ଆନନ୍ଦପୁର,୧୧।୪(ସ୍ବ.ପ୍ର.): କେନ୍ଦୁଝର ଜିଲା ଘସିପୁରା ଥାନା ଅଧୀନ ଆନନ୍ଦପୁର ପୌର ପରିଷଦ ଅଞ୍ଚଳରୁ ଜଣେ ବ୍ୟକ୍ତିଙ୍କୁ କୋଟିଏରୁ ଊର୍ଦ୍ଧ୍ୱ ଟଙ୍କା ଠକେଇ ଅଭିଯୋଗରେ ପୋଲିସ ସୋମବାର ଗିରଫ କରିଛି। ସେ ହେଲେ ଉମେଶ ପାଢ଼ୀ। ଭୁବନେଶ୍ୱର ଚନ୍ଦ୍ରଶେଖରପୁର ଥାନାରେ ରୁଜୁ ହୋଇଥିବା ଠକେଇ ମାମଲା (ନଂ. ୪୩୯/୨୧)ରେ କମିଶନରେଟ୍ ପୋଲିସ ଘସିପୁରା ପୋଲିସ ସହାୟତାରେ ଉମେଶଙ୍କୁ ଗିରଫ କରିଛି।
ଅନ୍ୟପକ୍ଷେ ଚଢ଼ାଉ ବେଳେ ପୋଲିସକୁ ଦୁର୍ବ୍ୟବହାର ଅଭିଯୋଗରେ ଅଭିଯୁକ୍ତ ଉମେଶଙ୍କ ସ୍ତ୍ରୀ ଶର୍ମିଳା ପାଢ଼ୀଙ୍କୁ ମଧ୍ୟ ଗିରଫ କରାଯାଇଛି।
ଆନନ୍ଦପୁର ପୌରପରିଷଦର ୬ ନଂ. ଓ୍ବାର୍ଡର ବାସିନ୍ଦା ଉକ୍ତ ଦମ୍ପତି ୧୩ ନଂ. ଓ୍ବାର୍ଡରେ ଏକ ଭଡ଼ାଘରେ ରହନ୍ତି। କମିଶନରେଟ୍ ଓ ଘସିପୁରା ପୋଲିସ ପକ୍ଷରୁ ମିଳିତ ଚଢ଼ାଉ କରାଯାଇଥିଲା। ଏହି ସମୟରେ ଶର୍ମିଳା ପୋଲିସକୁ ଦୁର୍ବ୍ୟବହାର, ଗାଳିଗୁଲଜ କରିବା ଓ ଧକ୍କା ମାରିବା ଅଭିଯୋଗରେ ଘସିପୁରା ଥାନାରେ ଏକ ମାମଲା (ନଂ.୬୮/୨୨) ରୁଜୁ କରାଯାଇ ତାଙ୍କୁ ଗିରଫ କରାଯାଇଥିବା ଥାନାଧିକାରୀ ଶ୍ୟାମଘନ ବେହେରା କହିଛନ୍ତି। ପୋଲିସ ଅଭିଯୁକ୍ତଙ୍କଠାରୁ ଏକ ସ୍ବିଫ୍ଟ ଗାଡ଼ି ଜବତ କରିଛି। ଅଭିଯୁକ୍ତ ଉମେଶ ଭୁବନେଶ୍ୱରରେ ବିଭିନ୍ନ ଲୋକଙ୍କଠାରୁ କୋଟିଏରୁ ଊର୍ଦ୍ଧ୍ୱ ଟଙ୍କା ଠକି ନେଇଛନ୍ତି। ଏପରିକି ଜଣେ ଡାକ୍ତରଙ୍କ ନିକଟରୁ ୨୫ ଲକ୍ଷ ଟଙ୍କା ଠକେଇ କରିଥିବା ନେଇ ଅଭିଯୋଗ ହୋଇଥିବା ପୋଲିସଠାରୁ ସୂଚନା ମିଳିଛି।
