ବଲାଙ୍ଗୀର ଅଫିସ, ୧୮।୯: କଣ୍ଟାବାଞ୍ଜି ସହରର ଅନ୍ନପୂର୍ଣ୍ଣା ଲଜ୍ରେ ଗୁରୁବାର ପୋଲିସ ଚଢ଼ାଉ କରି ୫୮ ଲକ୍ଷ ଟଙ୍କା ଜବତ ସହ ୭ ଜଣ ରାଜ୍ୟ ବାହାର ବ୍ୟକ୍ତିଙ୍କୁ ଗିରଫ କରିବା ଘଟଣା ବଲାଙ୍ଗୀର ପୋଲିସକୁ ପ୍ରଶଂସା ଆଣିଦେବା ପରିବର୍ତ୍ତେ ଅଡୁଆରେ ପକାଇଛି। ଏହି ଘଟଣାରେ ପୋଲିସ ମିଛ କହିଥିବା ଚର୍ଚ୍ଚା ହେବା ପରେ ଏସ୍ପି ନୀତିନ କୁଶଲକର ତଦନ୍ତ କରିବାକୁ ଆଡିଶନାଲ ଏସ୍ପିଙ୍କୁ ନିର୍ଦ୍ଦେଶ ଦେଇଛନ୍ତି। ଏହି ଘଟଣା ଏବେ ଜିଲାରେ ହଇଚଇ ସୃଷ୍ଟି କରିଛି।
ଗୁରୁବାର ରାତିରେ କଣ୍ଟାବାଞ୍ଜି ଥାନା ପୋଲିସ ଟିମ୍ ଅନ୍ନପୂର୍ଣ୍ଣା ଲଜ୍ରେ ଚଢ଼ାଉ କରିଥିଲା। ସେଠାରେ ଜୁଆଖେଳ ଚାଲିଥିବା ଏବଂ ଘଟଣାସ୍ଥଳରୁ ୫୮ ଲକ୍ଷ ୫୬ ହଜାର ଟଙ୍କା ଜବତ ସହ ୭ ଜଣଙ୍କୁ ଗିରଫ କରାଯାଇଥିବା କଣ୍ଟାବାଞ୍ଜି ଏସ୍ଡିପିଓ ହୃଷୀକେଶ ମେହେର ଶୁକ୍ରବାର ଖବରଦାତା ସମ୍ମିଳନୀରେ ସୂଚନା ଦେଇଥିଲେ। ନୂଆଁଖାଇ ପରେ କଣ୍ଟାବାଞ୍ଜି ଅଞ୍ଚଳରେ ସାଧାରଣତଃ ଦାଦନ ଋତୁ ଆରମ୍ଭ ହୋଇଯାଏ। ରାଜ୍ୟ ବାହାରର ଇଟାଭାଟି ମାଲିକ ଶ୍ରମିକ ନେବା ପାଇଁ ଏଠାକୁ ଆସିଥାନ୍ତି। ତେବେ ଗିରଫ ଦର୍ଶାଯାଇଥିବା ୭ ବ୍ୟକ୍ତି ରାଜ୍ୟ ବାହାରର ବୋଲି ଜଣାପଡ଼ିବା ପରେ ସନ୍ଦେହ ଘନୀଭୂତ ହୋଇଥିଲା। ଲଜ୍ରେ ଜୁଆ ଖେଳୁଥିବାବେଳେ ସେମାନଙ୍କଠାରୁ ୪ ପ୍ୟାକେଟ୍ ତାସ୍, ୫୮ ଲକ୍ଷ ଟଙ୍କା ଏବଂ ୭ଟି ମୋବାଇଲ ଫୋନ୍ ଜବତ ହୋଇଥିବା ଏସ୍ଡିପିଓ ମେହେର କହିଥିଲେ। ପୋଲିସର ଏଭଳି ବୟାନ ଜୁଆଖେଳର ରୂପ ଦେଇ ଇଟାଭାଟି ମାଲିକଙ୍କୁ ଖସାଇବା ପାଇଁ ଉଦ୍ଦିଷ୍ଟ ଥିଲା ବୋଲି ଚର୍ଚ୍ଚାର ବିଷୟ ହୋଇଥିଲା। ଏହାସହିତ ଢେର୍ ଅଧିକ ଟଙ୍କା ଜବତ କରିଥିବା ସତ୍ତ୍ୱେ ପୋଲିସ ମାତ୍ର ୫୮ ଲକ୍ଷ ଦର୍ଶାଇଥିବା ପ୍ରଚାର ହୋଇଥିଲା। ଏହାପରେ ଏସ୍ପି ନୀତିନ କୁଶଲକର ଘଟଣାର ତଦନ୍ତ କରିବାକୁ ବଲାଙ୍ଗୀର ଆଡିଶନାଲ ଏସ୍ପିଙ୍କୁ ନିର୍ଦ୍ଦେଶ ଦେଇଥିଲେ। ଜବତ ଟଙ୍କା ପୁଣିଥରେ ଗଣିବାରୁ ତାହା ୫୮ ଲକ୍ଷ ପରିବର୍ତ୍ତେ ଢେର୍ ଅଧିକ ବୋଲି ଚର୍ଚ୍ଚା ହୋଇଥିଲା। ଏନେଇ ଏସ୍ପି କୁଶଲକରଙ୍କୁ ପଚାରିବାରୁ ପୂର୍ବରୁ ଯେତିକି ଟଙ୍କା ଜବତ ହୋଇଛି ବୋଲି କୁହାଯାଉଥିଲା ସେଥିରେ କିଛି ବ୍ୟତିକ୍ରମ ରହିଥିବା କହିଥିଲେ। କେତେ ଅଧିକ ଟଙ୍କା ଜବତ ହୋଇଛି ତାହା ସ୍ପଷ୍ଟ କରି ନ ଥିଲେ ମଧ୍ୟ ଦର୍ଶାଯାଇଥିବା ୫୮ ଲକ୍ଷରୁ ଅଧିକ ଦିଗକୁ ଇଙ୍ଗିତ କରିଥିଲେ। ପ୍ରକୃତରେ ଉକ୍ତ ଲଜ୍ରେ ସେଦିନ ରାତିରେ ଅଭିଯୁକ୍ତମାନେ ଜୁଆ ଖେଳୁଥିଲେ ନା ଦାଦନ ଚାଲାଣ ପାଇଁ ଆସିଥିଲେ ସେନେଇ ତଦନ୍ତ କରାଯିବ ବୋଲି କହିଛନ୍ତି। ଆଡିଶନାଲ ଏସ୍ପିଙ୍କ ତଦନ୍ତ ରିପୋର୍ଟ ଆସିବା ପରେ ଘଟଣା ସ୍ପଷ୍ଟ ହେବ ଏବଂ ଆଇନ ଅନୁଯାୟୀ ସମ୍ପୃକ୍ତ ଅଧିକାରୀ ଏବଂ କର୍ମଚାରୀଙ୍କ ବିରୋଧରେ ବିଭାଗୀୟ ଦୃଷ୍ଟାନ୍ତମୂଳକ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କୁଶଲକର କହିଛନ୍ତି। ଏହି ଘଟଣା ଏବେ ବଲାଙ୍ଗୀର ପୋଲିସ ବିଭାଗ ଛବିକୁ ଖରାପ କରିବା ସହ ସନ୍ଦେହଘେରକୁ ଟାଣିନେଇଛି।
