କଟକ ଅଫିସ,୨୬।୭: ଆଳୁ ଓ ପିଆଜ ଦର ଗତ କିଛି ସପ୍ତାହ ଭିତରେ ବଢ଼ିବାରେ ଲାଗିଛି। ମାସକ ଭିତରେ ଆଳୁ ଦର କେଜି ପିଛା ୧୫ ଟଙ୍କା ଓ ପିଆଜ ଦର ୧୦ ଟଙ୍କା ବଢ଼ି ସାରିଲାଣି। ଖୁଚୁରା ବେପାର ଓ ଗୋଦାମରେ ମଧ୍ୟ ଆଳୁ ଚଢ଼ାଦରରେ ବିକ୍ରି ହେଉଛି। ଏବେ ରୋଜଗାରର ମାଧ୍ୟମ ବନ୍ଦ ଥିବାବେଳେ ପରିବା ଦର ବୃଦ୍ଧି ହାଣ୍ଡିଶାଳକୁ ପ୍ରଭାବିତ କଲାଣି।
ସାମୁଦ୍ରିକ ଝଡ଼ ଅମ୍ଫନ ପରେ ଆଳୁ, ପିଆଜ ଦର ବଢ଼ିଥିବା ଛତ୍ରବଜାରର ବ୍ୟବସାୟୀ କହିଛନ୍ତି। କିଛି ଦିନ ତଳେ ସଂଶୋଧିତ ଆଇନ କ୍ରମେ ଆଳୁ, ପିଆଜ ଓ ଡାଲିକୁ ଅତ୍ୟାବଶ୍ୟକ ସାମଗ୍ରୀରୁ ବାଦ୍ ଦିଆଯାଇଥିଲା। ଏବେ ଆଳୁ, ପିଆଜ ଦର ବଢ଼ିବା ଏହି ଆଇନର ପ୍ରଭାବ ବୋଲି କୁହାଯାଉଛି। ଗତ ମାସରେ ଆଳୁ କେଜି ପିଛା ୧୯ରୁ ୨୦ ଟଙ୍କାରେ ବିକ୍ରି ହେଉଥିଲା। ଏବେ ୩୫ ଟଙ୍କାରେ ପହଞ୍ଚତ୍ଲାଣି। ସେହିପରି ପିଆଜ ୨୦ ଟଙ୍କାରୁ ବୃଦ୍ଧି ପାଇ ଏବେ ୩୦ ଟଙ୍କାରେ ବିକ୍ରି ହେଉଛି। ଛତ୍ରବଜାର ବ୍ୟବସାୟୀ ତଥା ସ୍ଥାନୀୟ ପୂଜା କମିଟି ସଭାପତି ଦେବେନ୍ଦ୍ରନାଥ ସାହୁଙ୍କ ସୂଚନା ମୁତାବକ, ଅମ୍ଫନ ପୂର୍ବରୁ ଆଳୁ କୁଇଣ୍ଟାଲ ପିଛା ୧୯୦୦ରୁ ୨୦୦୦ ଟଙ୍କା ଥିଲା। ଅମ୍ଫନ ପରେ ଏହା ୧୦୦ରୁ ୨୦୦ ଟଙ୍କା ପର୍ଯ୍ୟନ୍ତ ବୃଦ୍ଧି ପାଇଥିଲା। ଅମ୍ଫନ ଯୋଗୁ ପଶ୍ଚିମବଙ୍ଗ ଓ ଆସାମରେ ବନ୍ୟା ଦେଖାଦେବା ପରେ ଏହି ଦୃଷ୍ଟିରୁ ଆଳୁ ଦର ବଢ଼ିଥିଲା। କିନ୍ତୁ ଏବେ ଆଳୁ ହୋଲସେଲ୍ରେ କୁଇଣ୍ଟାଲ ପିଛା ୨୪୫୦ରୁ ୨୫୦୦ ଟଙ୍କାରେ ବିକ୍ରି ହେଉଥିବା ସେ କହିଛନ୍ତି। ପିଆଜ କୁଇଣ୍ଟାଲ ପିଛା ୧୬୦୦ ଟଙ୍କା ପର୍ଯ୍ୟନ୍ତ ରହିଛି। ପୂର୍ବ ଭଳି ଆଳୁ, ପିଆଜ ଟ୍ରକ୍ ଅଧିକ ସଂଖ୍ୟାରେ ଆସୁନାହିଁ। ଆମେ ଯଥୋଚିତ ମୂଲ୍ୟରେ ବିକୁଛୁ। ଖୁଚୁରା ବ୍ୟବସାୟୀ ଦର ବଢ଼ାଉଛନ୍ତି ବୋଲି ଛତ୍ରବଜାରର ଅନ୍ୟ ଜଣେ ବ୍ୟବସାୟୀ ପ୍ରକାଶ କରିଛନ୍ତି। ଅତ୍ୟାବଶ୍ୟକ ସାମଗ୍ରୀରୁ ବାଦ୍ ଦେବା ପରେ ପରିବା ଦର ଉପରେ ସରକାରଙ୍କ ନିୟନ୍ତ୍ରଣ ରହୁନି। ଏହି ସୁଯୋଗରେ କଳାବଜାର କରୁଥିବା ବ୍ୟବସାୟୀ ଏବେ ଏହାକୁ ଗଚ୍ଛିତ ରଖି ବଜାରରେ ଆଳୁ ସଙ୍କଟ ଦେଖାଦେଇଛି ବୋଲି ଗୁଜବ ସୃଷ୍ଟି କରୁଥିବା ଚର୍ଚ୍ଚା ହେଉଛି। ଏନେଇ ଜିଲା ଯୋଗାଣ ଅଧିକାରୀ ଅମର ମହାପାତ୍ରଙ୍କୁ ଫୋନ୍ କରାଯାଇଥିଲେ ମଧ୍ୟ ସେ ରିସିଭ କରି ନ ଥିଲେ।
