ଯାଜପୁର ଅଫିସ,୨୨ା୮: ବୈତରଣୀ ନଦୀର ଉପର ମୁଣ୍ଡରେ ଲଗାଣ ବର୍ଷା ଯୋଗୁ ଯାଜପୁର ଜିଲା ଦେଇ ପ୍ରବାହିତ ବୈତରଣୀ ନଦୀର ଜଳପତନ ବୃଦ୍ଧି ପାଇବାରେ ଲାଗିଛି। ଆଖୁଆପଦା ଠାରେ ବିପଦସଙ୍କେତ ୧୭.୮୩ ମିଟର ରହିଥିବାବେଳେ ସେଠାରେ ରବିବାର ସନ୍ଧ୍ୟା ସୁଦ୍ଧା ୧୮.୯୩ ମିଟରରେ ବନ୍ୟା ପାଣି ପ୍ରବାହିତ ହେଉଛି। ଏହାସହ ଏଠାରେ ଦିନ ସାରା ପ୍ରାୟ ୧୯ ମିଟରରେ ବନ୍ୟା ପାଣି ପ୍ରବାହିତ ହେବା ଯୋଗୁ କାଣୀ ନଦୀର ବ୍ରହ୍ମଚାରୀପାଟଣାଠାରେ ମରାମତି ହୋଇଥିବା ଘାଇ ପୁଣି ଭାଙ୍ଗିଯାଇଛି। ଫଳରେ ବନ୍ୟାଜଳ ଆଖପାଖ ଗ୍ରାମକୁ ମାଡିଯାଇ ବ୍ୟାପକ କ୍ଷତି ଘଟାଇଛି। ୩ ଦିନ ତଳେ ବନ୍ୟାପାଣି କମିଯିବା ଦ୍ୱାରା ବନ୍ୟା ଦୁର୍ଗତମାନେ ଆଶ୍ୱସ୍ତ ହେବା ସହିତ ନିଜ ବାସଗୃହକୁ ଫେରି ଘର ସଜାଡ଼ିବା ବେଳକୁ ପୁଣି ଆଉ ଏକ ବନ୍ୟା ସେମାନଙ୍କ ପାଇଁ ବେଡି ଉପରେ କୋରଡା ମାଡ଼ ସଦୃଶ ହୋଇଛି।
ଦଶରଥପୁର, କୋରେଇ, ଯାଜପୁର ଓ ବିଞ୍ଝାରପୁର ବ୍ଲକର ୩୨ ପଞ୍ଚାୟତ ୧୪୮ ଗ୍ରାମର ୧ ଲକ୍ଷ ୧୦ ହଜାର ୭୯୫ ଜନସାଧାରଣ ପ୍ରଭାବିତ ହୋଇଛନ୍ତି। ୩୧୮ ଲୋକଙ୍କୁ ସୁରକ୍ଷିତ ସ୍ଥାନରେ ଥଇଥାନ କରାଯାଇଛି। ୪,୬୦୦ ଲୋକଙ୍କୁ ରନ୍ଧା ଖାଦ୍ୟ ବଣ୍ଟନ କରାଯାଇଛି।
ଅଗଷ୍ଟ ୧୫ରେ ବ୍ରହ୍ମଚାରୀପାଟଣାଠାରେ ୧୦୦ ଫୁଟର ଘାଇ ସୃଷ୍ଟି ହୋଇଥିଲା। ୩ ଦିନ ତଳେ ଘାଇ ମରାମତି କାର୍ଯ୍ୟ ଯୁଦ୍ଧକାଳୀନଭିତ୍ତିରେ ଶେଷ ହୋଇଥିଲା। ବନ୍ୟାରେ ୧୩ ପଞ୍ଚାୟତର ୩୭ ଗ୍ରାମ କ୍ଷତିଗ୍ରସ୍ତ ହୋଇଥିବାବେଳେ ଏହା ଦ୍ୱାରା ୧୩,୮୬୦ ଜନସାଧାରଣ ପ୍ରଭାବିତ ହୋଇଥିଲେ। ୨ୟ ବନ୍ୟାରେ ଏହି ସଂଖ୍ୟା ୨୦ ହଜାର ଟପିବାର ଆଶଙ୍କା କରାଯାଉଛି। ଯାଜପୁର ବିଧାୟକ ପ୍ରଣବ ପ୍ରକାଶ ଦାସ ଘାଇ ହୋଇଥିବା ସ୍ଥାନ ପରିଦର୍ଶନ କରିବା ସହିତ ରିଲିଫ୍ ଓ ଥଇଥାନ କାର୍ଯ୍ୟ ସମ୍ପର୍କରେ ବିଭାଗୀୟ ଅଧିକାରୀଙ୍କ ସହ ଆଲୋଚନା କରିଥିଲେ। ପ୍ରଶାସନ ତରଫରୁ ପ୍ରଭାବିତ କସପା