତେବେ ଘଞ୍ଚ ଜଙ୍ଗଲ ଦେଇ ଯାଉଥିବା ଉକ୍ତ କଦର୍ଯ୍ୟ ରାସ୍ତାରେ ଯାତ୍ରୀ ପରିବହନ ସୁଗମ ହୋଇପାରୁନାହିଁ। ପ୍ରସ୍ତାବିତ ରାସ୍ତା ଢେଙ୍କାନାଳ ସଦର ମହକୁମାରୁ କାମାକ୍ଷାନଗର, କଙ୍କଡ଼ାହାଡ଼, ଦଣ୍ଡାଧର, ସୀମାନ୍ତ ରେକୁଟି ଚେକ୍ଗେଟ୍ ଦେଇ କେନ୍ଦୁଝରକୁ ସଂଯୋଗ କରିବ। ଏହାର ଦୂରତା ୧୨୫ କିମି। ନୂତନ ରାସ୍ତାରେ ପାଖାପାଖି ୩୫ କିମି କମ୍ ପଡ଼ିବ। ଏହା ଦ୍ୱାରା ଦୁଇ ଜିଲା ମଧ୍ୟମରେ ବାଣିଜ୍ୟ ବ୍ୟବସାୟ ବଢ଼ିବ। ପ୍ରକଳ୍ପକୁ ସାକାର ରୂପ ଦେବାକୁ ଖଣି ଓ ପୂର୍ତ୍ତ ବିଭାଗ ମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ ଉଭୟ ଜିଲାର ଯନ୍ତ୍ରୀଙ୍କୁ ନେଇ ରାସ୍ତାର ଭିତ୍ତିଭୂମି ଅନୁଧ୍ୟାନ କରିଛନ୍ତି। ପ୍ରଶାସନିକ ଅଧିକାରୀ, ଯନ୍ତ୍ରୀଙ୍କ ସହ ଆଲୋଚନା କରିବାପରେ ଏ ସଂକ୍ରାନ୍ତ ପ୍ରସ୍ତାବ ସରକାରଙ୍କୁ ଦିଆଯାଇଥିବା ଜଣାପଡ଼ିଛି।
ଏ ନେଇ ନିର୍ବାହୀଯନ୍ତ୍ରୀ ମନୋରଞ୍ଜନ ବିଶ୍ୱାଳ କୁହନ୍ତି, ପ୍ରସ୍ତାବ ଅନୁମୋଦିତ ହେବା ପରେ ଢେଙ୍କାନାଳ ପୂର୍ତ୍ତ ବିଭାଗ ପକ୍ଷରୁ ଜିଲା ସୀମାନ୍ତ ରେକୁଟି ପର୍ଯ୍ୟନ୍ତ ରାସ୍ତା ନିର୍ମାଣ ହେବ। ସେଠାରୁ କେନ୍ଦୁଝର ଜିଲା ପୂର୍ତ୍ତ ବିଭାଗ ରାସ୍ତା ନିର୍ମାଣ କରିବା ପାଇଁ ନିଷ୍ପତ୍ତି ହୋଇଛି ବୋଲି ସେ ସୂଚନା ଦେଇଛନ୍ତି।
