କେନ୍ଦ୍ରାପଡ଼ା ଅଫିସ, ୨୨ା୫: କେନ୍ଦ୍ରାପଡ଼ା ଜିଲାର ଏକମାତ୍ର ବ୍ଲଡ୍ ବ୍ୟାଙ୍କରେ ଘୋର ରକ୍ତସଙ୍କଟ ଦେଖାଦେଇଛି। ମାସକୁ ଅନୂ୍ୟନ ୬୦୦ରୁ ୭୦୦ ୟୁନିଟ ରକ୍ତ ଆବଶ୍ୟ୍ୟକ ଥିବାବେଳେ ଅଦ୍ୟାବଧି ମାତ୍ର ୫୦ ୟୁନିଟ ମଧ୍ୟରେ ଷ୍ଟକ ରହିଛି। ଫଳରେ ଥାଲାସେମିଆ, ପ୍ରସୂତି ଓ ଦୁର୍ଘଟଣାଗ୍ରସ୍ତ ଲୋକଙ୍କୁ ରକ୍ତ ଯୋଗାଇବା ଅସମ୍ଭବ ହୋଇପଡ଼ିଛି। ଅପରପକ୍ଷରେ ୫ଟି ସ୍ଥାନରେ ୨ ଲାବୋରେଟୋରି ଟେକ୍ନିସିଆନଙ୍କୁ ଛାଡ଼ି ଦେଲେ ୨ ନର୍ସ, ୩ ଆଟେଡାଣ୍ଟ ଓ ୨ ସୁଇପର ପଦବୀ ପୂରଣ ହୋଇନାହିଁ। ସେହିପରି ଜିଲା ମୁଖ୍ୟ ଚିକିତ୍ସାଳୟଠାରୁ ପ୍ରାୟ ୫ କିଲୋମିଟର ଦୂରରେ ଥିବା ଏହି ରକ୍ତ ଭଣ୍ଡାରକୁ ଯାତାୟାତ ପାଇଁ ଅଟୋରେ ଅନୂ୍ୟନ ୩୦୦ ଟଙ୍କା ଖର୍ଚ୍ଚ ହେଉଛି। ବ୍ଲଡ୍ ବ୍ୟାଙ୍କର ଏହି ରକ୍ତାଭାବ ପାଇଁ ଯଥେଷ୍ଟ ସଚେତନତା ସୃଷ୍ଟି ହେଉ ନ ଥିବାରୁ ଏହା ହୀନିମାନରେ ଚାଲିଥିବା ସ୍ଥାନୀୟ ଅଞ୍ଚଳରେ ଆଲୋଚନା ହେଉଛି।
ଏ ସମ୍ପର୍କରେ ସାମାଜିକ କର୍ମୀ ମନୋଜ କୁମାର ନାୟକ କହିଛନ୍ତି, କେନ୍ଦ୍ରାପଡ଼ା ବ୍ଲକ ଇନ୍ଦୁପୁରର ସୂଚିସ୍ମିତା ସାମଲଙ୍କ ବୟସ ୧୧ ବର୍ଷ। ସେ ଏବେ ଥାଲାସେମିଆ ରୋଗୀ। ପ୍ରତିମାସ ତାଙ୍କର ରକ୍ତ ଆବଶ୍ୟକ। ୫ ଦିନ ଧରି ରକ୍ତଭଣ୍ଡାରରେ ରକ୍ତ ନ ଥିବାରୁ ଘରକୁ ଫେରୁଛନ୍ତି। ଫଳରେ ଶରୀରର ହିମୋଗ୍ଲୋବିନ କମିବାରୁ ନିସ୍ତେଜ ହୋଇ ପଡ଼ିଥିଲେ। ଝିଅର ବାପା କୈଳାସଙ୍କୁ ଯୋଗାଯୋଗ ପରେ ୨ଦିନ ପୂର୍ବେ ରକ୍ତଦାନ କରିଛନ୍ତି। କେବଳ ସୂଚିସ୍ମିତା ନୁହନ୍ତି, ତାଙ୍କ ପରି ପ୍ରାୟ ୧୪୦ ଜଣ ଥାଲାସେମିଆ ରୋଗୀ ଜିଲାରେ ଅଛନ୍ତି। ଏହା ବ୍ୟତୀତ ବିଭିନ୍ନ କ୍ଷେତ୍ରର ସ୍ବାସ୍ଥ୍ୟସେବା ପାଇଁ ଅନୂ୍ୟନ ୭୦୦ ୟୁନିଟ ରକ୍ତ ଆବଶ୍ୟକ।
