ବାଲିଗୁଡ଼ା,୩୦।୧(ଡି.ଏନ୍.ଏ): ପୁଣି ରକ୍ତମୁଖା ହୋଇଛନ୍ତି ମାଓବାଦୀ। କିଛି ଦିନର ନୀରବତା ପରେ ନିଜର ସ୍ଥିତି ଜାହିର କରିଛି ମାଓବାଦୀ ସଂଗଠନ। କନ୍ଧମାଳ ଜିଲା ବାଲିଗୁଡ଼ା ଉପଖଣ୍ଡ ଅନ୍ତର୍ଗତ ତୁମୁଡିବନ୍ଧ ବ୍ଲକ ବେଲଘର ଥାନା ଭଣ୍ଡରଙ୍ଗି ପଞ୍ଚାୟତର ଗୋଛାଗୁଡ଼ା ଗାଁରେ ମାଓବାଦୀ ପୋଲିସ ଇନ୍ଫର୍ମର ସନ୍ଦେହରେ ଦୁଇଜଣଙ୍କୁ ନିର୍ମମ ଭାବେ ହତ୍ୟା କରିଛନ୍ତି। ଶୁକ୍ରବାର ବିଳମ୍ବିତ ରାତିରେ ଗୋଛାଗୁଡ଼ା ଗାଁରେ ପଶି ହେମନ୍ତ ପାତ୍ର ଓ ଭବାନୀ ଶଙ୍କର ପାତ୍ର ନାମକ ଦୁଇଜଣ ଯୁବକଙ୍କୁ ହତ୍ୟା କରିଥିବା ଜଣାପଡ଼ିଛି । ମୃତଦେହ ନିକଟରେ ପୋଷ୍ଟର ଛାଡ଼ି ଯାଇଛନ୍ତି ମାଓବାଦୀ।
ଗତ ସେପ୍ଟେମ୍ବର ମାସରେ କନ୍ଧମାଳ-କଳାହାଣ୍ଡି ସୀମାନ୍ତ ଗୁଳି ବିନିମୟ ଘଟଣାରେ ଏହି ଦୁଇଜଣ ପୋଲିସକୁ ଆମ ବିଷୟରେ ସୂଚନା ଦେଇଥିଲେ ଏଣୁ ଏମାନଙ୍କୁ ଦଣ୍ଡ ଦିଆଯାଇଛି । ପୋଲିସ ଇନଫର୍ମର ଭାବେ କାମ କରୁଥିବା ସମସ୍ତ ଲୋକଙ୍କୁ ଆମେ ଜାଣିଛୁ । ଆସନ୍ତା ୧୫ ଦିନ ମଧ୍ୟରେ ସେମାନେ ଯଦି ଜନ ଅଦାଲତରେ ନିଜକୁ ଆତ୍ମସମର୍ପଣ ନ କରନ୍ତି ତେବେ ସେମାନଙ୍କୁ ଦଣ୍ଡ ଦିଆଯିବ ବୋଲି ପୋଷ୍ଟରରେ ଉଲ୍ଲେଖ ରହିଛି ।
ଅନ୍ୟପଟେ ଏହି ଅଞ୍ଚଳର ଗଣ୍ଡ ସମ୍ପ୍ରଦାୟର ଯୁବକମାନେ ପୋଲିସ ଇନ୍ଫର୍ମର ଭାବେ କାମ କରୁଛନ୍ତି l ଏଣୁ ସେମାନେ ଏଥିରୁ ଦୂରେଇ ରୁହନ୍ତୁ ବୋଲି ଗଣ୍ଡ ସମାଜକୁ ପୋଷ୍ଟର ମାଧ୍ୟମରେ ଚେତାବନୀ ଦେଇଛି ସଙ୍ଗଠନ। ଏଥିସହିତ ମୁଣ୍ଡିଗଡ଼ ପଞ୍ଚାୟତର ସରପଞ୍ଚ ଓ ଅନ୍ୟ ସରପଞ୍ଚ ବିପ୍ଳବୀ ସଙ୍ଗଠନ ଆଣ୍ଟି ନକ୍ସଲ ପିପୁଲ ଟିମ ଫୋର୍ସରେ ଯୋଗ ଦେଇଛନ୍ତି। ସ୍ଥାନୀୟ ଯୁବକମାନଙ୍କୁ ବିପ୍ଳବ ବିରୋଧରେ ଯିବା ପାଇଁ ପ୍ରୋତ୍ସାହିତ କରୁଛନ୍ତି । ଏ କାମ ଶୀଘ୍ର ଛାଡ଼ନ୍ତୁ । ନଚେତ୍ ଦଣ୍ଡ ଦିଆଯିବ। ଆର୍ଥିକ ଲୋଭ ଦେଖାଇ ସ୍ଥାନୀୟ ଗରିବ ଯୁବକମାନଙ୍କୁ ସୂଚନାଦାତା ବନାଇ ପୋଲିସ ସେମାନଙ୍କ ଜୀବନ ସହ ଖେଳ ଖେଳୁଛି ବୋଲି ବା.ଘୁ.ନା(ବାସଧାରା ଘୁମୁସର ନାଗାବଳୀ) ଡିଭିଜନ ସିପିଆଇ ମାଓବାଦୀ ସଂଗଠନ ପକ୍ଷରୁ ଘଟଣାସ୍ଥଳରେ ଛାଡ଼ି ଯାଇଥିବା ପୋଷ୍ଟରରେ ଉଲ୍ଲେଖ ଥିବା ଦେଖିବାକୁ ମିଳିଛି । ସେପଟେ ଘଟଣାକୁ ବିରୋଧ କରିବା ସହ ତୀବ୍ର ନିନ୍ଦା କରିଛି ଆଣ୍ଟି ନକ୍ସଲ ପିପୁଲ ପିସ ଫୋର୍ସ । ଏହାର ଉଚିତ୍ ଜବାବ ଦିଆଯିବ ବୋଲି ସଙ୍ଗଠନର ଓଡ଼ିଶା ମୁଖ୍ୟ ଭାରତ ଭୂଷଣ କହିଛନ୍ତି।
