ଟୋକିଓ,୨୨।୫(ଏପି)-ଟୋକିଓ ଅଲିମ୍ପିକ୍ସ ଆରମ୍ଭ ହେବାକୁ ଆଉ ମାତ୍ର ୨ ମାସ ବାକି ରହିଛି। ଅନ୍ତର୍ଜାତୀୟ ଅଲିମ୍ପିକ୍ କମିଟି (ଆଇଓସି) ଆୟୋଜକମାନଙ୍କ ସହ ମିଶି ଶୁକ୍ରବାର ଅଲିମ୍ପିକ୍ସ ଆୟୋଜନ ନେଇ ତା’ର ଅନ୍ତିମ ପ୍ଲାନିଂ ସେସନ ସ୍ଥିର କରିଛି। କିଭଳି ଅଲିମ୍ପିକ ସଫଳତାର ସହ ଆୟୋଜନ ହେବ ତାହା ଉପରେ ସବୁଠାରୁ ଅଧିକ ଗୁରୁତ୍ୱ ଦିଆଯାଉଛି। ଆଗାମୀ ୩ ଦିନ ମଧ୍ୟରେ ବହୁତ କିଛି କରିବାକୁ ରହିଛି ବୋଲି ଆଇଓସି ଉପସଭାପତି ଜନ୍ କୋଟ୍ସ ବୁଧବାର କହିଛନ୍ତି।
ଜାପାନର ୬୦ରୁ ୮୦ ପ୍ରତିଶତ ଲୋକ କୋଭିଡ୍-୧୯ ମହାମାରୀ ମଧ୍ୟରେ ଅଲିମ୍ପିକ୍ସ ଆୟୋଜନ ହେଉ ବୋଲି ଚାହୁଁନାହାନ୍ତି। ଜନସାଧାରଣ ଏ ନେଇ ଖୋଲାଖୋଲି ଭାବେ ଅସନ୍ତୋଷ ଜାହିର କରିସାରିଛନ୍ତି। ଫଳରେ ଜନସାଧାରଣ ଓ ଆୟୋଜକ ତଥା ସରକାରଙ୍କ ମଧ୍ୟରେ ମୁକାବିଲାମୂଳକ ସ୍ଥିତି ସୃଷ୍ଟି ହୋଇଛି। ଯଦିଓ ଆୟୋଜକମାନେ ଅଲିମ୍ପିକ୍ସ ସମ୍ପୂର୍ଣ୍ଣ ସୁରକ୍ଷିତ ପରିବେଶରେ ଓ ନିରାପତ୍ତାରେ ଆୟୋଜନ ହେବ ବୋଲି ପ୍ରତିଶ୍ରୁତି ଦେଇ ଆସୁଛନ୍ତି ତେବେ ଅଲିମ୍ପିକ୍ସ ବାତିଲ କରିବା ନେଇ କୌଣସି ସୂଚନା ଦେଖିବାକୁ ମିଳିନାହିଁ ା ଅଲିମ୍ପିକ୍ସ ଆୟୋଜନ ହେବ ବୋଲି ଆଇଓସି ବାରମ୍ବାର କହି ଆସୁଛି। ତେବେ ଅଲିମ୍ପିକ୍ ଆୟୋଜନ ନେଇ ଅନ୍ତିମ ନିଷ୍ପତ୍ତି ନେବାର ଡେଡ୍ ଲାଇନ ଏବେ ବି ବାକି ଅଛି। ଏ ନେଇ ଅନ୍ତିମ ତାରିଖ ଆହୁରି ଗୋଟିଏ ମାସ ବାକି ଅଛି ବୋଲି ଆଇଓସିର ସବୁଠାରୁ ବରିଷ୍ଠ ଅଧିକାରୀ ରିଚାର୍ଡ ପାଉଣ୍ଡ କହିଛନ୍ତି। ଜୁନ୍ ଶେଷ ହେବା ପୂର୍ବରୁ ଅଲିମ୍ପିକ୍ସ ଆୟୋଜନ ହେବ କି ନା ସେ ନେଇ ସ୍ପଷ୍ଟ ହୋଇଯିବ ବୋଲି ସେ କହିଛନ୍ତି। ଇତିମଧ୍ୟରେ ଟୋକିଓ, ଓସାକା ଓ ଅନ୍ୟ ପ୍ରାନ୍ତରେ ଷ୍ଟେଟ୍ ଇମର୍ଜେନ୍ସି ଜାରି ରହିଛି। ମେ’ ୩୧ରେ ଏହା ଶେଷ ହେବ। ତେବେ ଏହା ଆଗକୁ ବଢିବ ବୋଲି ଆଶା କରାଯାଉଛି।
ଅନ୍ୟପଟେ ଷ୍ଟେଟ୍ ଇମର୍ଜେନ୍ସି ଜାରି ରହିଥିଲେ ମଧ୍ୟ ଅଲିମ୍ପିକ୍ସ ଆୟୋଜନ ହେବ ବୋଲି ଆଇଓସି ଉପସଭାପତି ଦାୟିତ୍ୱରେ ଥିବା ଜନ୍ କୋଟ୍ସ କହିଛନ୍ତି। ବିଶ୍ୱ ସ୍ବାସ୍ଥ୍ୟ ସଂଗଠନ (ଡବ୍ଲ୍ୟୁଏଚ୍ଓ) ଏବଂ ଅନ୍ୟ ସାଇଣ୍ଟିଫିକ୍ ଓ ମେଡିକାଲ ଆଡ୍ଭାଇସ୍ ଅନୁସାରେ ସମ୍ପୂର୍ଣ୍ଣ ସୁରକ୍ଷିତ ଓ ନିରାପତ୍ତା ମଧ୍ୟରେ ଅଲିମ୍ପିକ୍ସ ଆୟୋଜନ ହେବ ବୋଲି ସେ କହିଛନ୍ତି। କ୍ୱାଲିଫାଇଂ ଇଭେଣ୍ଟରୁ ୮୦ ଓ ର଼୍ୟାଙ୍କିଙ୍ଗ୍ରୁ ୨୦ ପ୍ରତିଶତ ଆଥ୍ଲେଟଙ୍କୁ ଅଲିମ୍ପିକ୍ସରେ ଅଂଶଗ୍ରହଣ କରିବାର ସୁଯୋଗ ଦିଆଯିବ। ଜୁଲାଇ ୧୨ରେ ଆଇଓସି ଅଧ୍ୟକ୍ଷ ଥୋମାସ ବାକ ଟୋକିଓରେ ପହଞ୍ଚିବାର ଯୋଜନା କରୁଛନ୍ତି। କରୋନା ପାଇଁ ସେ ତାଙ୍କର ପୂର୍ବ ଗସ୍ତକୁ ବାତିଲ କରିଥିଲେ ।