ବୁଦ୍ଧିଜୀବୀ ପ୍ରଶାନ୍ତ କୁମାର ନାୟକ କହିଛନ୍ତି, ଦୀର୍ଘଦିନର ପ୍ରତୀକ୍ଷା ପରେ ଜିଲା ମୁଖ୍ୟ ଚିକିତ୍ସାଳୟ ସହରର ଖଡ଼ଇଙ୍ଗରୁ ଶାମଗୁଡ଼ିଆକୁ ଜାନୁୟାରୀ ମାସରେ ସ୍ଥାନାନ୍ତର ହୋଇଛି। ପୁରୁଣାରୁ ନୂଆ ଚିକିତ୍ସାଳୟ ସ୍ଥାନର ଦୂରତା ଅନୂ୍ୟନ ୫ କିଲୋମିଟର। ରକ୍ତର ଆବଶ୍ୟକତା ପୂରଣ ପାଇଁ ଏହି ଦୂରତା ଅତିକ୍ରମ କରିବାକୁ ଅଟୋ ଭଡ଼ା ପ୍ରାୟ ୩୦୦ ଟଙ୍କା ଲାଗୁଛି। ରୋଗୀଙ୍କ ସମ୍ପର୍କୀୟ ଏଥିପାଇଁ ବିଶେଷ ଅସୁବିଧାରେ ପଡୁଛନ୍ତି। ବିଜ୍ଞାନ ପଥରେ ଯାଇ ମଣିଷ କୃତ୍ରିମ ଭାବେ ବହୁ ଜିନିଷ ଆଗକୁ ଆଣୁଛନ୍ତି। ତେବେ ଏଯାଏ କୃତ୍ରିମ ରକ୍ତ ସୃଷ୍ଟି ହୋଇ ପାରିନାହିଁ। ଏଥିପାଇଁ ରକ୍ତଦାନ ଏକ ମହାପୁଣ୍ୟ ଭାବେ ଗ୍ରହଣ କରାଯାଉଛି। ତେବେ ଜିଲାର ଏକମାତ୍ର ଏହି ରକ୍ତଭଣ୍ଡାରରେ ହେଉଥିବା ରକ୍ତାଭାବ ସମ୍ପର୍କରେ କୌଣସି ସଚେତନତା କାର୍ଯ୍ୟକ୍ରମ ହେଉନାହିଁ। କେତେଗୋଟି ଅନୁଷ୍ଠାନ ଓ ବ୍ୟକ୍ତିବିଶେଷଙ୍କ କ୍ୟାମ୍ପ ଯୋଗୁ ସାମୟିକ ଭାବେ ରକ୍ତ ଅଭାବ ପୂରଣ ହେଉଛି। ବିଜେଡି ମୋ ସରକାରର ଜୀବନବିନ୍ଦୁ ସଂଯୋଜକ ହିରଣ୍ୟ କୁମାର ପଣ୍ଡା କହିଛନ୍ତି, ଖରାଦିନ ପାଇଁ ରକ୍ତ ସଂଗ୍ରହରେ ବାଧା ସୃଷ୍ଟି ହୋଇଛି। ଏହି ଜିଲା ପାଇଁ ଏନ୍ଏଟିପିସିଆର ପ୍ରତିଷ୍ଠା ପାଇଁ ରାଜ୍ୟ ସରକାର ବ୍ୟବସ୍ଥା କରିଛନ୍ତି। ତେବେ ନୂତନ ଚିକିତ୍ସାଳୟର ଆନୁଷଙ୍ଗିକ ବ୍ୟବସ୍ଥା ହୋଇ ନ ଥିବାରୁ ରକ୍ତଭଣ୍ଡାର ସ୍ଥାନାନ୍ତର ହୋଇନାହିଁ। ଜଣେ ସୁସ୍ଥ ଲୋକ ପ୍ରତି ୩ ମାସ ଅନ୍ତରରେ ଗୋଟିଏ ୟୁନିଟ ରକ୍ତ ଦେଲେ ସମ୍ପୃକ୍ତ ବ୍ୟକ୍ତିର ସ୍ବାସ୍ଥ୍ୟଗତ ସମସ୍ୟା ଅନେକାଂଶରେ କମିଯାଏ ବୋଲି ବୁଝା ଯାଉଛି। ଏ ସମ୍ପର୍କରେ ଏଡିଏମ୍ଓ ଡା. ସଚ୍ଚିଦାନନ୍ଦ ମିଶ୍ରଙ୍କୁ ପଚାରିବାରେ ରକ୍ତଭଣ୍ଡାରରେ ରକ୍ତାଭାବ ସମସ୍ୟା ରହୁଛି। ଏହାର ନିରାକରଣ ପାଇଁ ବିଭିନ୍ନ ଅନୁଷ୍ଠାନ ସହ ଯୋଗାଯୋଗ କରାଯାଇ କ୍ୟାମ୍ପ କରାଯାଉଛି। ରକ୍ତ ଭଣ୍ଡାର କର୍ମଚାରୀ ସମସ୍ୟା ନିକଟରେ ସମାଧାନ ହେବ ବୋଲି ସେ କହିଛନ୍ତି।