ପଞ୍ଚାୟତର ୧୦ଟି ୱାର୍ଡକୁ ରବିବାରଠାରୁ ରନ୍ଧାଖାଦ୍ୟ ଯୋଗାଇ ଦେବାର ବ୍ୟବସ୍ଥା କରାଯାଇଛି। ଅଧିକ ବନ୍ୟା ଆଶଙ୍କା କରି ପ୍ରଶାସନ ତରଫରୁ ୨ଟି ଏନ୍ଡିଆର୍ଏଫ୍ ଟିମ୍ ମୁତୟନ କରାଯାଇଛି। ଏହାସହ ୩,୭୬୯ ହେକ୍ଟର ଜମିରେ ବନ୍ୟା ପାଣି ହ୍ରାସ ପାଉଥିବା ବେଳେ ଏବେ ପୁଣି ତାହା ଭରିଯାଇଛି।
ରିପୋର୍ଟ ଅନୁସାରେ ୧୬ ଚାଳଘର, ୩୪ ଗୁହାଳ, ୨୬୮ କଚ୍ଚାଘର ନଷ୍ଟ ହୋଇଥିବାବେଳେ ଏହି ସଂଖ୍ୟା ବୃଦ୍ଧି ପାଇବାର ଆଶଙ୍କା ସୃଷ୍ଟି କରିଛି। ସେହିପରି ବନ୍ୟା ପ୍ରଭାବିତ ଘୋଷିତ ହୋଇଥିବା କସପା, ଦୁଦୁରାଅଣ୍ଟା, ମଲ୍ଲିକାପୁର, ଶୁଶୁଆ, ନିଜାମପୁର, କୟାଁ, କମାରଡିହ, ଖାନନଗର, ଜୟନ୍ତରା ଓ କଟିକଟା ପଞ୍ଚାୟତ ବାଦ୍ ଅନ୍ୟ ପଞ୍ଚାୟତଗୁଡିକୁ ମଧ୍ୟ ବନ୍ୟା ପାଣି ପଶିବାର ଆଶଙ୍କା କରାଯାଉଛି। ଲୋକଙ୍କ ଘର କାନ୍ଥ ଭୁଶୁଡ଼ିବା ସହ ଛପର ନଷ୍ଟ ହୋଇଯାଇଛି। ବିପନ୍ନମାନେ ପିଲାଛୁଆଙ୍କୁ ନେଇ ଦହଗଞ୍ଜ ହେଉଛନ୍ତି। ତଳପଟୁ ବର୍ଷାଜଳ ଘରେ ପଶି ଘରର କାନ୍ଥ ଦୁର୍ବଳ ଅବସ୍ଥାରେ ପହଞ୍ଚିଛି। ପଛପଡ଼ା, ବ୍ରହ୍ମଚାରୀପାଟଣା, କମାଳପୁର, ପଲାସାହି ଗ୍ରାମର ସ୍କୁଲଗୁଡିକରେ ବନ୍ୟା ପାଣି ପଶିଥିବାରୁ ବନ୍ୟା ଦୁର୍ଗତମାନେ ଆଶ୍ରୟ ନେବାକୁ ଠିକଣା ଖୋଜୁଛନ୍ତି। କେତେଜଣ ବନ୍ୟା ଦୁର୍ଗତ ପାଖ ପଡୋଶୀଙ୍କ ଘରେ ଆଶ୍ରୟ ନେଇଥିବାବେଳେ ଅନ୍ୟ କେତେଜଣ ଗୃହପାଳିତ ପ୍ରାଣୀ ସହ ବନ୍ଧ ହିଡ଼ରେ ରହିଥିବା ଦେଖାଯାଇଛି। ଏହି ଅଞ୍ଚଳରେ କୌଣସି ବନ୍ୟା ଆଶ୍ରୟସ୍ଥଳୀ ନିର୍ମାଣ ହୋଇ ନ ଥିବାରୁ ଏଭଳି ପରିସ୍ଥିତି ସୃଷ୍ଟି ହୋଇଛି। ସରକାର ବନ୍ୟା ପ୍ରଭାବିତ ଅଞ୍ଚଳରେ ବନ୍ୟା ଆଶ୍ରୟସ୍ଥଳୀ ନିର୍ମାଣ କରିବାକୁ ବିପୁଳ ଅର୍ଥ ଖର୍ଚ୍ଚ କରୁଛନ୍ତି। ହେଲେ ଦଶରଥପୁର ବ୍ଲକର ଉପରୋକ୍ତ ବନ୍ୟା ପ୍ରଭାବିତ ଅଞ୍ଚଳ ସେଥିରୁ ବଞ୍ଚତ୍ତ ହୋଇଛି, ଯାହା ଏବେ ବିପନ୍ନଙ୍କ ପାଇଁ ଦୁଃଖ ଆଣିଦେଇଛି ବୋଲି ମତପ୍ରକାଶ କରିଛନ୍ତି।
