ଭୁବନେଶ୍ୱର,୨।୭(ବ୍ୟୁରୋ): ରାଜ୍ୟର ବିଭିନ୍ନ ହସ୍ପିଟାଲ କରୋନା ସଂକ୍ରମଣର ହଟ୍ସ୍ପଟ୍ ପାଲଟୁଛି। ଦିନକୁ ଦିନ ଡାକ୍ତର ଓ ହସ୍ପିଟାଲ କର୍ମଚାରୀ ସଂକ୍ରମଣର ଶିକାର ହେଉଥିବାରୁ ଆଗାମୀ ଦିନରେ ଜଟିଳ ସମସ୍ୟା ସୃଷ୍ଟି କରିବ ବୋଲି ଆଶଙ୍କା କରାଯାଉଛି। ତେବେ ପିପିଇ ଓ ଅନ୍ୟାନ୍ୟ ସୁରକ୍ଷା କିଟ୍ ଠିକ୍ ଭାବେ ବ୍ୟବହାର ହେଉ ନ ଥିବାରୁ ଏହି କୋଭିଡ୍ ଯୋଦ୍ଧାଙ୍କୁ ସଂକ୍ରମଣ ଡେଉଁଥିବା କୁହାଯାଉଛି। ଏଭଳିସ୍ଥଳେ ହସ୍ପିଟାଲଗୁଡ଼ିକ ସେମାନଙ୍କ କର୍ମଚାରୀ ଏବଂ ଡାକ୍ତରଙ୍କୁ ପିପିଇ କିଟ୍ ପରିଧାନ ପ୍ରଶିକ୍ଷଣ ଦେବା ଆବଶ୍ୟକ ବୋଲି ବିଶେଷଜ୍ଞମାନେ କହିଛନ୍ତି।
ବର୍ତ୍ତମାନ ଏରୋଜଲ୍ ବା ବାୟୁ ଦ୍ୱାରା କୋଭିଡ୍ ସଂକ୍ରମଣ ସର୍ବାଧିକ ହେଉଛି। ଯେକୌଣସି ସର୍ଜରି କିମ୍ବା ଚିକିତ୍ସା ସମୟରେ କର୍ମଚାରୀମାନେ ରୋଗୀଙ୍କ ସଂସ୍ପର୍ଶରେ ସିଧାସଳଖ ଆସୁଛନ୍ତି। ପୋଷ୍ଟ ସର୍ଜିକାଲ ମ୍ୟାନେଜମେଣ୍ଟରେ ବହୁତ ଏରୋଜଲ ଜେନେରେଟିଂ ପ୍ରୋସିଜିଓର ରହିଛି। ଇଣ୍ଟ୍ୟୁବେଶନ ଓ ଏକ୍ସଟୁବେଶନ ସମୟରେ ମଧ୍ୟ ସଂକ୍ରମଣର ଅଧିକ ସମ୍ଭାବନା ରହୁଛି। ତେଣୁ ଠିକ୍ଭାବେ ପିପିଇ କିଟ୍ ପିନ୍ଧା ନ ଯାଏ କିମ୍ବା କାଢିବାବେଳେ ସତର୍କତା ଅବଲମ୍ବନ କରା ନ ଯାଏ ତା’ହେଲେ ସଂକ୍ରମଣର ଅଧିକ ଆଶଙ୍କା ରହିଥାଏ। ଓଡ଼ିଶାରେ ଏହି କାରଣ ପାଇଁ ହସ୍ପିଟାଲ ଏବଂ ସ୍ବାସ୍ଥ୍ୟକର୍ମୀଙ୍କ କ୍ଷେତ୍ରରେ ସଂକ୍ରମଣ ବଢୁଥିବା ଅନୁମାନ କରାଯାଉଛି ବୋଲି ହାଇଟେକ୍ ମେଡିକାଲ କଲେଜ ଏବଂ ହସ୍ପିଟାଲର ଆସିଷ୍ଟାଣ୍ଟ୍ ପ୍ରଫେସର ଡ. ଶ୍ୱେତାଙ୍କ ଦାସ କହିଛନ୍ତି। ସେହିଭଳି କରୋନା ଭୂତାଣୁ ସମ୍ପର୍କରେ ବର୍ତ୍ତମାନସୁଦ୍ଧା ଯାହା ତଥ୍ୟ ମିଳିଛି ଅଧିକାଂଶ ପରବର୍ତ୍ତୀ ସମୟରେ ଭୁଲ୍ ପ୍ରମାଣିତ ହେଉଛି। ତେଣୁ ଏନେଇ ଅଧିକ ଗବେଷଣାର ଆବଶ୍ୟକତା ରହିଛି। ଓଡ଼ିଶାରେ ଏବେ ଗୋଷ୍ଠୀ ସଂକ୍ରମଣ ଆରମ୍ଭ ହୋଇସାରିଛି। ହେଲେ ଅଧିକ ଟେଷ୍ଟ ହେଉ ନ ଥିବାରୁ ସରକାରଙ୍କ ନିକଟରେ ଏନେଇ ତଥ୍ୟ ନାହିଁ। ଯଦି ଦିଲ୍ଲୀ ଭଳି ମାସ୍ ସ୍କ୍ରିନିଂ ପ୍ରୋଗ୍ରାମ କରାଯାଅନ୍ତା ତା’ହେଲେ ଗୋଷ୍ଠୀ ସଂକ୍ରମଣ ସମ୍ପର୍କରେ ଜଣାପଡ଼ନ୍ତା। ଯେତେବେଳେ ଜଣେ କୋଭିଡ୍-୧୯ ସଂକ୍ରମିତଙ୍କ କଣ୍ଟାକ୍ଟ ହିଷ୍ଟ୍ରି ମିଳୁନି, ସେତେବେଳେ ଆମେ ଜାଣିବା ଯେ ଗୋଷ୍ଠୀ ସଂକ୍ରମଣ ଆରମ୍ଭ ହୋଇସାରିଛି ବୋଲି ଡା. ଦାସ କହିଛନ୍ତି।
ସର୍ଜରି ହୋଇଥିବା ରୋଗୀଙ୍କ ମୃତ୍ୟୁ ହାର ଅଧିକ
କାର୍ଡିଓଥୋରାସିସ୍ ବା ଯେକୌଣସି ସର୍ଜରି ହୋଇଥିବା ରୋଗୀଙ୍କ କ୍ଷେତ୍ରରେ କୋଭିଡ୍-୧୯ ସଂକ୍ରମଣ ଓ ମୃତ୍ୟୁ ହାର ବହୁତ ଅଧିକ ଥିବା ଦେଖାଯାଇଛି। ଭାରତରେ ଏଭଳି କେସ୍ ବହୁମାତ୍ରାରେ ଦେଖିବାକୁ ମିଳୁଛି। ଯେଉଁମାନଙ୍କର ଏଭଳି କୌଣସି ସର୍ଜରି ବା ଅସ୍ତ୍ରୋପଚାର ହୋଇନି ସେମାନଙ୍କ କ୍ଷେତ୍ରରେ ମୃତ୍ୟୁ ସମ୍ଭାବନା ଅପେକ୍ଷାକୃତ କମ୍ ରହୁଛି। ଭାରତରେ କୋଭିଡ୍ ମୃତ୍ୟୁରେ ସର୍ଜରି ଏକ ଗୁରୁତ୍ୱପୂର୍ଣ୍ଣ ଫ୍ୟାକ୍ଟର ବୋଲି ବିଶେଷଜ୍ଞ ଡାକ୍ତର କହିଛନ୍ତି।
