ଜଗତ୍ସିଂହପୁର ଅଫିସ, ୭ା୬:ପଛୁଆବର୍ଗଙ୍କ ଅଧିକାର ଛଡ଼ାଇ ନିଆ ନ ଯାଉ। ଜାତିଭିତ୍ତିକ ଜନଗଣନା କରାଯାଉ। ଯଦ୍ଦାରା ପ୍ରତ୍ୟେକ ଜାତିର ଅର୍ଥନୈତିକ, ସାମାଜିକ ଓ ଶିକ୍ଷାଗତ ଯୋଗ୍ୟତା ଠିକ ଭାବରେ ଚିହ୍ନଟ ହୋଇପାରିବ। ମହାରାଷ୍ଟ୍ର, ହରୟଆଣା ଏବଂ ଓଡ଼ିଶା ଭଳି ରାଜ୍ୟରେ ଏହି ଜନଗଣନା କରାଯାଇ ନ ଥିବାରୁ ପଞ୍ଚାୟତ ଓ ପୌର ନିର୍ବାଚନରେ ଓବିସି ବର୍ଗଙ୍କୁ ସଂରକ୍ଷଣ ସୁବିଧା ମିଳିପାରିନାହିଁ। ଅନ୍ୟପଟେ ଓବିସି ବର୍ଗର ଲୋକ ଦେଶର ମୋଟ ଜନସଂଖ୍ୟାର ଅଧା ହୋଇଥିଲେ ସୁଦ୍ଧା ମାତ୍ର ୨୭% ସଂରକ୍ଷଣ ସୁବିଧା ରହିଛି। କେତେକ ରାଜ୍ୟରେ ମଧ୍ୟ ଏହାଠାରୁ କମ୍ ସଂରକ୍ଷଣ ଦିଆଯାଉଛି। ଆମ ରାଜ୍ୟରେ ପଞ୍ଚାୟତ ଓ ନଗରପାଳିକା ନିର୍ବାଚନରେ ଓବିସିଙ୍କ ପାଇଁ ସଂରକ୍ଷଣ ବ୍ୟବସ୍ଥା କରାଯାଇନାହିଁ । ଅନ୍ୟ ରାଜ୍ୟଗୁଡିକ ପରି ଓଡ଼ିଶା ନାମରେ ସୈନ୍ୟ ବାହିନୀରେ ରେଜିମେଣ୍ଟ ଗଠନ ହେଉ। ଓବିସିଙ୍କ ପାଇଁ ମନ୍ତ୍ରଣାଳୟ, ନ୍ୟାୟପାଳିକାରେ ନିଯୁକ୍ତି ନେଇ କଲେଜିୟମ ବ୍ୟବସ୍ଥା ହେବା ଜରୁରୀ। ଏଥିସହ ଓବିସି ମହିଳାମାନେ ପୃଥକ ସଂରକ୍ଷଣ ପାଇବା, ଚାକିରି କ୍ଷେତ୍ରରେ ସଂରକ୍ଷଣ ଓ ଛାତ୍ର ବୃତ୍ତି ଦିଆଯିବା ବ୍ୟବସ୍ଥା ହେଉ। ସରକାରୀ ଘରୋଇକରଣକୁ ବନ୍ଦ କରାଯାଉ । ସୋମବାର ଜିଲା କଂଗ୍ରେସ ପଛୁଆ ବର୍ଗ ବିଭାଗ ପକ୍ଷରୁ ଏହି ଦାବି ନେଇ ରାଷ୍ଟ୍ରପତିଙ୍କ ଉଦ୍ଦେଶ୍ୟରେ ଜିଲାପାଳଙ୍କୁ ଦାବିପତ୍ର ପ୍ରଦାନ କରାଯାଇଛି। ବିଭାଗ ସଭାପତି ବେଣୁଧର ସ୍ବାଇଁଙ୍କ ନେତୃତ୍ୱରେ ଶତାଧିକ କଂଗ୍ରେସ ନେତା ଓ କର୍ମୀ ଜଗତ୍ସିଂହପୁର ସହରରେ ଶୋଭାଯାତ୍ରାରେ ଯାଇ ଦାବିପତ୍ର ପ୍ରଦାନ କରିଛନ୍ତି। ଏଥିରେ ଜିଲା କଂଗ୍ରେସ କମିଟି ସଭାପତି ନଟବର ବାରିକ, ପୂର୍ବତନ ପୌରାଧ୍ୟକ୍ଷ ତଥା ପ୍ରଦେଶ କଂଗ୍ରେସ ସମ୍ପାଦକ ବିପ୍ଳବ ଚୌଧୁରୀ, ଜିଲା ଯୁବ କଂଗ୍ରେସ ସଭାପତି ପ୍ରଶାନ୍ତ ମଲ୍ଲିକ, ନାଉଗାଁ ବ୍ଲକ କଂଗ୍ରେସ ସଭାପତି ନିରଞ୍ଜନ ବେହୁରା, ଜଗତ୍ସିଂହପୁର ବ୍ଲକ କଂଗ୍ରେସ ସଭାପତି ଅଦ୍ୱୈତ ଜେନା, ନଗର କଂଗ୍ରେସ ସଭାପତି ଅଭୟ କୁମାର ମହାନ୍ତି, ରାଜ୍ୟ ଯୁବ କଂଗ୍ରେସ ସାଧାରଣ ସମ୍ପାଦକ ଲିପକ ସାହୁ, ପାରିଷଦ ଓମଶ୍ରୀ ସତ୍ୟ ପ୍ରକାଶ, ରାଜ୍ୟ ଛାତ୍ର କଂଗ୍ରେସ ସାଧାରଣ ସମ୍ପାଦକ କୃଷ୍ଣଚନ୍ଦ୍ର ପ୍ରଧାନ, ସେବାଦଳ ଅଧ୍ୟକ୍ଷ ଡା. ଜଗଦାନନ୍ଦ ବେହେରା, ବରିଷ୍ଠ କଂଗ୍ରେସ ନେତା ପ୍ରଦୀପ୍ତ କୁମାର ସାହୁ ପ୍ରମୁଖ ଉପସ୍ଥିତ ଥିଲେ।
