ଯମଜ ସନ୍ତାନ ଜନ୍ମ କରୁଥିବା ମହିଳାମାନଙ୍କ ହୃଦରୋଗର ଆଶଙ୍କା ଦ୍ୱିଗୁଣିତ ଥାଏ। ଯମଜ ସନ୍ତାନଙ୍କ ଉପରେ ହୋଇଥିବା ଏକ ସାମ୍ପ୍ରତିକ ଅଧ୍ୟୟନରୁ ଏହା ଜଣାପଡିଛି। ଗୋଟିଏ ସନ୍ତାନକୁ ଜନ୍ମ ଦେଉଥିବା ମହିଳାମାନେ ଏହି ବିପଦରୁ ବହୁତ ଦୂରରେ ଥାଆନ୍ତି। ୟୁରୋପୀୟ ହାର୍ଟ ଜର୍ନାଲରେ ପ୍ରକାଶିତ ଏହି ଅଧ୍ୟୟନରୁ ଜଣାପଡିଛି, ଯେଉଁ ମହିଳାମାନେ ଯମଜ ସନ୍ତାନ ଜନ୍ମ ଦେଇଛନ୍ତି, ସେମାନଙ୍କୁ ମା’ ହେବାର ଗୋଟିଏ ବର୍ଷ ମଧ୍ୟରେ ହୃଦରୋଗ ଯୋଗୁ ହସ୍ପିଟାଲରେ ଭର୍ତ୍ତି ହେବାର ସମ୍ଭାବନା ଅଧିକ ଥାଏ।
ଅଧ୍ୟୟନରୁ ଜଣାପଡିଛି ଯେ, ଯଦି ଗର୍ଭାବସ୍ଥାରେ ଏପରି ମହିଳାମାନଙ୍କର ଉଚ୍ଚ ରକ୍ତଚାପ ସମସ୍ୟା ଥାଏ, ତେବେ ଯମଜ ସନ୍ତାନ ଜନ୍ମ ପରେ ହୃଦରୋଗର ଆଶଙ୍କା ଆହୁରି ବଢ଼ିଯାଏ। ଏହି ଅଧ୍ୟୟନ ଆମେରିକାର ରୁଟଗର୍ସ ବିଶ୍ୱବିଦ୍ୟାଳୟର ବୈଜ୍ଞାନିକମାନଙ୍କ ଦ୍ୱାରା କରାଯାଇଛି। ପ୍ରକାଶ ପାଇଛି ଯେ, ଗତ କିଛି ଦଶନ୍ଧି ମଧ୍ୟରେ ସାରା ବିଶ୍ୱରେ ଯମଜ ଗର୍ଭଧାରଣର ମାମଲା ବୃଦ୍ଧି ପାଇଛି। ଏହାର ମୁଖ୍ୟ କାରଣ ହେଉଛି ପ୍ରଜନନ ଚିକିତ୍ସା ଏବଂ ଅଧିକ ବୟସରେ ଗର୍ଭଧାରଣ।
ମୁଖ୍ୟ ଗବେଷକ ଡକ୍ଟର ରୁବି ଲିନ କହିଛନ୍ତି, ଯମଜ ଗର୍ଭଧାରଣ ସମୟରେ, ମାଆର ହୃଦୟକୁ ଅଧିକ କାମ କରିବାକୁ ପଡ଼ିଥାଏ ଏବଂ ପ୍ରସବ ପରେ ହୃଦୟକୁ ସ୍ବାଭାବିକ ଅବସ୍ଥାକୁ ଫେରିବାକୁ କିଛି ସପ୍ତାହ ସମୟ ଲାଗେ, ଯାହା ହୃଦରୋଗର ଆଶଙ୍କା ବୃଦ୍ଧି କରେ। ଯେଉଁ ମହିଳାମାନଙ୍କର ଗର୍ଭାବସ୍ଥାରେ ରକ୍ତଚାପ ସମସ୍ୟା ନ ଥିଲା, ସେମାନଙ୍କଠାରେ ମଧ୍ୟ ସନ୍ତାନ ପ୍ରସବ ପରେ ଗୋଟିଏ ବର୍ଷ ପର୍ଯ୍ୟନ୍ତ ହୃଦରୋଗର ଆଶଙ୍କା ରହିଥାଏ।
ଅଧ୍ୟୟନ ଦଳ ୨୦୧୦ ରୁ ୨୦୨୦ ମଧ୍ୟରେ ଆମେରିକାରେ ୩୬ ନିୟୁତ ପ୍ରସବ ମାମଲାର ତଥ୍ୟ ଅଧ୍ୟୟନ କରିଥିଲେ। ଏହା ପ୍ରକାଶ କରିଛି ଯେ, ଯମଜ ସନ୍ତାନର ମା’ମାନଙ୍କ ମଧ୍ୟରେ ହୃଦରୋଗ ଯୋଗୁ ହସ୍ପିଟାଲରେ ଭର୍ତ୍ତି ହେବାର ହାର ପ୍ରତି ୧ ଲକ୍ଷ ପ୍ରସବରେ ୧,୧୦୫.୪ ଥିଲା। ଯେତେବେଳେ ଗୋଟିଏ ସନ୍ତାନ ଜନ୍ମ କରୁଥିବା ମହିଳାମାନଙ୍କ ମଧ୍ୟରେ, ଏହି ହାର ପ୍ରତି ୧ ଲକ୍ଷ ପ୍ରସବରେ ୭୩୪.୧ ଥିଲା। ଗର୍ଭାବସ୍ଥାରେ ଯଦି ଜଣେ ମହିଳାଙ୍କର ଉଚ୍ଚ ରକ୍ତଚାପ ନ ଥାଏ, ତଥାପି ଯଦି ସେ ଯମଜ ସନ୍ତାନର ମାଆ ହୁଅନ୍ତି, ତେବେ ହୃଦରୋଗ ଯୋଗୁ ଡାକ୍ତରଖାନାରେ ଭର୍ତ୍ତି ହେବାର ଆଶଙ୍କା ଦୁଇଗୁଣରୁ ଅଧିକ ହୋଇଯାଏ। ଉଚ୍ଚ ରକ୍ତଚାପ କ୍ଷେତ୍ରରେ, ବିପଦ ଆଠ ଗୁଣ ବୃଦ୍ଧି ପାଇଥାଏ।
