ଢେଙ୍କାନାଳ,୬।୧୧(ରତନ ନାୟାର): ଢେଙ୍କାନାଳ ଜିଲା ସଦର ରେଞ୍ଜ ମୋଟଙ୍ଗା ଥାନା ମେରାମଣ୍ଡଳୀ ରେଳ ଷ୍ଟେଶନ ନିକଟରେ ଗତ ଶୁକ୍ରବାର ବିଳମ୍ବିତ ରାତିରେ ୪୯ ହାତୀ ରେଳଧାରଣା ପାର ହେଉଥିବା ବେଳେ ତାଳଚେର ଆଡୁ ଆସୁଥିବା ଏକ ମାଲଗାଡି ଟ୍ରେନ୍ ଧକ୍କାରେ ଗୋଟିଏ ଦନ୍ତାହାତୀର ମୃତ୍ୟୁ ଘଟିଥିଲା। ଘଟଣାସ୍ଥଳରେ ସେହି ସମୟରେ ଉପସ୍ଥିତ ଥିବା ବନବିଭାଗ କର୍ମଚାରୀ, ହାତୀ ସ୍କ୍ବାଡ୍ ସଦସ୍ୟମାନଙ୍କ ସୂଚନା ମୁତାବକ କସନ ଅର୍ଡରର ନିର୍ଦ୍ଧାରିତ ବେଗଠାରୁ ମାଲଗାଡି ଟ୍ରେନ୍ର ବେଗ ଅଧିକ ଥିଲା ବୋଲି ବନବିଭାଗ ପକ୍ଷରୁ ଅଭିଯୋଗ ହୋଇଥିଲା। ଏହି ଅଭିଯୋଗକୁ ସୋମବାର ଖୋର୍ଦ୍ଧା ରୋଡସ୍ଥିତ ଡିଭିଜନାଲ ରେଲଓ୍ବେ ମ୍ୟାନେଜରଙ୍କ କାର୍ଯ୍ୟାଳୟରୁ ସିନିୟର ଡିଭିଜନାଲ କମର୍ସିଆଲ ମ୍ୟାନେଜର ଅନିଲ କୁମାର ଏସ୍ଙ୍କ ଦସ୍ତଖତ ଥାଇ ରେଳବାଇ ବିଭାଗ ପକ୍ଷରୁ ଏହାକୁ ଖଣ୍ଡନ କରାଯାଇଛି। ରେଳବାଇ ବିଭାଗ ପକ୍ଷରୁ ଜାରି ହୋଇଥିବା ପତ୍ରରେ ଦର୍ଶାଯାଇଛି ଯେ, ମେରାମଣ୍ଡଳୀ ରେଳ ଷ୍ଟେଶନଠାରୁ ହିନ୍ଦୋଳ ରୋଡ ରେଳ ଷ୍ଟେଶନ ମଧ୍ୟରେ ହାତୀ କରିଡରରେ ଏକ ସାଧାରଣ ଭାବେ ଘଣ୍ଟା ପିଛା ୪୦ କିଲୋମିଟର ବେଗ ନିର୍ଦ୍ଧାରିତ କରାଯାଇ କସନ ଅର୍ଡର ଜାରି କରାଯାଇଛି, ଯାହାକି ଅପରାହ୍ନ ୫ଟା ଠାରୁ ପରଦିନ ସକାଳ ସାଢେ ୭ଟା ପର୍ଯ୍ୟନ୍ତ ସମୟ ଅବଧି ରହିଛି। ତଦନୁଯାୟୀ ଟ୍ରେନଗୁଡିକ ଉକ୍ତ ଅଞ୍ଚଳ ଦେଇ ନିର୍ଦ୍ଧାରିତ ବେଗରେ ଯାତାୟାତ କରିଥାନ୍ତି। ଦୁର୍ଘଟଣା ରାତିରେ ମାଲଗାଡିଟି ଘଣ୍ଟାକୁ ୩୨ କିଲୋମିଟର ବେଗରେ ଆସୁଥିଲା। କିନ୍ତୁ ହାତୀ କରିଡରରେ ହାତୀପଲ ରହିଥିବା ବେଳେ ଏ ସମ୍ପର୍କରେ ଉକ୍ତ ସମୟରେ ଖୋର୍ଦ୍ଧା ରୋଡ ଡିଭିଜନ ରେଲୱେ ପ୍ରଶାସନକୁ ବନବିଭାଗ ପକ୍ଷରୁ କୌଣସି ସୂଚନା ହାତୀ ଥିବା ସମୟରେ ପ୍ରଦାନ କରାଯାଏ ନାହିଁ ବୋଲି ରେଳ ବିଭାଗ ଦର୍ଶାଇଛି। ତେଣୁ ଏହି ଦୁର୍ଘଟଣାକୁ ରେଳବାଇକୁ ଦୋଷାରୋପ କରିବା ଦ୍ୱାରା ରେଳବାଇ ବିଭାଗର ଭାବମୂର୍ତ୍ତି ଖରାପ ହୋଇଥିବା ଖୋର୍ଦ୍ଧାରୋଡ ଜିଭିଜନାଲ ରେଲୱେ କାର୍ଯ୍ୟାଳୟ ପକ୍ଷରୁ ପତ୍ର ମାଧ୍ୟମରେ ଦର୍ଶାଯାଇଛି।
