ନୂଆଦିଲ୍ଲୀ,୩୧।୧(ପି.ଟି.): ପାର୍ଲାମେଣ୍ଟର ବଜେଟ ଅଧିବେଶନ ପୂର୍ବରୁ ସୋମବାର ସର୍ବଦଳୀୟ ବୈଠକ ଅନୁଷ୍ଠିତ ହୋଇଯାଇଛି। ବୈଠକରେ ବିରୋଧୀ ଦଳଗୁଡ଼ିକ ଆଦାନୀ ଏବଂ ମହିଳା ସ୍ଥାନ ସଂରକ୍ଷଣ ବିଲ୍ ପ୍ରସଙ୍ଗ ଉଠାଇଥିଲେ। ନିୟମ ଅନୁଯାୟୀ ସମସ୍ତ ପ୍ରସଙ୍ଗରେ ଆଲୋଚନା କରାଯିବ ବୋଲି ସରକାର ପ୍ରତିଶ୍ରୁତି ଦେବା ସହ ସମସ୍ତଙ୍କ ସହଯୋଗ କାମନା କରିଛନ୍ତି। ଅଧିକାଂଶ ଆଞ୍ଚଳିକ ଦଳ ଆଦାନୀ ଏବଂ ମହିଳା କୋଟା ବିଲ୍ ସମେତ ବେରୋଜଗାରୀ, ଦରଦାମ୍ ବୃଦ୍ଧି, ରାଜ୍ୟଗୁଡ଼ିକୁ ରାଜସ୍ବ ପ୍ରଦାନରେ କେନ୍ଦ୍ରର ପାତରଅନ୍ତର ଆଦି ପ୍ରସଙ୍ଗ ଉଠାଇଥିଲେ। ସଂସଦୀୟ ବ୍ୟାପାର ମନ୍ତ୍ରୀ ପ୍ରହଲ୍ଲାଦ ଜୋଷୀ କହିଥିଲେ, ସରକାର ସବୁବେଳେ ପ୍ରତ୍ୟେକ ପ୍ରସଙ୍ଗରେ ଆଲୋଚନା ପାଇଁ ପ୍ରସ୍ତୁତ ଅଛନ୍ତି। ତେବେ ସେଗୁଡ଼ିକ ନିୟମ ଅନୁଯାୟୀ ଏବଂ ଗୃହ ଅଧ୍ୟକ୍ଷଙ୍କ ଅନୁମତିକ୍ରମେ ହେବା ଆବଶ୍ୟକ। ସର୍ବଦଳୀୟ ବୈଠକରେ ୨୭ଟି ଦଳରୁ ୩୭ ଜଣ ନେତା ଯୋଗଦେଇଥିଲେ। ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ ବୈଠକରେ ଉପସ୍ଥିତ ଥିଲେ। କଂଗ୍ରେସର ଅଧିକାଂଶ ନେତା ଭାରତ ଯୋଡ଼ୋ ଯାତ୍ରାରେ ବ୍ୟସ୍ତ ଥିବାରୁ ସର୍ବଦଳୀୟ ବୈଠକରେ ମୁଖ୍ୟ ବିରୋଧୀ ଦଳରୁ କେହି ଉପସ୍ଥିତ ନ ଥିଲେ।
ଆଦ୍ମୀ ପାର୍ଟି, ଆର୍ଜେଡି, ଉଦ୍ଧବ ଠାକ୍ରେଙ୍କ ନେତୃତ୍ୱାଧୀନ ଶିବସେନା, କେ. ଚନ୍ଦ୍ରଶେଖର ରାଓଙ୍କ ବିଆର୍ଏସ୍, ଡିଏମ୍କେ ଏବଂ ବାମଦଳଗୁଡ଼ିକ ଆଦାନୀ ପ୍ରସଙ୍ଗ ଉଠାଇ ପାର୍ଲାମେଣ୍ଟରେ ଏହା ଉପରେ ଆଲୋଚନା ଦାବି କରିଥିଲେ। ମିଳିତ ଅଧିବେଶନରେ ରାଷ୍ଟ୍ରପତିଙ୍କ ଅଭିଭାଷଣକୁ ବର୍ଜନ କରିବା ଲାଗି ବିଆର୍ଏସ୍ କେତେକ ବିରୋଧୀ ଦଳ ସହ ଆଲୋଚନା କରିଥିଲା। ଓ୍ବାଇଏସ୍ଆର୍ କଂଗ୍ରେସ, ବିଆର୍ଏସ୍, ବିଜୁ ଜନତା ଦଳ, ଟିଏମ୍ସି ଆଦି ଦଳ ମହିଳା ସଂରକ୍ଷଣ ବିଲ୍ ଗୃହୀତ କରାଇବା ପାଇଁ ଦାବି କରିଥିଲେ। ସାରା ଦେଶରେ ଜାତିଭିତ୍ତିକ ଅର୍ଥନୈତିକ ଜନଗଣନା ପାଇଁ ଓ୍ବାଇଏସ୍ଆର୍ କଂଗ୍ରେସ ଦାବି କରିଥିଲା। ଏହାକୁ ଜେଡିୟୁ, ଆର୍ଜେଡି, ଟିଆର୍ଏସ୍, ଟିଏମ୍ସି ଏବଂ ବିଜେଡି ସମର୍ଥନ କରିଥିଲେ। ଚାଇନା ସହ ସୀମା ବିବାଦ ପ୍ରସଙ୍ଗ ବହୁଜନ ସମାଜ ପାର୍ଟି (ବିଏସ୍ପି) ଉଠାଇଥିଲା।
