ଯାଜପୁର ସଦର,୨୭ା୧୧(ସମର ବିଜୟ ଶରଣ): ଯାଜପୁର ବ୍ଲକ ଅନ୍ତର୍ଗତ ଖରସ୍ରୋତା ନଦୀ ବନ୍ଧର ରାଜଘାଟଠାରୁ କଳସପୁର ପର୍ଯ୍ୟନ୍ତ ବିପର୍ଯ୍ୟସ୍ତ ହୋଇପଡ଼ିଛି। ଜାରକା ଜଳସମ୍ପଦ ବିଭାଗ ଅଧୀନରେ ଥିବା ଏହି ବନ୍ଧର କିଛି ମାସ ତଳେ ମରାମତି କରାଯାଇଥିଲା। ଏଥିପାଇଁ ବିପୁଳ ଟଙ୍କା ଖର୍ଚ୍ଚ କରାଯାଇଥିଲା। ହେଲେ ସେ ସେବୁ ମୂଲ୍ୟହୀନ ହୋଇପଡ଼ିଛି। ଏହିଦୁର୍ବଳ ବନ୍ଧରେ ବିଗତ ଦିନରେ ବନ୍ୟା ସମୟରେ ଘାଇ ହୋଇ ବ୍ୟାପକ ଧନ ସମ୍ପତ୍ତି ନଷ୍ଟ ହୋଇଥିବା ଦେଖାଯାଇଛି। ଗତ ବନ୍ୟାରେ ଘଳିଆ ପଡ଼ିବା ଯୋଗୁ ପ୍ରଶାସନ ପକ୍ଷରୁ ବାଲି ବସ୍ତାଦେଇ ଘଳିଆ ବନ୍ଦ କରାଯାଇଥିଲା। କଳସପୁରଠାରେ ଥିବା ବାଲିଘାଟରୁ ପ୍ରତ୍ୟେକ ଦିନ ଶହଶହ ଟ୍ରିପ ବାଲି ଟ୍ରାକ୍ଟର ଓ ହାଇୱାରେ ପରିବହନ ହେଉଥିବାରୁ ନଦୀବନ୍ଧ ଆହୁରି ଦୁର୍ବଳ ହେଉଥିବା ଗ୍ରାମବାସୀ ଅଭିଯୋଗ କରିଛନ୍ତି।
ଅଣଓସାରିଆ ନଦୀବନ୍ଧର ବିଭିନ୍ନ ସ୍ଥାନରେ ଖାଲଖମା ଯୋଗୁ ବାରମ୍ବାର ଦୁର୍ଘଟଣା ଘଟୁଛି। କଳସପୁର, ମାଧପୁର, ଭୁବନପୁର, ସାନଭୁବନପୁର ଓ ତନ୍ତିଘାଇ ଆଦି ଗ୍ରାମର ଜନ ସାଧାରଣ ଏହି ବନ୍ଧରେ ଯାତାୟାତ କରନ୍ତି। ଛାତ୍ରୀଛାତ୍ର ବିଦ୍ୟାଳୟ ଓ ମହାବିଦ୍ୟାଳୟକୁ ସାଇକେଲ ଯୋଗେ ଯାଇଥାନ୍ତି। ମାତ୍ର ବନ୍ଧ ରାସ୍ତା ବିପର୍ଯ୍ୟସ୍ତ ଯୋଗୁ ସେମାନେ ବନ୍ଧରେ ପଡ଼ିଖଣ୍ଡିଆ ଖାବରା ହେଉଥିବା ଦେଖାଯାଉଛି। ନଦୀବନ୍ଧର ବିଭିନ୍ନ ସ୍ଥାନରେ ଏତେ ବଡ ଖାଲ ହୋଇଛି ଯେ, ବର୍ଷା ଦିନେ ସେଠାରେ ଘାଇ ହେବା ନିଶ୍ଚିତ। ଜଳସମ୍ପଦ ବିଭାଗ ଦ୍ୱାରା ବନ୍ଧ ସୁଦୃଢ଼ୀକରଣ କରା ଯାଉଥିବା ବେଳେ ମାଫିଆଙ୍କ ଚୋରା ବାଲି ଚାଲାଣ ଯୋଗୁ ବନ୍ଧର ଏ ଅବସ୍ଥା ହେଉଛି ବୋଲି ସାଧାରଣରେ ଅଭିଯୋଗ ହେଉଛି। ଗ୍ରାମବାସୀଙ୍କ ପକ୍ଷରୁ ଏ ସମ୍ପର୍କରେ ବିଭାଗୀୟ ଉଚ୍ଚ ଅଧିକାରୀଙ୍କୁ ବାରମ୍ବାର ଅଭିଯୋଗ କରାଯାଇଥିଲେ ମଧ୍ୟ କୌଣସି ପଦକ୍ଷେପ ନିଆ ଯାଉ ନ ଥିବା ଦେଖାଯାଇଛି। ଏ ସମ୍ପର୍କରେ ଜାରକା ଜଳସମ୍ପଦ ବିଭାଗ ନିର୍ବାହୀଯନ୍ତ୍ରୀ କାମଦେବ ଦାସଙ୍କୁ ଯୋଗାଯୋଗ କରିବାରୁ ସେ ଘଟଣାର ତଦନ୍ତ କରି ଜିଲାପାଳଙ୍କୁ ଜଣାଇବେ ବୋଲି କହିଛନ୍ତି।
